ગુરુવારે બ્રાઝિલના બેલેમ શહેરમાં UN COP30 ક્લાઇમેટ સમિટના મુખ્ય સ્થળે આગ લાગી હતી, જેમાં 13 લોકોને ઇજાલ થઈ હતી. આગ લાગી ત્યારે ભારતના પર્યાવરણમંત્રી ભૂપેન્દ્ર યાદવ પણ ભારતીય પ્રતિનિધિમંડળ સાથે હાજર હતા, જોકે તેઓ અને અન્ય અધિકારીઓ સુરક્ષિત રીતે ઘટનાસ્થળેથી નીકળી ગયા. ધ ન્યૂયોર્ક ટાઈમ્સ મુજબ, સ્થાનિક સમય અનુસાર બપોરે 2 વાગ્યે (ભારતીય સમય મુજબ રાત્રે 10.30 વાગ્યે) કન્વેન્શન હોલની અંદરના પેવેલિયનમાં આગ લાગી હતી. આ કાર્યક્રમ સમયે 190થી વધુ દેશોના 50,000થી વધુ ડિપ્લોમેટ, પત્રકારો અને એક્ટિવિસ્ટ પેવેલિયનમાં ભેગા થયા હતા. ભારતીય મંત્રાલયના પ્રવક્તાએ જણાવ્યું હતું કે ઘટના સમયે બ્લૂ ઝોનમાં ભારતીય પ્રતિનિધિમંડળ સાથે યુએન સેક્રેટરી-જનરલ એન્ટોનિયો ગુટેરેસ અને ભારતના પર્યાવરણમંત્રી ભૂપેન્દ્ર યાદવ પણ હાજર હતા. આગની જાણ થતાં જ બધાને સ્થળ પરથી સુરક્ષિત રીતે બહાર કાઢવામાં આવ્યા હતા. આગના કારણે હજારો લોકોમાં અફરાતફરી મચી ગઈ હતી. ઘટનાસ્થળના વીડિયો અને ફોટામાં લોકો પોતાનો જીવ બચાવવા માટે ભાગતા જોવા મળ્યા હતા. એ જ સમયે મંડપમાંથી જ્વાળાઓ અને કાળો ધુમાડો નીકળતો જોવા મળ્યો. આ ધુમાડો ઘણા કિલોમીટર દૂરથી પણ જોઈ શકાતો હતો.
ઘટનાસ્થળે ડઝનબંધ એમ્બ્યુલન્સ અને ફાયર એન્જિન દોડી ગયાં હતાં. બાદમાં આગ પર કાબૂ મેળવી લેવામાં આવ્યો હતો, એમ કાર્યક્રમના આયોજકો, UN COP30 પ્રેસિડેન્સી અને UNFCCC એ સંયુક્ત નિવેદનમાં જણાવ્યું હતું. આગ લાગ્યાના થોડીવાર પછી આ વિસ્તારમાં ભારે વરસાદ શરૂ થયો, જેના કારણે સ્થળની બહાર આવેલા હજારો લોકો વરસાદમાં પલળી ગયા હતા. યુનાઈટેડ નેશન્સ ફ્રેમવર્ક કન્વેન્શન ઓન ક્લાઈમેટ ચેન્જ (UNFCCC)ની વાર્ષિક COP30 ક્લાઈમેટ સમિટ 10થી 21 નવેમ્બર સુધી ચાલશે, જેમાં 190થી વધુ દેશોના હજારો લોકો ભાગ લેવા પહોંચ્યા છે. તેમના નિવેદનમાં આયોજકોએ મહેમાનોને કાર્યક્રમ સંબંધિત માહિતી માટે આગામી સૂચના સુધી રાહ જોવા જણાવ્યું છે. પરિસ્થિતિને ધ્યાનમાં રાખીને પોલીસે પ્રવેશ બંધ કરી દીધો હતો અને વિસ્તારને ઘેરી લીધો હતો. આગની માહિતી મળતાં જ ડઝનબંધ એમ્બ્યુલન્સ અને ફાયર એન્જિન તાત્કાલિક પહોંચી ગયાં હતાં અને પરિસ્થિતિને કાબૂમાં લીધી હતી. કાર્યક્રમના આયોજકો, UN COP30 પ્રેસિડેન્સી અને UNFCCCએ એક સંયુક્ત નિવેદનમાં જણાવ્યું હતું કે લગભગ 6 મિનિટમાં આગ પર કાબુ મેળવી લેવામાં આવ્યો હતો. યુનાઈટેડ નેશન્સ ફ્રેમવર્ક કન્વેન્શન ઓન ક્લાઈમેટ ચેન્જ (UNFCCC)ની વાર્ષિક COP30 ક્લાઈમેટ સમિટ 10 થી 21 નવેમ્બર દરમિયાન યોજાઈ રહી છે. આગને કારણે ઘણી મહત્વપૂર્ણ બેઠકો રદ અથવા ટાળવામાં આવી છે. શુક્રવાર સાંજે પૂર્ણ થવાને બદલે, કોન્ફરન્સ હવે શનિવાર મોડી રાત્રે અથવા શનિવાર સુધી લંબાવવામાં આવી શકે છે. પ્રતિનિધિઓને સંપૂર્ણ નિરીક્ષણ પછી જ સ્થળ પર પાછા ફરવાની મંજૂરી આપવામાં આવશે.
