તેહરાન, 16 જૂન 2025: ઈરાન અને ઈઝરાયલ વચ્ચે તણાવ સતત વધી રહ્યો છે. બંને દેશો એકબીજા પર મિસાઈલ છોડી રહ્યા છે. આ દરમિયાન, ઈરાને ઈઝરાયલને પરમાણુ બોમ્બની ધમકી આપી છે. હા, ઈરાન કહે છે કે જો ઈઝરાયલ ઈરાન પર પરમાણુ હુમલો કરશે, તો પાકિસ્તાન પણ ઈઝરાયલ પર પરમાણુ હુમલો કરશે.
ઈસ્લામિક રિવોલ્યુશનરી ગાર્ડ કોર્પ્સ (IRGC) ના વરિષ્ઠ જનરલ અને ઈરાની રાષ્ટ્રીય સુરક્ષા પરિષદના સભ્ય મોહસેન રેઝાઈએ ઈઝરાયલને ખુલ્લેઆમ આ ધમકી આપી છે.
હકીકતમાં જોઈએ તો, જનરલ મોહસેન રેઝાઈ એક ટીવી શોમાં આવ્યા હતા. આ દરમિયાન તેમણે કેમેરા સામે દાવો કર્યો હતો કે જો આ તણાવ વચ્ચે ઇઝરાયલ ઇરાન પર પરમાણુ હુમલો કરવાનું વિચારે છે, તો પાકિસ્તાન બદલો લઈ શકે છે.
રેઝાઈએ શું કહ્યું?
તુર્કી ટુડેના અહેવાલ મુજબ, મોહસેન રેઝાઈએ કહ્યું, “ઇઝરાયલ કંઈ કરી શકશે નહીં. જો ઇઝરાયલ ક્યારેય ઇરાન પર પરમાણુ હુમલો કરશે, તો પાકિસ્તાને અમને કહ્યું છે કે તેઓ ઇઝરાયલ પર પણ પરમાણુ શસ્ત્રોનો ઉપયોગ કરશે.”
પાકિસ્તાને કોઈ પ્રતિક્રિયા આપી નથી
અહીં ઉલ્લેખનિય છે કે, પાકિસ્તાને પહેલાથી જ ઇઝરાયલ વિરુદ્ધ મુસ્લિમ એકતાનું આહ્વાન કર્યું છે. પાકિસ્તાને ઇઝરાયલ સાથેના તણાવમાં ઇરાનને ટેકો આપવાનું વચન આપ્યું છે. જોકે, રેઝાઈના આ દાવાઓમાં કેટલી સત્યતા છે? પાકિસ્તાન દ્વારા આ વાતની પુષ્ટિ કરવામાં આવી નથી. રેઝાઈના નિવેદન પર પાકિસ્તાને કોઈ પ્રતિક્રિયા આપી નથી.
ઇઝરાયલનો પ્લાન નિષ્ફળ ગયો
એક અમેરિકન અધિકારી પાસેથી મળેલી માહિતી અનુસાર, ઇઝરાયલે ઈરાનના સુપ્રીમ લીડર આયાતુલ્લાહ અલી ખામેનીને મારવાની યોજના બનાવી હતી, જેને યુએસ રાષ્ટ્ર પ્રમુખ ડોનાલ્ડ ટ્રમ્પે વીટો કરી દીધી છે. તે જ સમયે, ઇઝરાયલી વડા પ્રધાન બેન્જામિન નેતન્યાહૂએ પણ આ અહેવાલો પર મૌન ધારણ કર્યું છે.