સોમવારે બેઇજિંગમાં વિદેશ મંત્રી એસ જયશંકરે ચીનના ઉપરાષ્ટ્રપતિ હાન ઝેંગ સાથે મુલાકાત કરી હતી. આ દરમિયાન તેમણે ભારત-ચીન સંબંધોમાં હાલના સુધારાનો ઉલ્લેખ કર્યો હતો. બંને નેતાઓ વચ્ચેની દ્વિપક્ષીય બેઠકમાં, જયશંકરે કહ્યું,”ઓક્ટોબર 2023માં કઝાનમાં પીએમ નરેન્દ્ર મોદી અને રાષ્ટ્રપતિ શી જિનપિંગની મુલાકાત પછી ભારત-ચીન સંબંધોમાં સતત સુધારો થઈ રહ્યો છે. બંને દેશોએ રાજદ્વારી સંબંધોના 75 વર્ષ પૂર્ણ કર્યા છે”. જયશંકરે વર્તમાન આંતરરાષ્ટ્રીય પરિસ્થિતિને જટિલ ગણાવી અને કહ્યું કે ભારત અને ચીન જેવા મોટા પડોશી દેશો વચ્ચે વાતચીત ખૂબ જ મહત્વપૂર્ણ છે. તેમણે ચીનના ઉપરાષ્ટ્રપતિને જણાવ્યું કે ભારતમાં કૈલાશ માનસરોવર યાત્રા ફરી શરૂ થવાની ખૂબ પ્રશંસા થઈ છે.
પાંચ વર્ષમાં જયશંકરની આ પહેલી ચીન મુલાકાત છે. સિંગાપોરની મુલાકાત બાદ તેઓ બેઇજિંગ પહોંચ્યા છે. જયશંકર 15 જુલાઈના રોજ તિયાનજિનમાં યોજાનારી SCO વિદેશ મંત્રીઓની બેઠકમાં પણ હાજરી આપશે. આ દરમિયાન, તેઓ ચીનના વિદેશ મંત્રી વાંગ યીને પણ મળવાના છે. ફેબ્રુઆરીની શરૂઆતમાં, જયશંકર અને વાંગ યીએ જોહાનિસબર્ગમાં G20 બેઠક દરમિયાન મુલાકાત કરી હતી. જ્યાં બંને નેતાઓએ સહયોગ વધારવા વિશે વાત કરી હતી. જૂન 2020માં, ગલવાન ઘાટીમાં ભારતીય અને ચીનના સૈનિકો વચ્ચે થયેલી અથડામણમાં બંને દેશના સૈનિકો માર્યા ગયા હતા. આ કારણે, બંને દેશો વચ્ચેના સંબંધો ખૂબ જ તણાવપૂર્ણ બન્યા હતા. ત્યારથી, આ વર્ષ સુધી ભારતના કોઈપણ ટોપ નેતાએ ચીનની મુલાકાત લીધી નથી.
ગયા મહિને, શાંઘાઈ કોઓપરેશન ઓર્ગેનાઈઝેશન (SCO)ના રક્ષા મંત્રીઓની એક બેઠક ચીનના કિંગદાઓમાં યોજાઈ હતી. ભારતના રક્ષા મંત્રી રાજનાથ સિંહે તેમાં હાજરી આપી હતી. આ દરમિયાન, રાજનાથ સિંહે SCO સંયુક્ત નિવેદન પર હસ્તાક્ષર કરવાનો ઇનકાર કર્યો હતો કારણ કે તેમાં જમ્મુ અને કાશ્મીરના પહેલગામમાં થયેલા આતંકવાદી હુમલાનો સમાવેશ કરવામાં આવ્યો ન હતો, જ્યારે પાકિસ્તાનના બલુચિસ્તાનમાં થયેલી આતંકવાદી ઘટનાનો ઉલ્લેખ કરવામાં આવ્યો હતો. ભારતે આ અંગે નારાજગી વ્યક્ત કરી હતી. રાજનાથ સિંહે બેઠકમાં કહ્યું, ‘કેટલાક દેશો સરહદ પારના આતંકવાદને પોતાની નીતિ માને છે. તેઓ આતંકવાદીઓને આશ્રય આપે છે. પછી તેઓ તેનો ઇનકાર કરે છે. આવા બેવડા ધોરણો માટે કોઈ સ્થાન હોવું જોઈએ નહીં. તેમણે સમજવું પડશે કે હવે આતંકવાદના એપીસેન્ટર સુરક્ષિત નથી.’