નવી દિલ્હી
સુપ્રીમ કોર્ટે POCSO કેસમાં દોષિત ઠરેલા એક વ્યક્તિની સજા ઘટાડવાનો ઇનકાર કર્યો હતો અને તેને ફટકારવામાં આવેલી 20 વર્ષની કેદને યથાવત રાખી હતી. 23 વર્ષીય વ્યક્તિએ ’અપવાદરૂપ સંજોગો’નો ઉલ્લેખ કરીને સજા ઘટાડવાની માંગ કરી હતી. જસ્ટિસ બી.વી. નાગરત્નાની આગેવાની હેઠળની બેન્ચે 26 મેના રોજ આ કેસમાં અરજી ફગાવી દીધી હતી. કોર્ટે કહ્યું હતું કે, આરોપીને આપવામાં આવેલી 20 વર્ષની સજા POCSO કાયદાની કલમ 6 (ગંભીર પ્રકૃતિનું જાતીય શોષણ) હેઠળ લઘુતમ સજા છે. આવી સ્થિતિમાં, કોર્ટ દ્વારા દખલ કરવાનો કોઈ આધાર નથી.
આ અરજી 8 જાન્યુઆરી 2024 ના રોજ બોમ્બે હાઈકોર્ટના 20 વર્ષની સજાને યથાવત રાખવાના નિર્ણય સામે દાખલ કરવામાં આવી હતી. આરોપીને 6 વર્ષની સગીર બાળકી સાથે ગંભીર જાતીય શોષણનો દોષી ઠેરવવામાં આવ્યો હતો. આરોપી તરફથી હાજર રહેલા વકીલે વિનંતી કરી હતી કે, કોર્ટ પોતાની વિશેષ સત્તાઓનો ઉપયોગ કરીને સજા ઘટાડી શકે છે જેમ કે તેણે ઘણા કેસોમાં કર્યું છે. કહ્યું કે, અરજદાર ફક્ત 23 વર્ષનો છે અને 20 વર્ષની સજા તેનું આખું જીવન બરબાદ કરી દેશે. તથ્યોના આધારે, વકીલે કહ્યું કે FIR માં 6 દિવસનો વિલંબ થયો હતો. પીડિતાના માતા-પિતા બંને તબીબી સહાયક છે, છતાં તેમને શરીર પર કોઈ ઈજા કે રક્તસ્ત્રાવ જોવા મળ્યો નથી. આ દરમિયાન, ન્યાયાધીશ નાગરત્નાએ પૂછ્યું કે આ કેસમાં ઓછામાં ઓછી સજા શું છે? 20 વર્ષ. બંને કોર્ટે સમાન સજા આપી છે. તબીબી પુરાવા હાજર છે.