ઇઝરાયલે આજે પેલેસ્ટાઇનમાં મોટો હુમલો કર્યો છે. ગાઝામાં થયેલા આ હુમલામાં નાસિર મેડિકલ કોમ્પ્લેક્સને નિશાન બનાવવામાં આવ્યું છે. આ હુમલામાં 4 પત્રકારો સહિત કુલ 14 લોકો માર્યા ગયા છે. આ પત્રકારોમાંથી એક અલ જઝીરા સાથે સંકળાયેલો હોવાનું કહેવાય છે. કતારની ટીવી ચેનલે પણ આ વાતની પુષ્ટિ કરી છે. નાસિર હોસ્પિટલ દ્વારા જારી કરાયેલા નિવેદનમાં પણ આ માહિતી આપવામાં આવી છે. આ મુજબ આ હુમલામાં કુલ 14 લોકો માર્યા ગયા છે. જેમાં ઘણા પત્રકારોનો પણ સમાવેશ થાય છે. આ ઉપરાંત મોટી સંખ્યામાં લોકો ઘાયલ પણ થયા છે. માર્યા ગયેલા પત્રકારોમાં અલ જઝીરાના કેમેરામેન મોહમ્મદ સલામનો પણ સમાવેશ થાય છે. આ ઉપરાંત રોઇટર્સ માટે કામ કરતા હુસમ અલ-મસરીનો પણ સમાવેશ થાય છે. એપી સાથે સંકળાયેલા મરિયમ અબુ દગ્ગાનું પણ મૃત્યુ થયું છે. એટલું જ નહીં એક ફ્રીલાન્સ પત્રકારના પણ મોત થયાના સમાચાર છે. ગાઝાના નાગરિક સંરક્ષણ સંગઠનનું કહેવું છે કે આ હુમલામાં તેમના એક ક્રૂ મેમ્બરનું પણ મોત થયું છે. હોસ્પિટલ વહીવટીતંત્રનું કહેવું છે કે ઇઝરાયલના પહેલા હુમલામાં ચોથા માળને નિશાન બનાવવામાં આવ્યો હતો. તેના થોડા સમય પછી, બીજો હુમલો થયો. આમાં બીજા માળને નિશાન બનાવવામાં આવ્યો હતો. એટલું જ નહીં હુમલામાં એમ્બ્યુલન્સ અને ઇમરજન્સી સુવિધાઓને પણ નુકસાન થયું છે. ઇઝરાયલ દ્વારા કરવામાં આવેલા આ હુમલાની સમગ્ર વિશ્વમાં નિંદા થઈ રહી છે. થોડા દિવસો પહેલા ઇઝરાયલ દ્વારા આવો જ હુમલો કરવામાં આવ્યો હતો, જેમાં ઘણા પત્રકારો માર્યા ગયા હતા. તે જ સમયે, ઇઝરાયલે આરોપ લગાવ્યો હતો કે અલ જઝીરાના જે પત્રકારના મૃત્યુની વાત થઈ રહી છે. તે હમાસ માટે કામ કરતો હતો અને ત્યાંથી પગાર પણ લેતો હતો. હાલમાં, આ હુમલા અંગે ઇઝરાયલી સેના તરફથી કોઈ પ્રતિક્રિયા આવી નથી. ઇઝરાયલી હુમલા બાદ, હોસ્પિટલની આખી ઇમારતમાં ગભરાટ ફેલાઈ ગયો અને તે ધુમાડાથી ભરાઈ ગઈ.