પાકિસ્તાન સરકાર અને તેના ક્રિકેટ બોર્ડે ODI વર્લ્ડ કપ દરમિયા ટીમની સુરક્ષા માટે ICC પાસેથી લેખિત ખાતરી માંગી

પાકિસ્તાન 2023 ODI વર્લ્ડ કપમાં તેની બે લીગ મેચનું સ્થળ બદલવા માંગતું હતું, પરંતુ અહેવાલો અનુસાર, ICC અને BCCIએ તેની માંગને ફગાવી દીધી

નવીદિલ્હી

પાકિસ્તાન સરકાર અને તેના ક્રિકેટ બોર્ડ (PCB) એ ભારતમાં યોજાનાર ODI વર્લ્ડ કપ દરમિયાન તેમની રાષ્ટ્રીય પુરૂષ ટીમની સુરક્ષા માટે આંતરરાષ્ટ્રીય ક્રિકેટ પરિષદ (ICC) પાસેથી લેખિત ખાતરી માંગી છે.પાકિસ્તાન 2023 ODI વર્લ્ડ કપમાં તેની બે લીગ મેચનું સ્થળ બદલવા માંગતું હતું, પરંતુ અહેવાલો અનુસાર, ICC અને BCCIએ તેની માંગને ફગાવી દીધી છે. આ માંગને નકારી કાઢવાનો આધાર એ છે કે પાકિસ્તાને જણાવ્યું નથી કે તે સ્થળ શા માટે બદલવા માંગે છે.પાકિસ્તાન સરકાર બાબર આઝમની સાથે વર્લ્ડ કપમાં સુરક્ષા પ્રતિનિધિમંડળ મોકલવાની પણ તૈયારી કરી રહી છે. વડા પ્રધાન શાહબાઝ શરીફે વર્લ્ડ કપમાં પાકિસ્તાનની ભાગીદારીની સમીક્ષા કરવા માટે એક સમિતિની રચના કરી છે. મીડિયા રિપોર્ટ્સ અનુસાર, ઉચ્ચ સ્તરીય સુરક્ષા ટીમ મોકલવા માટે સમિતિની રચના કરવામાં આવી છે. આ પ્રતિનિધિમંડળ પાકિસ્તાનની ટીમ સાથે તમામ સ્થળો પર જશે અને સુરક્ષા અને વ્યવસ્થાની સમીક્ષા કરશે.આ ટૂર્નામેન્ટ આ વર્ષે ઓક્ટોબર-નવેમ્બરમાં યોજાવાની છે. પાકિસ્તાનની ટીમ 6 ઓક્ટોબરે હૈદરાબાદમાં નેધરલેન્ડ સામે તેના વર્લ્ડ કપ અભિયાનની શરૂઆત કરશે.નોકઆઉટ પહેલા પાકિસ્તાનની ટીમ ભારતમાં કુલ 9 વનડે રમશે.મીડિયા રિપોર્ટ્સ અનુસાર, ODI વર્લ્ડ કપમાં અમદાવાદમાં 15 ઓક્ટોબરે યોજાનારી ભારત-પાકિસ્તાનની મેચની તારીખમાં ફેરફાર કરવામાં આવ્યો છે. આ મેચ હવે 14 ઓક્ટોબરે રમાશે. ન્યૂઝ એજન્સી પીટીઆઈના જણાવ્યા અનુસાર, પાકિસ્તાન ક્રિકેટ બોર્ડ (PCB) તારીખ બદલવા માટે રાજી થઈ ગયું છે. શ્રીલંકા સામેની પાકિસ્તાનની મેચની તારીખ પણ બદલવામાં આવી છે. આ મેચ 12 ઓક્ટોબરે રમાવાની હતી. હવે આ મેચ 10 ઓક્ટોબરે રમાશે. આ ફેરફારને કારણે પાકિસ્તાનને ભારત સામેની મેચ પહેલા 3 દિવસનો ગેપ મળશે. ODI વર્લ્ડ કપ 5 ઓક્ટોબરથી રમાશે અને ઇન્ટરનેશનલ ક્રિકેટ કાઉન્સિલ (ICC) એ જૂનના અંતમાં તેનું શેડ્યૂલ જાહેર કર્યું હતું. અન્ય ટીમોની કેટલીક મેચોના સમયમાં પણ ફેરફાર કરવામાં આવી શકે છે. ICC ટૂંક સમયમાં નવું શેડ્યૂલ જાહેર કરશે.