પાકિસ્તાનમાં સક્રિય વિદ્રોહી સંગઠન બલૂચ લિબરેશન આર્મી અને તેની મજીદ બ્રિગેડને સંયુક્ત રાષ્ટ્રની પાબંદી સૂચિ 1267માં સામેલ કરવાના પ્રસ્તાવ પર અમેરિકાએ વીટો લગાવી દીધો. આ ઉપરાંત, બ્રિટન અને ફ્રાન્સ જેવા દેશોએ પણ આ પ્રસ્તાવનો વિરોધ કર્યો, જેના કારણે આ પ્રસ્તાવ રદ થઈ ગયો. વાસ્તવમાં, સંયુક્ત રાષ્ટ્રની પ્રતિબંધ સમિતિ 1267 હેઠળ એવી જોગવાઈ છે કે જે આતંકી સંગઠનોનો અલ-કાયદા અને ઇસ્લામિક સ્ટેટ સાથે સંબંધ હોય, તેના પર પ્રતિબંધ મૂકવામાં આવે. આવા સંગઠનોની સંપત્તિ દુનિયાભરમાં જપ્ત કરી શકાય છે. આ મુદ્દે અમેરિકા, ફ્રાન્સ અને બ્રિટને જણાવ્યું કે બલૂચ લિબરેશન આર્મી અને તેની આત્મઘાતી ટુકડી મજીદ બ્રિગેડનો અલ-કાયદા કે ઇસ્લામિક સ્ટેટ સાથે કોઈ સંબંધ નથી, તેથી તેમને આ યાદીમાં સામેલ કરી શકાય નહીં.