રાજ ભવન ખાતે રાજ્યપાલ આચાર્ય દેવવ્રત વતીથી અગ્ર સચિવ રાજેશ માંજુએ વિદાય આપી : અમદાવાદ એરપોર્ટ પર મુખ્યમંત્રી ભૂપેન્દ્ર પટેલ, ગુજરાત વિધાનસભાના અધ્યક્ષ શંકરભાઈ ચૌધરી, સંસદીય બાબતો અને આરોગ્ય મંત્રી ઋશિકેશ પટેલ તથા પ્રોટોકોલ મંત્રી જગદીશ વિશ્વકર્મા અને અમદાવાદના મેયર શ્રીમતી પ્રતિભા જૈન , મુખ્ય સચિવ રાજકુમાર, અમદાવાદ શહેર પોલીસ કમિશનર જ્ઞાનેન્દ્રસિંહ મલિક, અમદાવાદ કલેક્ટર સુશ્રી પ્રવીણા ડી.કે. વગેરેએ અમદાવાદ એરપોર્ટ પર ઉપસ્થિત રહીને રાષ્ટ્રપતિને ભાવસભર વિદાય આપી
ગાંધીનગર
ભારતનાં રાષ્ટ્રપતિ શ્રીમતી દ્રોપદી મુર્મુએ આજે ગાંધીનગરનાં રાજભવનથી આયુષ્માન ભવ અભિયાનનો વર્ચ્યુઅલ શુભારંભ કરાવ્યો હતો.આ પ્રસંગે બોલતા રાષ્ટ્રપતિએ કહ્યું હતું કે, ‘આયુષ્માન ભવ અભિયાનનું લક્ષ્ય – કોઈ પણ વ્યક્તિ પાછળ ન રહે અને કોઈ પણ ગામને પાછળ ન છોડવું જોઈએ– જે આપણા દેશને સાર્વત્રિક સ્વાસ્થ્ય કવચના ઉદ્દેશ્યને પ્રાપ્ત કરવામાં સફળ બનાવશે.’ તેમણે ઉમેર્યું હતું કે, જો દરેક વ્યક્તિ અને દરેક પરિવાર સ્વસ્થ રહેશે, તો સ્વસ્થ ભારતનું નિર્માણ કરવાનો સંકલ્પ પૂર્ણ થશે. તેમને એ જાણીને આનંદ થયો હતો કે, આ લક્ષ્યાંક હાંસલ કરવા માટે બહુ-મંત્રીમંડળીય અભિગમ અપનાવવામાં આવ્યો છે. તેમણે જણાવ્યું હતું કે આવા મોટા લક્ષ્યોને પ્રાપ્ત કરવામાં દરેકનો સહકાર મદદરૂપ થશે.
રાષ્ટ્રપતિએ કહ્યું કે તમામ લાભાર્થીઓને આયુષ્માન કાર્ડ પ્રદાન કરવું; ગ્રામજનોને સ્વાસ્થ્ય, સ્વચ્છતા અને પોષણ વિશે જાગૃત કરવા આયુષ્માન બેઠકોનું આયોજન કરવું; આયુષ્માન મેળાઓનું આયોજન; અને આયુષ્યમાન આપકે દ્વાર 3.0ની પહેલ હેઠળ અઠવાડિયામાં એક વખત સામુદાયિક આરોગ્ય કેન્દ્રો પર નિષ્ણાત ડૉક્ટરોની મુલાકાતની વ્યવસ્થા કરવી એ પ્રશંસનીય પગલાં છે.
