કેન્દ્રીય ગૃહ મંત્રાલયે પ્રત્યાર્પણ અપીલમાં બેલ્જિયમ સરકારને ખાતરી આપી છે કે ભારતમાં હીરા વેપારી મેહુલ ચોક્સી સાથે માનવીય વર્તન કરવામાં આવશે. ગૃહ મંત્રાલયે પોતાના લેટરમાં ચોક્સીને કયા સેલમાં રાખવામાં આવશે તેનો પણ ઉલ્લેખ કર્યો છે.
કેન્દ્રએ જણાવ્યું હતું કે ચોક્સીને મુંબઈની આર્થર રોડ જેલના બેરેક નંબર 12માં રાખવામાં આવશે. તેમાં છ લોકોને સમાવવાની ક્ષમતા છે. પત્ર મોકલવામાં આવ્યો ત્યાં સુધી બેરેકના બે સેલ ખાલી હતા. બેરેકમાં સ્વચ્છ, જાડા સુતરાઉ સાદડી (ગાદલું), ઓશીકું, ચાદર અને સૂવા માટે ધાબળો શામેલ છે.
પત્રમાં વધુમાં કહેવામાં આવ્યું છે કે ચોક્સીને પીવાનું સ્વચ્છ પાણી અને 24 કલાક તબીબી સુવિધાઓ મળશે. કેન્દ્રએ કહ્યું કે ડોકટરોની સલાહ અથવા કોર્ટના આદેશના આધારે ધાતુ અથવા લાકડાનો પલંગ આપી શકાય છે. ભારતીય ઉદ્યોગપતિ મેહુલ ચોક્સી પર પંજાબ નેશનલ બેંક સાથે ₹13,850 કરોડની છેતરપિંડી કરવાનો આરોપ છે. ભારતીય તપાસ એજન્સીઓ દ્વારા પ્રત્યાર્પણ અપીલ બાદ 12 એપ્રિલે ચોક્સીની બેલ્જિયમમાં ધરપકડ કરવામાં આવી હતી. તે અને તેનો ભત્રીજો નીરવ મોદી પીએનબી છેતરપિંડી કેસમાં મુખ્ય આરોપી છે.
માર્ચમાં ખુલાસો થયો હતો કે મેહુલ ચોક્સી બેલ્જિયમમાં છે. અહેવાલો અનુસાર, મેહુલ તેની પત્ની પ્રીતિ ચોક્સી સાથે રહેતો હતો, જેમને બેલ્જિયમની નાગરિકતા મળી ગઈ છે. બેલ્જિયમના વિદેશ મંત્રાલયે ચોક્સીની હાજરી અંગે ભારતને જાણ કરી હતી. સૂત્રોના જણાવ્યા અનુસાર, મેહુલ ચોક્સી બેલ્જિયમથી સ્વિટ્ઝર્લૅન્ડ ભાગી જવાનો પ્રયાસ કરી રહ્યો હતો. ચોક્સીની ધરપકડ કરતી વખતે, પોલીસે બે ધરપકડ વોરંટનો ઉલ્લેખ કર્યો હતો. આ વોરંટ મુંબઈની એક કોર્ટે જાહેર કર્યા હતા. આ વોરંટ 23 મે 2018 અને 15 જૂન 2021 ના રોજ જારી કરવામાં આવ્યા હતા.
ચોક્સીએ 15 નવેમ્બર, 2023ના રોજ બેલ્જિયમનું ‘એફ રેસીડેન્સી કાર્ડ’ મેળવ્યું હતું, જે કથિત રીતે તેની બેલ્જિયન નાગરિક પત્નીની મદદથી મેળવવામાં આવ્યું હતું. અહેવાલોમાં દાવો કરવામાં આવ્યો છે કે ચોક્સીએ બેલ્જિયમના અધિકારીઓને નકલી દસ્તાવેજો સબમિટ કર્યા હતા. તેણે પોતાની ભારતીય અને એન્ટિગુઆ નાગરિકતા છુપાવી હતી અને ખોટી માહિતી આપી હતી જેથી તેને ભારત દેશનિકાલ ન કરી શકાય.
2018માં ભારત છોડતા પહેલા, ચોક્સીએ 2017માં જ એન્ટિગુઆ-બાર્બુડાનું નાગરિકત્વ લીધું હતું. ચોક્સીએ વારંવાર ખરાબ સ્વાસ્થ્યનું કારણ આપીને ભારતમાં હાજર થવાનો ઇનકાર કર્યો હતો. ક્યારેક તે વીડિયો કોન્ફરન્સિંગ દ્વારા હાજર થતો હતો. ભારતમાં તેની ઘણી મિલકતો પણ જપ્ત કરવામાં આવી છે.
મે 2021 માં ચોક્સી એન્ટિગુઆથી પડોશી દેશ ડોમિનિકા પહોંચ્યો હતો. અહીં તેની ધરપકડ કરવામાં આવી હતી. સીબીઆઈની એક ટીમ તેનું પ્રત્યાર્પણ કરાવવા માટે ડોમિનિકા પહોંચી હતી, પરંતુ તે પહેલાં તેને બ્રિટિશ રાણીની પ્રિવી કાઉન્સિલ તરફથી રાહત મળી ગઈ હતી. બાદમાં તેને ફરીથી એન્ટિગુઆ સોંપવામાં આવ્યો હતો. જોકે, મેહુલ ચોક્સીને ડોમિનિકાની જેલમાં 51 દિવસ વિતાવવા પડ્યા. અહીં તેણે દલીલ કરી કે તે એન્ટિગુઆ જવા માંગે છે અને ત્યાં ન્યુરોલોજીસ્ટ પાસેથી સારવાર કરાવવા માંગે છે. એન્ટિગુઆ પહોંચ્યાના થોડા દિવસો પછી, ડોમિનિકા કોર્ટે ચોક્સી સામે નોંધાયેલા કેસોને પણ ફગાવી દીધા.