આણંદ: આણંદ-વડોદરાને જોડતા ગંભીરા બ્રિજ દુર્ઘટનાને 13 દિવસ વીતી ગયા હોવા છતાં, બ્રિજ પર લટકી રહેલા ટેન્કરને લઈને માલિક પરેશાન હતો. જોકે, હવે આ મામલે એક મહત્વનો નિર્ણય લેવામાં આવ્યો છે, જેનાથી ટેન્કર માલિકે રાહતનો શ્વાસ લીધો છે. આણંદ કલેક્ટરે લટકી રહેલા ટેન્કરનો વીમો પાસ કરાવવાની સૂચના આપી છે, અને ટેન્કરની લોનના હપ્તાની મુદ્દત વધારવાની પણ ટકોર કરી છે.
આણંદ કલેક્ટરની કામગીરીથી ટેન્કરચાલકે રાહતનો શ્વાસ લીધો છે. છેલ્લા 13 દિવસથી લટકી રહેલા ટેન્કરને લઈ માલિક વડોદરા અને આણંદની કચેરીઓમાં ધક્કા ખાઈ રહ્યો હતો. 40 લાખની લોન પર લીધેલા ટેન્કરનો 85 હજાર રૂપિયાનો હપ્તો આવે છે.
હવે ટેન્કર ઉતારવાની કામગીરીની કમાન ગાંધીનગરથી સંભાળવામાં આવી છે. ગાંધીનગરથી 3 ટેકનિકલ એક્સપર્ટની ટીમે આવીને વીડિયોગ્રાફી કરી છે. બ્રિજ પરથી ટેન્કર કાઢવા જતાં બ્રિજ ફરી તૂટવાનો ભય રહેલો છે, તેથી આ મામલે અત્યંત સાવચેતી રાખવામાં આવી રહી છે. બ્રિજ પર મશીન મૂકીને ટેન્કર હટાવવા અંગે 2 દિવસમાં નિર્ણય લેવામાં આવશે.
આણંદ-વડોદરાને જોડતો મહીસાગર નદી પરનો ગંભીરા પુલ ગત રોજ વહેલી સવારે તૂટી પડ્યો હતો. આ દુર્ઘટનામાં 21 લોકોના દુઃખદ મોત થયા હતા, જ્યારે 8થી વધુ લોકોને સમયસર બચાવી લેવામાં આવ્યા હતા. આ ઘટના બનતાની સાથે જ મુજપુર અને આસપાસના ગામોના લોકો ટોળેટોળા કરીને ઘટનાસ્થળે પહોંચી ગયા હતા અને કેટલાક લોકોએ પોતાની જાતે પણ બચાવ કામગીરીમાં ભાગ લીધો હતો.
મોરબી દુર્ઘટના બાદ થયેલી ચકાસણીમાં ગંભીરા બ્રિજ જર્જરિત હોવાનું ખુલ્યું હતું. આ દુર્ઘટનાના એક અઠવાડિયામાં જ નવા બ્રિજની પ્રક્રિયા શરૂ કરવામાં આવી છે. માર્ગ-મકાન વિભાગે 191 કરોડનો અંદાજ મૂકીને 2 લેન બ્રિજ બનાવવા માટે ટેન્ડર બહાર પાડ્યું છે. સરકારે નવા બ્રિજ બનાવવા માટે 212 કરોડ રૂપિયા મંજૂર કર્યા છે.
બ્રિજ દુર્ઘટના બાદ સરકારે 6 લોકોની તપાસ કમિટી બનાવી છે. આ કમિટી બ્રિજ તૂટી પડવાના કારણો, ક્ષતિ અને બેદરકારી અંગે તપાસ કરશે. કમિટી ગંભીરા બ્રિજ અકસ્માતનો તાત્કાલિક પ્રાથમિક અહેવાલ રજૂ કરશે અને 30 દિવસમાં સંપૂર્ણ અહેવાલ સરકારને સોંપશે. ભવિષ્યમાં પણ અન્ય કોઈ બ્રિજ પડવાની દુર્ઘટના ન બને તે માટે પણ કમિટી સૂચનો આપશે. આ કમિટીમાં માર્ગ મકાનના અધિક સચિવ, મુખ્ય ઈજનેર અને અન્ય અધિકારીઓનો સમાવેશ કરવામાં આવ્યો છે.
આ દુર્ઘટના ખરેખર હૃદયદ્રાવક છે અને આશા રાખીએ કે ભવિષ્યમાં આવી ઘટનાઓ ન બને તે માટે તંત્ર દ્વારા યોગ્ય પગલાં લેવાય.