ભારતીય કોન્સ્યુલેટે મંગળવારે જણાવ્યું હતું કે, ન્યુ યોર્કમાં એક જીવલેણ માર્ગ અકસ્માતમાં ક્લેવલેન્ડ સ્ટેટ યુનિવર્સિટીના બે ભારતીય વિદ્યાર્થીઓના મોત થયા છે. પીટીઆઈના અહેવાલ મુજબ, વિદ્યાર્થીઓની ઓળખ માનવ પટેલ (20) અને સૌરવ પ્રભાકર (23) તરીકે થઈ છે. લેન્કેસ્ટર કાઉન્ટી કોરોનર ઓફિસ અનુસાર, 10 મેના રોજ પૂર્વ કોકાલિકો ટાઉનશીપમાં થયેલા અકસ્માત સમયે પ્રભાકર કાર ચલાવી રહ્યો હતો. પ્રભાકર અને પટેલનું ઘટનાસ્થળે જ મોત નીપજ્યું હતું, જ્યારે આગળની સીટ પર બેઠેલા અન્ય એક મુસાફરને ઇજા પહોંચી હતી અને તેને તાત્કાલિક સ્થાનિક હોસ્પિટલમાં ખસેડવામાં આવ્યો હતો. અકસ્માતનું ચોક્કસ કારણ હજુ સુધી જાણી શકાયું નથી, પરંતુ સીસીટીવી ફૂટેજ દર્શાવે છે કે વાહન રસ્તા પરથી ઉતરી ગયું, એક ઝાડ સાથે અથડાયું અને પછી પુલ સાથે અથડાયું.
ન્યુયોર્કમાં ભારતના કોન્સ્યુલેટ જનરલે ક્લેવલેન્ડ સ્ટેટ યુનિવર્સિટીમાં બે ભારતીય વિદ્યાર્થીઓના દુ:ખદ મૃત્યુ પર “ઊંડો શોક” વ્યક્ત કર્યો છે. X પર એક નિવેદનમાં, કોન્સ્યુલેટે જણાવ્યું હતું કે તે વિદ્યાર્થીઓના પરિવારો સાથે સંપર્કમાં છે અને શક્ય તમામ સહાય પૂરી પાડી રહ્યું છે. કોન્સ્યુલેટે X (અગાઉ ટ્વિટર) પર લખ્યું, “ક્લીવલેન્ડ સ્ટેટ યુનિવર્સિટીના બે ભારતીય વિદ્યાર્થીઓ, માનવ પટેલ અને સૌરવ પ્રભાકરના મૃત્યુ પામેલા દુર્ભાગ્યપૂર્ણ માર્ગ અકસ્માત વિશે જાણીને ખૂબ દુઃખ થયું,” નિવેદનમાં કહેવામાં આવ્યું છે કે “આ મુશ્કેલ સમયમાં અમારી સંવેદના અને પ્રાર્થના તેમના પરિવારો સાથે છે. કોન્સ્યુલેટ પરિવારો સાથે સંપર્કમાં છે અને તેમને શક્ય તમામ સહાયની ખાતરી આપી છે,” કોરોનરના રિપોર્ટ (જે મૃત્યુનું કારણ અને રીતની તપાસ કરે છે) માં જણાવાયું છે કે બંને વિદ્યાર્થીઓના મૃત્યુ અનેક ઇજાઓથી થયા છે. રિપોર્ટમાં કહેવામાં આવ્યું છે કે મૃત્યુ આકસ્મિક હતા.