અમેરિકન રાષ્ટ્રપતિ ટ્રમ્પની ધમકીના છ કલાક પછી હમાસે ગાઝામાં યુદ્ધવિરામ માટે સંમતિ આપી છે. હમાસે શુક્રવારે રાત્રે જાહેરાત કરી હતી કે તે ટ્રમ્પની યોજનામાં દર્શાવેલા તમામ કેદીઓને (જીવંત કે મૃત) મુક્ત કરવા અને ગાઝા પરનો કબજો છોડવા તૈયાર છે. હમાસે એમ પણ કહ્યું હતું કે આ અઠવાડિયે રજૂ કરાયેલા રાષ્ટ્રપતિ ટ્રમ્પના 20-મુદ્દાના શાંતિ કરારના કેટલાક ભાગો પર વાટાઘાટો જરૂરી છે. અલ જઝીરા અનુસાર, હમાસના પ્રતિભાવમાં શસ્ત્રો છોડવાનો ઉલ્લેખ નહોતો. હમાસની જાહેરાત બાદ ટ્રમ્પે ઇઝરાયલને ગાઝામાં તાત્કાલિક હુમલા બંધ કરવા હાકલ કરી હતી. ઇઝરાયલે હજુ સુધી કોઈ પ્રતિક્રિયા આપી નથી. નેતન્યાહુ સાથે મુલાકાત બાદ ટ્રમ્પે કહ્યું હતું કે જો હમાસ આ યોજના સાથે સંમત ન થાય તો ઇઝરાયલને તેને ખતમ કરવાનો સંપૂર્ણ અધિકાર છે અને અમેરિકા આમાં તેનું સમર્થન કરશે. દરમિયાન નેતન્યાહુએ જણાવ્યું હતું કે ગાઝા એક શાંતિપૂર્ણ વહીવટ હશે, જેમાં હમાસના બધાં શસ્ત્રો દૂર કરવામાં આવશે અને ઇઝરાયલ ધીમે ધીમે ગાઝામાંથી પાછું હટી જશે.
રાષ્ટ્રપતિ ટ્રમ્પે હમાસને તેમના શાંતિ પ્રસ્તાવ પર સંમત થવા માટે ત્રણથી ચાર દિવસનો સમય આપ્યો. વ્હાઇટ હાઉસ છોડતી વખતે તેમણે કહ્યું હતું કે ઇઝરાયલ અને ઘણા આરબ દેશો આ યોજના પર સંમત છે, પરંતુ હમાસે હજુ સુધી કોઈ જવાબ આપ્યો નથી. ટ્રમ્પે ચેતવણી આપી હતી કે જો હમાસ હા કહે તો સારું રહેશે, નહીં તો ભયાનક બનશે. તેમણે કહ્યું હતું કે યોજનામાં બહુ ફેરફાર થશે નહીં.