રાષ્ટ્રપતિએ કહ્યું કે ભારત ઘણા ક્ષેત્રોમાં નવી તકનીક અને કાર્ય પદ્ધતિઓ અપનાવવામાં ખૂબ જ ઉત્સાહ સાથે આગળ વધી રહ્યું છે. તેણીને એ જાણીને આનંદ થયો કે ‘આયુષ્માન ભારત ડિજિટલ મિશન’ સપ્ટેમ્બર ૨૦૨૧માં શરૂ કરવામાં આવ્યું હતું. તેમણે વિશ્વાસ વ્યક્ત કર્યો હતો કે, ભારત અન્ય ક્ષેત્રોની જેમ હેલ્થકેર સેવાઓના ક્ષેત્રમાં પણ ડિજિટલ સમાવેશનું ઉદાહરણ સ્થાપિત કરશે.
આયુષ્માન ભવ અભિયાન કેન્દ્રીય સ્વાસ્થ્ય અને પરિવાર કલ્યાણ મંત્રાલયની દેશવ્યાપી સ્વાસ્થ્ય સેવા પહેલ છે, જેનો ઉદ્દેશ્ય દેશના દરેક ગામ અને શહેર સુધી પહોંચતી સ્વાસ્થ્ય સેવાઓને સંતૃપ્તિ કવચ પ્રદાન કરવાનો છે. આ અભિયાન 17 સપ્ટેમ્બરથી 2 ઓક્ટોબર 2023 સુધી ‘સેવા પખવાડા’ દરમિયાન લાગુ કરવામાં આવશે.
ભારતના રાષ્ટ્રપતિ શ્રીમતી દ્રૌપદી મુર્મુએ ગુજરાતની વિદાય લીધી : રાજભવન ખાતે રાજ્યપાલ આચાર્ય દેવવ્રત વતીથી અગ્ર સચિવ રાજેશ માંજુએ વિદાય આપી
ભારતના રાષ્ટ્રપતિ શ્રીમતી દ્રૌપદી મુર્મુએ આજે ગુજરાતની વિદાય લીધી હતી. રાજભવન ખાતે રાજ્યપાલ આચાર્ય દેવવ્રતજી વતીથી તેમના અગ્ર સચિવ શ્રી રાજેશ માંજુએ રાષ્ટ્રપતિજીને વિદાય આપી હતી.રાષ્ટ્રપતિ શ્રીમતી દ્રૌપદી મુર્મુ ગઈકાલે મોડી સાંજે ગાંધીનગર પધાર્યા હતા. આજે ગુજરાત વિધાનસભામાં રાષ્ટ્રીય ઈ-વિધાન એપ્લિકેશનનું લૉન્ચિંગ અને રાજભવનમાં આયોજિત કેન્દ્રીય આરોગ્ય અને પરિવાર કલ્યાણ મંત્રાલયના કાર્યક્રમમાં ‘આયુષ્યમાન ભવ:’ પહેલ અને સેવા પખવાડિયા મહાઅભિયાનનો શુભારંભ કરાવ્યા પછી બપોરે માનનીય રાષ્ટ્રપતિ શ્રીમતી દ્રૌપદી મુર્મુ નવી દિલ્હી જવા રવાના થયા હતા.રાષ્ટ્રપતિને ભાવભરી વિદાય આપવા અમદાવાદ એરપોર્ટ પર મુખ્યમંત્રી ભૂપેન્દ્ર પટેલ, ગુજરાત વિધાનસભાના અધ્યક્ષ શંકરભાઈ ચૌધરી, સંસદીય બાબતો અને આરોગ્ય મંત્રી ઋશિકેશ પટેલ તથા પ્રોટોકોલ મંત્રી જગદીશ વિશ્વકર્મા અને અમદાવાદના મેયર શ્રીમતી પ્રતિભા જૈન ઉપસ્થિત રહ્યા હતા.મુખ્ય સચિવ રાજકુમાર, અમદાવાદ શહેર પોલીસ કમિશનર શ્રી જ્ઞાનેન્દ્રસિંહ મલિક, અમદાવાદ કલેક્ટર સુશ્રી પ્રવીણા ડી.કે. વગેરે એ પણ અમદાવાદ એરપોર્ટ પર ઉપસ્થિત રહીને રાષ્ટ્રપતિશ્રીને ભાવસભર વિદાય આપી હતી.