વર્ષ 2020માં વટવા ખાતેથી 58 કિલો ગાંજાના જથ્થા સાથે ઝડપાયેલા ત્રણ આરોપીને સેશન્સ જજ વી.બી. રાજપૂતે 12-12 વર્ષની સજા ફટકારી જેલ હવાલે કર્યા છે. આ ઉપરાંત કોર્ટે તમામ આરોપીઓને એક એક લાખ રૂપિયાનો દંડ પણ ફટકાર્યો છે. કોર્ટે ચુકાદામાં કોર્ટે નોંધ્યું હતું કે, ગંભીર પ્રકારનો ગુનો છે, આખોય કેસ નિઃશંકપણે પુરવાર થાય છે. આવા ગુનાને કારણે યુવાધન બરબાદ થઇ રહ્યું છે, ત્યારે ગુનાને હળવાશથી લેવાય નહીં, તેથી આરોપીને સજા કરવી ન્યાયોચિત જણાય છે.
એસઓજીને બાતમી મળી હતી કે, 19 જૂન 2020ના રોજ કેટલા લોકો ગેરકાયદે રીતે ગાંજાની મોટા પાયે હેરફેર કરવાના છે અને મુન્નાભાઇ ઉર્ફે સિતારામ પાસેથી 60 કિલો ગાંજો મગાવ્યો છે અને જે વટવામાં ક્યાંક છૂપાવવાના છે. તેથી એસઓજીની ટીમે વોચ ગોઠવીને વટવામાંથી ગાંજાના 9 પાર્સલ સાથે પ્રેમચંદ રામશીરોમણી તિવારી(ઉં.વ.65, રહે. ઉત્તર પ્રદેશ), અમિત કાનજીભાઇ પટેલ(ઉં.વ.23, રહે.ઘોડાસર) અને ધર્મેન્દ્ર રાજેન્દ્રભાઇ ધામુ(ઉં.વ.23 રહે. મધ્યપ્રદેશ)ને ઝડપી લીધા હતા. તે સમયે આરોપી પાસેથી 18 કિલો ગાંજો મળ્યો હતો. ત્યારબાદ અમિતના ઘરે તપાસ કરતા બીજો 40 કિલો ગાંજો મળ્યો હતો. આમ, પોલીસે 58 કિલો ગાંજો કબજે કર્યો હતો અને આરોપીઓની ધરપકડ કરી હતી.
ત્યારબાદ પોલીસે આરોપીઓ સામે NDPS એક્ટની જુદી જુદી કલમ હેઠળ ચાર્જશીટ કરતા કેસ ચાલવા પર આવ્યો હતો. જેમાં સરકારી વકીલ કમલેશ જૈન અને ડી.એમ.ઠાકોરે પુરતા સાક્ષી તપાસી અને દસ્તાવેજી પુરાવા રજૂ કરતા કોર્ટને જણાવ્યું હતું કે, ગંભીર પ્રકારનો ગુનો છે, આવા ગુના સતત વધી રહ્યાં છે, સગીર અને યુવાધન ડ્રગ્સના રવાડે ચડી બરબાદ થઇ રહ્યું છે. આવા આરોપીઓને કારણે જ આ બદી સતત વધી રહી છે ત્યારે સમાજમાં દાખલો બેસે અને આવા આરોપીઓમાં કાયદાનો ભય રહે તે હેતુને ધ્યાને રાખી આરોપીને સખતમાં સખત સજા કરવી જોઇએ. આવી રજૂઆત બાદ કોર્ટે ત્રણે આરોપીઓને 12-12 વર્ષ કેદની સજા ફટકારી છે.