આધુનિક વિકાસના યુગમાં ગગનચુંબી ઇમારતો એક ખાસ ઓળખ ધરાવે છે. તેથી જ આની ઉજવણી કરવા માટે દર વર્ષે 3 સપ્ટેમ્બરે આંતરરાષ્ટ્રીય ગગનચુંબી દિવસ ઉજવવામાં આવે છે. ગુજરાત ગગનચુંબી ઇમારતોના નિર્માણ તરફ ઝડપથી આગળ વધી રહ્યું છે. અમે તમને અહીં જણાવી દઈએ કે તેની વિશેષ ગગનચુંબી નીતિને કારણે, ગુજરાત છેલ્લાં કેટલાંક વર્ષોમાં ગગનચુંબી ઇમારતોમાંથી રૂ.1000 કરોડની આવક મેળવવામાં સફળ રહ્યું છે.
2017 સુધી ગુજરાતમાં ઈમારતોની મહત્તમ ઊંચાઈ 70 મીટર નક્કી કરવામાં આવી હતી. શહેરી વિસ્તરણની જરૂરિયાત અને ઊભી વૃદ્ધિની સંભાવનાને ઓળખીને, રાજ્ય સરકારે નિયમોમાં સુધારો કરીને આ દિશામાં પ્રગતિશીલ પગલાં લીધાં છે. રાજ્ય સરકારની સ્કાયસ્ક્રેપર પોલિસીના અમલ બાદ 100 મીટરથી વધુ ઉંચી ઈમારતોના નિર્માણને પ્રોત્સાહન આપવામાં આવ્યું છે. 27 મે, 2021 ના રોજ અમલમાં આવેલી સ્કાયસ્ક્રેપર પોલિસીએ અમદાવાદ, સુરત, રાજકોટ, વડોદરા અને ગાંધીનગર જેવા મોટા શહેરોમાં ગગનચુંબી ઇમારતોના વિકાસ માટે માર્ગ મોકળો કર્યો છે.