મહારાષ્ટ્રના પુણે નજીક ખેડ તાલુકામાં શ્રાવણ સોમવારે કુંડેશ્વર મંદિરમાં દર્શન કરવા જઈ રહેલા ભક્તોથી ભરેલી એક પિકઅપ જીપ ખાડામાં પડી ગઈ હતી. આ ઘટનામાં 6 મહિલાઓના ઘટનાસ્થળે જ મોત થયા હતા, જ્યારે 22થી વધુ મહિલાઓ ગંભીર રીતે ઘાયલ થઈ હતી. ઘટનાસ્થળે હાજર લોકોએ જણાવ્યું કે અકસ્માત બપોરે 1 વાગ્યાની આસપાસ થયો જ્યારે ડ્રાઇવરે વળાંકવાળા ઘાટ પર વાહન પરનો કાબુ ગુમાવ્યો અને પિકઅપ પૈઠ-કોહિંદે સરહદ પર નાગમોડી ઘાટ પર 25-30 ફૂટ ઊંડી ખીણમાં પડી ગયું.
પ્રધાનમંત્રી નરેન્દ્ર મોદીએ અકસ્માત પર દુઃખ વ્યક્ત કર્યું અને મૃતકોના પરિવારજનોને 2 લાખ રૂપિયા અને ઘાયલોને 50,000 રૂપિયાની આર્થિક સહાયની જાહેરાત કરી. પિંપરી ચિંચવાડ પોલીસ ડીસીપી શિવાજી પવારે જણાવ્યું કે ઘાયલોને હોસ્પિટલમાં દાખલ કરવામાં આવ્યા છે. અકસ્માત પર દુઃખ વ્યક્ત કરતા પ્રધાનમંત્રી નરેન્દ્ર મોદીએ X પર લખ્યું- ‘મહારાષ્ટ્રના પુણેમાં થયેલા અકસ્માતમાં થયેલા જાનમાલના નુકસાનથી હું દુઃખી છું. આ અકસ્માતમાં પોતાના પ્રિયજનો ગુમાવનારાઓ પ્રત્યે સંવેદના. ઘાયલોના ઝડપથી સ્વસ્થ થવાની હું કામના કરું છું. તમામ મૃતકોના પરિવારોને પ્રધાનમંત્રી રાષ્ટ્રીય રાહત ભંડોળમાંથી 2 લાખ રૂપિયાનું વળતર આપવામાં આવશે. ઘાયલોને 50 હજાર રૂપિયા આપવામાં આવશે.’
મળતી માહિતી મુજબ, પિકઅપમાં લગભગ 30 મહિલાઓ અને બાળકો હતા. ક્ષમતા કરતાં વધુ ભક્તોની હાજરીને કારણે પિકઅપે પોતાનું સંતુલન ગુમાવ્યું હતું. શ્રાવણ મહિનાને કારણે, આ મંદિરમાં મોટી સંખ્યામાં ભક્તો આવે છે. વહીવટીતંત્રે અકસ્માતની તપાસના આદેશ આપ્યા છે. અકસ્માત બાદ સ્થાનિક લોકો ઘટનાસ્થળે પહોંચી ગયા હતા અને બચાવ કાર્ય શરૂ કર્યું હતું. ઘાયલોને ચંદૌલી ગ્રામીણ હોસ્પિટલ અને નજીકની ખાનગી હોસ્પિટલોમાં દાખલ કરવામાં આવ્યા છે. કેટલાકની હાલત ખૂબ જ ગંભીર હોવાનું કહેવાય છે, જેના કારણે મૃત્યુઆંક વધવાની આશંકા છે.