COP30એ 30મું વાર્ષિક UN જળવાયુ સંમેલન છે, જે 11 થી 22 નવેમ્બર 2025 દરમિયાન બ્રાઝિલના બેલેમમાં યોજાઈ રહ્યું છે. વિશ્વના લગભગ તમામ દેશોના 56,000થી વધુ નેતાઓ, રાજદ્વારીઓ, વૈજ્ઞાનિકો, પત્રકારો અને આબોહવા કાર્યકરો તેમાં ભાગ લઈ રહ્યા છે. તેનો મુખ્ય ઉદ્દેશ્ય ગ્લોબલ વોર્મિંગને 1.5 ડિગ્રીથી નીચે રાખવા માટે એક નવી અને મજબૂત પ્લાન બનાવવાનો છે, જેમાં ઇંધણ (કોલસો, તેલ, ગેસ)થી સંપૂર્ણ દૂર રહેવા માટેનો રોડમેપ સામેલ છે. આમાં ગરીબ દેશોને વાર્ષિક 1 ટ્રિલિયન ડોલર સુધીની જળવાયુ સહાયતા અને એમેઝોનના જંગલોના રક્ષણ માટેના મોટા નિર્ણયોનો સમાવેશ થાય છે. આ સંમેલન મહત્વપૂર્ણ છે કારણ કે 2025 એ પેરિસ કરાર હેઠળ નવા અને મજબૂત જળવાયુ લક્ષ્યો રજૂ કરવા માટેનું પ્રથમ મુખ્ય વર્ષ છે. COP (પક્ષોનું પરિષદ) 1995માં શરૂ કરવામાં આવ્યું હતું. તે યુનાઇટેડ નેશન્સ ફ્રેમવર્ક કન્વેન્શન ઓન ક્લાઇમેટ ચેન્જ (UNFCCC)ની વાર્ષિક બેઠક છે, જે 1992માં રિયો ડી જાનેરો (બ્રાઝિલ) માં અર્થ સમિટમાં બનાવવામાં આવી હતી. આ સંધિ 1994માં અમલમાં આવી હતી અને આજે તેના 198 સભ્યો છે. આનો અર્થ એ થયો કે વિશ્વના લગભગ બધા દેશો (197 દેશ + યુરોપિયન યુનિયન) સભ્ય છે. COP1 તરીકે ઓળખાતી પ્રથમ COP 1995માં જર્મનીના બર્લિનમાં યોજાઈ હતી. ત્યારબાદ દર વર્ષે COPનું આયોજન કરવામાં આવે છે (2020 સિવાય, COVIDને કારણે). 2025માં COP30 આવી 30મી પરિષદ છે, અને તેના 198 સભ્ય દેશોમાં ભારત, ચીન, યુનાઇટેડ સ્ટેટ્સ, રશિયા, સાઉદી અરેબિયા, નાના ટાપુ રાષ્ટ્રો અને યુરોપિયન યુનિયનનો સમાવેશ થાય છે.