પંચમહાલ જિલ્લામાં કમોસમી વરસાદને કારણે ડાંગરના પાકને વ્યાપક નુકસાન થયું છે. હવામાન વિભાગની આગાહી મુજબ વરસેલા વરસાદથી ખેડૂતો ચિંતિત બન્યા છે. ખાસ કરીને ગોધરા તાલુકાના કાંકણપુર, પઢીયાર, વિંઝોલ, વેલવડ, મોર્યો, નદીસર, ધાનિત્રા અને વેગનપુર સહિતના અનેક ગામોમાં તૈયાર પાકને ભારે અસર થઈ છે. આ વિસ્તારોના ખેડૂતો મુખ્યત્વે ડાંગરની ખેતી પર નિર્ભર છે. ચાર મહિનાની સઘન મહેનત પછી જ્યારે ડાંગરનો પાક લણણી માટે તૈયાર હતો, તે જ સમયે કમોસમી વરસાદ વરસ્યો. ખેતરોમાં પાણી ભરાઈ જવાથી પાકને મોટું નુકસાન થયું છે. વરસાદના કારણે ખેતરમાં ઉભેલો ડાંગરનો પાક તેમજ કાપણી કરીને ખેતરમાં રાખવામાં આવેલો પાક પણ સંપૂર્ણપણે પલળી ગયો છે. ડાંગર પલળી જવાથી તેની ગુણવત્તા બગડી છે, જેના કારણે ખેડૂતોને અપેક્ષિત ઉપજ નહીં મળે અને મોટું આર્થિક નુકસાન થવાની ભીતિ સેવાઈ રહી છે. આ વિસ્તારના ખેડૂતો પશુપાલન પર પણ નિર્ભર હોવાથી તેમના માટે ડાંગરના પાક સાથે ઘાસચારાનું પણ વિશેષ મહત્વ હોય છે. ડાંગર પલળી જવાથી પશુઓ માટે મળતું ઘાસ પણ પૂરતું અને ગુણવત્તાયુક્ત રહેશે નહીં. આમ, ખેતી અને પશુપાલન બંને ક્ષેત્રે ખેડૂતોને બેવડો ફટકો પડ્યો છે. કમોસમી વરસાદથી થયેલા વ્યાપક નુકસાનને કારણે ખેડૂતો ભારે ચિંતામાં મુકાયા છે. તેમની મહેનત નિષ્ફળ જતાં અને આર્થિક નુકસાનની સ્થિતિમાં, તેમણે રાજ્ય સરકાર સમક્ષ તાત્કાલિક સર્વે કરીને યોગ્ય વળતર ચૂકવવાની માંગ કરી છે. ખેડૂતોનું કહેવું છે કે ઝડપી આર્થિક સહાય જ તેમને આ સંકટમાંથી રાહત આપી શકશે. કમોસમી વરસાદથી થયેલા વ્યાપક નુકસાનને કારણે ખેડૂતો ભારે ચિંતામાં મુકાયા છે. તેમની મહેનત નિષ્ફળ જતાં અને આર્થિક નુકસાનની સ્થિતિમાં, તેમણે રાજ્ય સરકાર સમક્ષ તાત્કાલિક સર્વે કરીને યોગ્ય વળતર ચૂકવવાની માંગ કરી છે. ખેડૂતોનું કહેવું છે કે ઝડપી આર્થિક સહાય જ તેમને આ સંકટમાંથી રાહત આપી શકશે.