અમેરિકામાં ટ્રમ્પ વિરુદ્ધ ભારે વિરોધ પ્રદર્શન: ‘ટ્રમ્પને હવે જવું પડશે’, લોકો રસ્તા પર ઉતર્યા, જાણો કેમ થઈ રહ્યો છે વિરોધ

અમેરિકાના રાષ્ટ્રપતિ ડોનાલ્ડ ટ્રમ્પને તેમના પોતાના દેશમાં જ મોટા વિરોધનો સામનો કરવો પડી રહ્યો છે. હાલમાં, શિકાગો, વોશિંગ્ટન D.C. અને સાન ફ્રાન્સિસ્કો જેવા શહેરોમાં લોકો તેમની નીતિઓના વિરોધમાં રસ્તા પર ઉતરી આવ્યા છે. આ પ્રદર્શનોનું મુખ્ય કારણ તેમની વિવાદાસ્પદ ટેરિફ નીતિઓ, ખાસ કરીને ભારત પર લાદવામાં આવેલી ઊંચી ટેરિફ, અને શહેરોમાં નેશનલ ગાર્ડ્સની તૈનાતી છે.

પ્રદર્શનકારીઓ “ટ્રમ્પને હવે જવું પડશે” અને “નો નેશનલ ગાર્ડ” જેવા નારા લગાવી રહ્યા છે.

અમેરિકાના રાષ્ટ્રપતિ ડોનાલ્ડ ટ્રમ્પ આ દિવસોમાં પોતાના નિર્ણયોને કારણે ભારે મુશ્કેલીમાં છે. મજૂર દિવસના અવસર પર, તેમના ટેરિફ અને નેશનલ ગાર્ડ્સની તૈનાતી જેવી નીતિઓના વિરોધમાં શિકાગો, વોશિંગ્ટન D.C. અને સાન ફ્રાન્સિસ્કો સહિત ઘણા શહેરોમાં લોકો રસ્તા પર ઉતરી આવ્યા. આ પ્રદર્શનકારીઓની મુખ્ય માંગણીઓમાં પોતાની મહેનત મુજબનો યોગ્ય પગાર આપવાની વાત સામેલ છે.

વિરોધ પ્રદર્શન દરમિયાન, વિરોધીઓએ “ટ્રમ્પને હવે જવું પડશે” જેવા સૂત્રોચ્ચાર કર્યા, જે તેમની નારાજગીનો સ્પષ્ટ સંકેત આપે છે. આ ઉપરાંત, ટ્રમ્પ ટાવરની બહાર પણ નેશનલ ગાર્ડ્સની તૈનાતીનો મુદ્દો ઉઠાવવામાં આવ્યો હતો. પ્રદર્શનકારીઓએ “નો નેશનલ ગાર્ડ” ના નારા લગાવ્યા, કારણ કે ટ્રમ્પે ગુનાઓ ઘટાડવા અને દેશને સુરક્ષિત બનાવવાના નામે ઘણા શહેરોમાં નેશનલ ગાર્ડ્સ તૈનાત કરવાનો આદેશ આપ્યો હતો.

વોશિંગ્ટન અને સાન ફ્રાન્સિસ્કોમાં હોબાળો

એક અહેવાલ મુજબ, આ વિરોધ પ્રદર્શનો દરમિયાન શિકાગોમાં એક રસપ્રદ ઘટના બની હતી. એક મહિલા પોતાની કારમાંથી ઉતરી અને પ્રદર્શનકારીઓ સામે “ડોનાલ્ડ ટ્રમ્પ ઝિંદાબાદ” ના નારા લગાવવા લાગી. આ જોઈને પ્રદર્શનકારીઓએ તેને ઘેરી લીધી અને બંને પક્ષો વચ્ચે થોડીવાર માટે ઘર્ષણ જેવી સ્થિતિ સર્જાઈ હતી, જોકે બાદમાં મહિલા ત્યાંથી ચાલી ગઈ હતી.

ટ્રમ્પની ટેરિફ નીતિનો પણ વિરોધ

નેશનલ ગાર્ડ ઉપરાંત, ટ્રમ્પની આંતરરાષ્ટ્રીય વેપાર નીતિઓ પણ વિવાદનું કારણ બની છે. ટ્રમ્પે ભારત સહિત અનેક દેશો પર ઊંચા ટેરિફ લાદ્યા છે. ભારત પર તો કુલ 50 ટકા ટેરિફ લાદવામાં આવ્યો છે, જેમાં 25 ટકાની વધારાની ડ્યુટીનો સમાવેશ થાય છે. આના કારણે અમેરિકા અને ભારત વચ્ચેના સંબંધોમાં તણાવ વધ્યો છે. ટ્રમ્પની આ ટેરિફ નીતિની તેમના પોતાના દેશમાં પણ આકરી ટીકા થઈ રહી છે. અમેરિકાના ભૂતપૂર્વ રાષ્ટ્રીય સુરક્ષા સલાહકાર જોન બોલ્ટને પણ આ નીતિને અયોગ્ય ગણાવી હતી અને કહ્યું હતું કે તેનાથી ભારત-અમેરિકાના સંબંધો પર પ્રતિકૂળ અસર પડશે.