અમેરિકી રાષ્ટ્રપતિ ડોનાલ્ડ ટ્રમ્પે ગ્રીનલેન્ડ પર કબજો કરવા માટે યોજના બનાવવાનો નિર્દેશ આપ્યો છે. ડેઇલી મેલ અનુસાર, ટ્રમ્પે જોઇન્ટ સ્પેશિયલ ઓપરેશન્સ કમાન્ડ (JSOC)ને આ જવાબદારી સોંપી છે. જોકે, સૈન્ય અધિકારીઓ આ વિચાર સાથે સહમત જણાતા નથી. તેઓ તેને કાયદેસર રીતે ખોટું માને છે.રિપોર્ટમાં કહેવામાં આવ્યું છે કે ટ્રમ્પની આ રુચિ ઘરેલું રાજકારણ સાથે પણ જોડાયેલી હોઈ શકે છે. આ વર્ષના અંતમાં મિડ-ટર્મ ચૂંટણીઓ થવાની છે અને રિપબ્લિકન સંસદ પર નિયંત્રણ ગુમાવવાથી ડરી રહ્યા છે. તેથી ટ્રમ્પ કોઈ મોટું પગલું ભરીને લોકોનું અર્થતંત્રની સમસ્યાઓ પરથી ધ્યાન હટાવવા માંગે છે.ડેઇલી મેલને એક રાજદ્વારી સૂત્રએ જણાવ્યું કે, ‘જનરલોને લાગે છે કે ટ્રમ્પની ગ્રીનલેન્ડ યોજના વાહિયાત અને ગેરકાનૂની છે. તેમનું કહેવું છે કે રાષ્ટ્રપતિની જીદ પાંચ વર્ષના બાળક સાથે વ્યવહાર કરવા જેવી છે.’
અમેરિકા જો ગ્રીનલેન્ડ પર હુમલો કરશે તો તેનાથી NATO માટે ગંભીર સંકટ ઊભું થઈ શકે છે. સાથે જ યુરોપિયન નેતાઓ સાથે સીધો સંઘર્ષ થઈ શકે છે, જેનાથી NATO ગઠબંધન તૂટવાની અણી પર પહોંચી શકે છે.કેટલાક યુરોપિયન અધિકારીઓનું માનવું છે કે ટ્રમ્પની આસપાસના કટ્ટરપંથી MAGA જૂથનો અસલી હેતુ NATO ને અંદરથી ખતમ કરવાનો છે, કારણ કે સંસદ તેમને NATOમાંથી બહાર નીકળવાની મંજૂરી આપશે નહીં. તેથી ગ્રીનલેન્ડ પર કબજો કરીને યુરોપિયન દેશોને NATO છોડવા માટે મજબૂર કરી શકાય છે. રિપોર્ટમાં કહેવામાં આવ્યું છે કે જો ટ્રમ્પ NATOને ખતમ કરવા માંગે છે, તો આ કદાચ સૌથી સરળ રીત હોઈ શકે છે.’ મીડિયા રિપોર્ટ્સ અનુસાર, ટ્રમ્પ લાંબા સમયથી NATOને અયોગ્ય માને છે. તેમનું માનવું છે કે અમેરિકા તેમાં સૌથી વધુ પૈસા અને સંસાધનો ખર્ચ કરે છે, જ્યારે યુરોપિયન દેશો તેમના GDPના 2% સંરક્ષણ પર ખર્ચ કરવાના લક્ષ્યને પૂર્ણ કરતા નથી.
તેમના પ્રથમ કાર્યકાળમાં, તેમણે NATO સહયોગીઓ પાસેથી ચુકવણી વધારવાની માંગ કરી અને કહ્યું કે જો તેઓ નહીં માને તો અમેરિકા તેમનું રક્ષણ કરશે નહીં. 2024ની ચૂંટણી પ્રચારમાં, ટ્રમ્પે કહ્યું કે તેઓ રશિયાને તે NATO સભ્યો પર જે ઈચ્છે તે કરવાની મંજૂરી આપશે જેઓ પૂરતો ખર્ચ કરતા નથી. ટ્રમ્પનો હેતુ “અમેરિકા ફર્સ્ટ” નીતિને પ્રોત્સાહન આપવાનો છે. જેમાં તેઓ અમેરિકન કરદાતાઓના પૈસાને વિદેશી સુરક્ષા પર ઓછો ખર્ચ કરવા માંગે છે. સાથે જ યુરોપને પોતાનું રક્ષણ જાતે કરવા માટે મજબૂર કરવા માંગે છે. કેટલાક વિશ્લેષકો માને છે કે ટ્રમ્પ NATOને નબળું પાડીને રશિયા સાથે સારા સંબંધો બાંધવા માંગે છે. ટ્રમ્પના ભૂતપૂર્વ રાષ્ટ્રીય સુરક્ષા સલાહકાર જ્હોન બોલ્ટને કહ્યું હતું કે તેઓ NATOમાંથી અમેરિકાને બહાર કાઢવાનો પ્રયાસ કરશે. તેઓ તેને જૂનું અને અમેરિકા માટે બોજ માને છે.
જોકે, ઘણા નિષ્ણાતો ચેતવણી આપે છે કે આનાથી અમેરિકા અલગ પડી શકે છે. યુરોપ રશિયાના પ્રભાવ હેઠળ આવી શકે છે અને વૈશ્વિક સુરક્ષા નબળી પડી શકે છે. આ પહેલા ટ્રમ્પે શુક્રવારે જણાવ્યું હતું કે અમેરિકા માટે ગ્રીનલેન્ડ પર કબજો કરવો શા માટે જરૂરી છે. તેમણે વ્હાઇટ હાઉસમાં તેલ અને ગેસ કંપનીઓના મોટા અધિકારીઓ સાથે થયેલી એક બેઠક દરમિયાન કહ્યું કે જો અમેરિકાએ આવું ન કર્યું તો રશિયા અને ચીન જેવા દેશો તેના પર કબજો કરી લેશે. ટ્રમ્પે એ પણ કહ્યું કે ગ્રીનલેન્ડને હાસલ કરવું જમીન ખરીદવાનો મામલો નથી, આ રશિયા અને ચીનને દૂર રાખવા સાથે જોડાયેલું છે. આપણે આવા દેશોને આપણા પાડોશી બનતા જોઈ શકતા નથી.