રાજસ્થાનના ચુરુમાં ભારતીય વાયુસેનાનું જગુઆર ફાઇટર જેટ ક્રેશ થયું છે. આ અકસ્માતમાં વિમાનના પાઇલટ અને કો-પાઇલટ શહીદ થયા છે. વિમાન જ્યાં ક્રેશ થયું હતું ત્યાં ફાઇટર જેટનો કાટમાળ એક વિશાળ વિસ્તારમાં ફેલાયેલો છે. આ અકસ્માત બુધવાર (9 જુલાઈ) બપોરે 12:40 વાગ્યે થયો હતો. ભારતીય વાયુસેનાએ અકસ્માતનાં કારણો શોધવા માટે કોર્ટ ઓફ ઇન્ક્વાયરીની રચના કરી છે. ચુરુ એસપી જય યાદવે જણાવ્યું હતું કે રાજલદેસર પોલીસ સ્ટેશન વિસ્તારના ભાનુડા ગામમાં વિમાન ક્રેશ થયું છે. આમાં બે લોકોનાં મોત થયાં છે. કાટમાળ પાસે ખરાબ રીતે વિકૃત મૃતદેહોના ટુકડા મળ્યા છે. એવું કહેવામાં આવી રહ્યું છે કે અકસ્માત પહેલાં ટેક્નિકલ કારણોસર પાઇલટ બહાર નીકળી શક્યા નહોતા. છેલ્લા 5 મહિનામાં દેશભરમાં ત્રણ જગુઆર ક્રેશ થયાં છે.
સેનાનાં સૂત્રોના જણાવ્યા અનુસાર, આ જગુઆર ફાઇટર જેટે શ્રી ગંગાનગર નજીકના સુરતગઢ એરબેઝથી ઉડાન ભરી હતી. આ જેટ બે સીટર હતું, એનો ઉપયોગ તાલીમ માટે થાય છે. સ્થાનિક લોકોના જણાવ્યા અનુસાર, તેમણે પહેલા વિમાનનો ગડગડાટ સાંભળ્યો, પછી જોરદાર વિસ્ફોટ થયો. આ પછી વહીવટીતંત્રને ઘટના વિશે જાણ કરવામાં આવી. ઘટનાનાં ચોક્કસ કારણો હજુ સુધી જાણી શકાયાં નથી. અધિકારીઓએ જણાવ્યું હતું કે તપાસ પૂર્ણ થયા પછી જ વિગતવાર માહિતી શેર કરવામાં આવશે. સેનાનું એક હેલિકોપ્ટર પણ ઘટનાસ્થળે પહોંચી ગયું છે, આ હેલિકોપ્ટરને રસ્તા પર ઉતારવામાં આવ્યું હતું. અકસ્માતના પ્રત્યક્ષદર્શી પ્રેમ સિંહે જણાવ્યું હતું કે વિમાને કાબુ ગુમાવી દીધો હતો. જમીન પર પડતાની સાથે જ વિમાનનાં નાના-નાના ટુકડા થઈ ગયા અને આગ લાગી ગઈ. આ ઘટના બપોરે 12:40 વાગ્યાની આસપાસ બની હતી.
CM ભજનલાલ શર્માએ વિમાન દુર્ઘટના પર શોક વ્યક્ત કર્યો છે. તેમણે ટ્વીટ કર્યું- વાયુસેનાના વિમાન દુર્ઘટનાના દુઃખદ સમાચાર મળ્યા. ઘટના બાદ તરત જ, વહીવટીતંત્ર એલર્ટ મોડ પર છે અને અધિકારીઓને રાહત અને બચાવ કાર્ય માટે સૂચનાઓ આપવામાં આવી છે. રાજ્યપાલ હરિભાઉ બાગડેએ ચુરુ જિલ્લાના રતનગઢ વિસ્તારમાં ભારતીય વાયુસેનાના વિમાન દુર્ઘટના પર ઊંડો શોક વ્યક્ત કર્યો છે. તેમણે ભગવાનને પ્રાર્થના કરી છે કે તેઓ મૃતકોના આત્માઓને શાંતિ આપે અને શોકગ્રસ્ત પરિવારને આ દુઃખ સહન કરવાની શક્તિ આપે. ભૂતપૂર્વ મુખ્યમંત્રી અશોક ગેહલોતે વિમાન દુર્ઘટનામાં શહીદ થયેલા પાઇલટ અને કો-પાઇલટને શ્રદ્ધાંજલિ આપી. ભારતીય વાયુસેનાએ ટ્વિટ કર્યું છે કે, આજે રાજસ્થાનના ચુરુ નજીક નિયમિત તાલીમ મિશન દરમિયાન IAFનું જગુઆર ટ્રેનર વિમાન ક્રેશ થયું હતું. અકસ્માતનું કારણ જાણવા માટે કોર્ટ ઓફ ઇન્ક્વાયરીની રચના કરવામાં આવી છે.