લોકસભા ચૂંટણીના છેલ્લા તબક્કામાં શનિવારે સાત રાજ્યો અને એક કેન્દ્રશાસિત પ્રદેશની 57 બેઠકો પર મતદાન થઈ રહ્યું છે. જેમાં વડાપ્રધાન નરેન્દ્ર મોદીની વારાણસી સીટ પણ સામેલ છે. આજે જે બેઠકો પર મતદાન થઈ રહ્યું છે તેમાં પંજાબ અને યુપીની 13-13 બેઠકો, પશ્ચિમ બંગાળમાં 9 બેઠકો, બિહારની 8 બેઠકો, ઓડિશાની 6 બેઠકો, હિમાચલ પ્રદેશની 4 બેઠકો, ઝારખંડની 3 બેઠકો અને ચંદીગઢની એક બેઠકનો સમાવેશ થાય છે .
સાતમા તબક્કાના મતદાનની શરૂઆતના થોડા સમય પછી પશ્ચિમ બંગાળના દક્ષિણ 24 પરગણાના કુલતાઈમાં બૂથ નંબર 40, 41 પર ભીડ દ્વારા EVM અને VVPAT મશીનોને પાણીમાં ફેંકી દીધાના અહેવાલ મળ્યા છે. જયારે પણ બંગાળમાં ચૂંટણી હોય છે ત્યારે પ.બંગાળમાં વિવાદ સર્જાયેલો જોવા મળે છે. ક્યારેક મારામાંરી તો ક્યારેક ધમકીના બનાવો તો આ અંતિમ તબક્કામાં EVM મશીન પાણીમાં ફેંકી દેવાયાના સમાચાર સામે આવ્યા છે. સ્થાનિક લોકોએ કહ્યું હતું કે ટીએમસી સમર્થકો દ્વારા મતદારોને ધમકી આપવામાં આવી હતી. જેના કારણે ભીડ ઉશ્કેરાઈ ગઈ હતી અને ઈવીએમને તળાવમાં ફેંકી દીધા હતા. છેલ્લા તબક્કામાં પશ્ચિમ બંગાળની 9 બેઠકો પર મતદાન થઈ રહ્યું છે.
આ વખતે પશ્ચિમ બંગાળે મતદાનની બાબતમાં ખૂબ સારું પ્રદર્શન કર્યું છે. પણ પહેલા તબક્કાથી જ પશ્ચિમ બંગાળમાંથી હિંસાના અહેવાલો આવી રહ્યા છે. પ્રથમ તબક્કાના મતદાનના દિવસે જ તૃણમૂલ કોંગ્રેસે દાવો કર્યો હતો કે અલીપુરદ્વાર તુફનગંજ-2 બ્લોકમાં બારોકોદલી-1 ગ્રામ પંચાયતના હરિરહાટ વિસ્તારમાં TMCની અસ્થાયી પાર્ટી કાર્યાલયને બીજેપી સમર્થકોએ આગ લગાવી દીધી હતી.
આ તબક્કામાં મોટા દિગ્ગજ નેતાઓનું ભવિષ્ય નક્કી થવાનું છે. આ તબક્કામાં કેન્દ્રીય મંત્રી અનુરાગ ઠાકુર હમીરપુરથી, મમતા બેનર્જીના ભત્રીજા અભિષેક બેનર્જી ડાયમંડ હાર્બરથી, લાલુ પ્રસાદની દીકરી મીસા ભારતી પાટલીપુત્રથી અને અભિનેત્રી કંગના રનૌત મંડી સીટથી ચૂંટણી લડી રહ્યા છે.