પેન્ના સિમેન્ટની ખરીદી કરીને અદાણી ગ્રુપ દક્ષિણ ભારતમાં તેની સ્થિતિ મજબૂત કરશે

ગૌતમ અદાણીની આગેવાની હેઠળનું અદાણી ગ્રુપ ટૂંક સમયમાં તેના સિમેન્ટ બિઝનેસને મર્જ કરવા જઈ રહ્યું છે. અદાણી ગ્રુપે તાજેતરના ભૂતકાળમાં એક પછી એક દેશની ઘણી મોટી સિમેન્ટ કંપનીઓ ખરીદી છે. જેમાં ACC, અંબુજા સિમેન્ટ અને પેન્ના સિમેન્ટનો સમાવેશ થાય છે. હવે આ તમામ કંપનીઓને એક જ કંપનીની છત્રછાયા હેઠળ લાવવામાં આવશે. અદાણી ગ્રુપ આ કંપનીઓના વિલીનીકરણને વહેલી તકે પૂર્ણ કરવાનો પ્રયાસ કરી રહ્યું છે.

એક અહેવાલ મુજબ, અદાણી ગ્રુપે સપ્ટેમ્બર 2022માં ACC અને અંબુજા સિમેન્ટને લગભગ $6.4 બિલિયનમાં ખરીદી હતી. આ કંપનીઓને ખરીદીને, અદાણી ગ્રુપ અલ્ટ્રાટેક સિમેન્ટ પછી દેશની બીજી સૌથી મોટી સિમેન્ટ કંપની બની. અદાણી મેનેજમેન્ટ માને છે કે મર્જરના ખર્ચને કારણે કોઈ સમસ્યા નહીં થાય. જો કે, લઘુમતી અને બહુમતી શેરધારકોના હિતોને ધ્યાનમાં લઈને મર્જરની કામગીરી આગળ વધારવામાં આવશે.

અદાણી ગ્રૂપે ગયા વર્ષે ડિસેમ્બરમાં સાંઘી ઇન્ડસ્ટ્રીઝને રૂ. 5,185 કરોડમાં ખરીદી હતી. આ સંપાદન માટે નાણાં આંતરિક સ્ત્રોતોમાંથી એકત્ર કરવામાં આવ્યા હતા. આ મહિનાની શરૂઆતમાં, કંપનીએ હૈદરાબાદ સ્થિત પેન્ના સિમેન્ટને રૂ. 10,420 કરોડમાં પણ ખરીદી હતી. આ સંપાદન સાથે, અદાણી જૂથની સિમેન્ટ ઉત્પાદન ક્ષમતા વધીને 89 MTPA થઈ ગઈ છે. કંપનીએ વર્ષ 2028 સુધીમાં સિમેન્ટ ઉત્પાદન ક્ષમતા વધારીને 140 એમટીપીએ કરવાનું લક્ષ્‍ય રાખ્યું છે. હાલમાં, આદિત્ય બિરલા ગ્રુપની અલ્ટ્રાટેક સિમેન્ટ 152.7 એમટીપીએની ક્ષમતા સાથે દેશની સૌથી મોટી સિમેન્ટ કંપની છે.

જેફ્રીઝે કહ્યું છે કે પેન્ના સિમેન્ટની ખરીદી કરીને અદાણી ગ્રુપ દક્ષિણ ભારતમાં તેની સ્થિતિ મજબૂત કરશે. ઉપરાંત, અદાણી સિમેન્ટના દરિયાઈ પરિવહનના લોજિસ્ટિક્સને મજબૂત બનાવવામાં આવશે. તેના કોલકાતા, ગોપાલપુર, કરાઈકલ, કોચી અને કોલંબોમાં પાંચ બલ્ક સિમેન્ટ ટર્મિનલ હશે. બીજી તરફ અંબુજા સિમેન્ટની નાણાકીય કામગીરી પણ સુધરી રહી છે. કંપનીના શેરમાં આ વર્ષે 22 ટકાનો ઉછાળો આવ્યો છે.