ગુરુવારે યુકેના માન્ચેસ્ટરમાં એક સિનાગોગની બહાર થયેલા આતંકવાદી હુમલામાં બે યહૂદીઓ માર્યા ગયા હતા અને ત્રણ અન્ય ગંભીર રીતે ઘાયલ થયા હતા. મીડિયા રિપોર્ટ્સ અનુસાર, યોમ કિપ્પુર તહેવાર નિમિત્તે ક્રમ્પ્સોલ વિસ્તારમાં પ્રાર્થના માટે ઘણા યહૂદીઓ એકઠા થયા હતા ત્યારે હુમલાખોરે તેમની કાર તેમની વચ્ચે ધસી ગઈ અને પછી ગોળીબાર કર્યો. પોલીસે ઝડપથી કાર્યવાહી કરી અને હુમલાખોરનું એન્કાઉન્ટર કર્યુ, જેના પરિણામે તેનું મોત નીપજ્યું હતું. યોમ કિપ્પુર પર, યહૂદીઓ પ્રાર્થના કરે છે અને ભૂતકાળના ખોટા કાર્યો માટે માફી માંગે છે.
બ્રિટિશ વડા પ્રધાન કીર સ્ટાર્મરે આ હુમલાને “એકદમ ભયાનક” ગણાવ્યો અને પોલીસની પ્રશંસા કરી. સ્ટાર્મર બ્રિટનની ઇમરજન્સી કોબ્રા ટીમ સાથે મુલાકાત કરવા માટે ડેનમાર્કથી વહેલા પરત ફરી રહ્યા છે. “આ હુમલો યોમ કિપ્પુર જેવા પવિત્ર દિવસે થયો હતો, જે તેને વધુ ભયાનક બનાવે છે. મારી સંવેદનાઓ ઘાયલોના પરિવારો સાથે છે,” તેમણે X પર લખ્યું. માન્ચેસ્ટરના મેયર એન્ડી બર્નહામે જણાવ્યું હતું કે હુમલાખોરનું મોત થયું છે. પોલીસે આ વાતની પુષ્ટિ કરી છે. મેયર બર્નહામે લોકોને હુમલાના વિસ્તારથી દૂર રહેવા વિનંતી કરી હતી.
ગ્રેટર માન્ચેસ્ટર પોલીસે તેને આતંકવાદી ઘટના જાહેર કરી છે. આતંકવાદ વિરોધી ટીમ તપાસ કરી રહી છે. હુમલાખોરની ઓળખ થઈ ગઈ છે, પરંતુ તેનું નામ જાહેર કરવામાં આવ્યું નથી. અન્ય બે શંકાસ્પદોની ધરપકડ કરવામાં આવી છે. દેશભરના યહૂદી સમુદાયોમાં સુરક્ષા વધારી દેવામાં આવી છે. બ્રિટિશ કિંગ ચાર્લ્સે કહ્યું કે આ ઘટના ખૂબ જ આઘાતજનક છે, ખાસ કરીને આ ખાસ યહૂદી દિવસે. યહૂદી સંગઠન કોમ્યુનિટી સિક્યુરિટી ટ્રસ્ટે જણાવ્યું હતું કે આ હુમલો બ્રિટનમાં વધી રહેલા યહૂદી વિરોધી ભાવનાનો ભાગ હોય તેવું લાગે છે.
વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે, “આજે યોમ કિપ્પુર પ્રાર્થના દરમિયાન માન્ચેસ્ટરમાં એક સિનાગોગ પર થયેલા આતંકવાદી હુમલાની અમે નિંદા કરીએ છીએ. આ હુમલો આંતરરાષ્ટ્રીય અહિંસા દિવસ પર થયો તે દુ:ખદ છે.” તેમણે વધુમાં કહ્યું, “આ હુમલો આતંકવાદની દુષ્ટ શક્તિઓ દ્વારા ઉભા કરાયેલા પડકારની વધુ એક યાદ અપાવે છે, જેનો વૈશ્વિક સમુદાયે સામનો કરવો પડશે અને સંયુક્ત અને સંકલિત કાર્યવાહી દ્વારા તેને હરાવવો પડશે.”
મીડિયા અહેવાલો અનુસાર, તાજેતરના વર્ષોમાં બ્રિટનમાં યહૂદી વિરોધી ઘટનાઓમાં તીવ્ર વધારો થયો છે, ખાસ કરીને ઇઝરાયલ-હમાસ સંઘર્ષ પછી. માન્ચેસ્ટરમાં લગભગ 30,000 યહૂદીઓ રહે છે, જે લંડનની બહારનો સૌથી મોટો સમુદાય છે. તે જ સમયે, ઓફિસ ફોર નેશનલ સ્ટેટિસ્ટિક્સ (ONS) અનુસાર, ઈંગ્લેન્ડ અને વેલ્સમાં કુલ 2.87 લાખ યહૂદીઓ રહે છે.