દેશની જાણીતી પાન મસાલા કંપની કમલા પસંદ અને રાજશ્રીના માલિક કમલ કિશોર ચૌરસિયાની પુત્રવધૂ દીપ્તિ ચૌરસિયા (40) એ દિલ્હીના વસંત વિહાર સ્થિત પોતાના ઘરમાં મંગળવારે સાંજે આત્મહત્યા કરી લીધી. પોલીસના જણાવ્યા અનુસાર, દીપ્તિનો મૃતદેહ પંખાથી લટકતો મળી આવ્યો હતો. પોલીસને એક સુસાઈડ નોટ મળી છે, જેમાં તેણે કોઈના પર આરોપ લગાવ્યો નથી. નોટમાં લખ્યું છે કે જો કોઈ સંબંધમાં પ્રેમ અને વિશ્વાસ ન હોય તો પછી સંબંધમાં રહેવાનું અને જીવવાનું કારણ શું છે. દીપ્તિના પરિવારે આત્મહત્યા માટે ઉશ્કેરવાનો આરોપ લગાવ્યો છે. દીપ્તિના લગ્ન વર્ષ 2010માં કમલ કિશોરના પુત્ર હરપ્રીત ચૌરસિયા સાથે થયા હતા. બંનેને 14 વર્ષનો એક પુત્ર છે. એવું કહેવાય છે કે હરપ્રીતે બે લગ્ન કર્યા છે. બીજી પત્ની સાઉથ ફિલ્મોની અભિનેત્રી છે.
કમલા પસંદ પાન મસાલાના સ્થાપક કમલાકાંત ચૌરસિયા અને કમલ કિશોર ચૌરસિયા છે. કંપની 1973માં રજીસ્ટર થઈ હતી. જોકે, પાન મસાલા અને ગુટખા બનાવવાનો અને વેચવાનો અસલી વ્યવસાય 1980ના દાયકામાં શરૂ થયો હતો. કંપનીની શરૂઆત યુપીના કાનપુરમાં ફીલખાના મહોલ્લામાં એક નાની દુકાનથી થઈ હતી. આજે કંપનીનું અબજો રૂપિયાનું ટર્નઓવર છે. સમય જતાં, કંપનીએ પાન મસાલા ઉપરાંત તમાકુ, ગુટખા, એલચી અને અન્ય FMCG ઉત્પાદનો સાથે રિયલ એસ્ટેટ, લોખંડના વેપારમાં પણ પગ મૂક્યો. કમલા પસંદ પાન મસાલાની માલિકી કમલા પસંદ (KP) ગ્રુપ અને કમલાકાંત કંપની પાસે છે. KP ગ્રુપ કમલા પસંદ પાન મસાલા બનાવતી મૂળ કંપની છે. કમલાકાંત એન્ડ કંપની LLP પાસે બ્રાન્ડનો ટ્રેડમાર્ક છે. બજાર વિશ્લેષક કંપની અનુસાર, દેશમાં પાન મસાલાનો કારોબાર લગભગ 46,882 કરોડ રૂપિયાનો છે, જે 2033 સુધીમાં 64 હજાર કરોડ રૂપિયાને પાર કરી શકે છે. આમાં કમલા પસંદનું બજાર મૂડીકરણ 3 હજાર કરોડ રૂપિયાથી વધુ છે.