અમેરિકાના પ્રખ્યાત ન્યાયાધીશ ફ્રેન્ક કેપ્રિયોનું બુધવારે અવસાન થયું. તેઓ 88 વર્ષના હતા. કેપ્રિયો લાંબા સમયથી સ્વાદુપિંડના કેન્સર સામે લડી રહ્યા હતા. તેમના પરિવારે ઇન્સ્ટાગ્રામ પર તેમના મૃત્યુની માહિતી આપી. કેપ્રિયો તેમના કોર્ટ શો ‘કેટ ઇન પ્રોવિડન્સ’થી વિશ્વભરમાં પ્રખ્યાત થયા. આ શો 2018થી 2020 સુધી ચાલ્યો અને તેને ઘણા ડેટાઇમ એમી એવોર્ડ્સ માટે નામાંકિત કરવામાં આવ્યો. તેમના કરુણાપૂર્ણ અને માનવીય નિર્ણયોના વીડિયો સોશિયલ મીડિયા પર વાઇરલ થઈ રહ્યા છે. તેમણે ઘણી વખત ગરીબ પરિવારોના ચલણ માફ કર્યા છે અને લોકોને પ્રોત્સાહિત કર્યા છે. જજ ફ્રેન્ક કેપ્રિયોના ઘણા વીડિયો સોશિયલ મીડિયા પર વાઇરલ થયા છે. ઇન્સ્ટાગ્રામ પર તેમના 3.4 મિલિયન ફોલોઅર્સ છે. તેમના વીડિયોને ઓનલાઇન અબજો વખત જોવામાં આવ્યા છે.
કેપ્રિયોએ રવિવારે ઇન્સ્ટાગ્રામ પર એક વીડિયો પોસ્ટ કર્યો હતો. તેમણે કહ્યું હતું કે તેમની તબિયત બગડી ગઈ છે અને તેઓ ફરીથી હોસ્પિટલમાં છે. તેમણે લોકોને તેમના માટે પ્રાર્થના કરવાની અપીલ કરી હતી. લોકો કેપ્રિયોને વિશ્વના સૌથી દયાળુ ન્યાયાધીશ કહેતા હતા. તેમનું માનવું હતું કે ન્યાયમાં કરુણા અને માનવતા હોવી જોઈએ. કેપ્રિયોનો જન્મ અમેરિકાના રોડ આઇલેન્ડમાં થયો હતો. રોડ આઇલેન્ડના ગવર્નર ડેન મેક્કીએ તેમને રાજ્યનો સાચો ખજાનો ગણાવ્યો હતો. તેમના માનમાં રાજ્યમાં ધ્વજ અડધી કાઠીએ ફરકાવવામાં આવ્યા છે. તેમણે લાંબા સમય સુધી મ્યુનિસિપલ જજ તરીકે કામ કર્યું. 2023માં તેમણે પોતે કહ્યું કે તેમને કેન્સર છે. સારવાર દરમિયાન તેઓ લોકો સાથે જોડાયેલા રહ્યા અને અપડેટ્સ આપતા રહ્યા. કેપ્રિયો પોતાના પારિવારિક જીવન પ્રત્યે પણ ખૂબ જ સમર્પિત હતા. પરિવારે કહ્યું કે તેમને એક સારા પતિ, પિતા, દાદા અને પરદાદા તરીકે યાદ કરવામાં આવશે. કેપ્રિયોની દયા અને માનવતાનું ઉદાહરણ હંમેશા યાદ રાખવામાં આવશે.