હોંગકોંગ કસ્ટમ સત્તાવાળાઓ 14 અબજ હોંગકોંગ ડોલર (1.8 બિલિયન ડોલર)ના દેશના સૌથી મોટા મની-લોન્ડરિંગ કેસના સંબંધમાં શુક્રવારે ઓછામાં ઓછા સાત વ્યક્તિની ધરપકડ કરી હતી. આમાંથી કેટલાંક નાણા ભારતમાં મોબાઇલ એપ્લિકેશન કૌભાંડ અને બે જ્વેલરી કંપનીઓ સાથે જોડાયેલા છે. અધિકારીઓએ ઇલેક્ટ્રોનિક ડિવાઇસિસ, દસ્તાવેજો અને 8,000 કેરેટથી વધુ શંકાસ્પદ સિન્થેટિક રત્નો જપ્ત કર્યા છે, જે દેખીતી રીતે ભારતમાં નિકાસ માટે હતાં.
હોંગકોંગના કસ્ટમ્સ ડિપાર્ટમેન્ટે જણાવ્યું હતું કે આ સિન્ડિકેટ નાણા ટ્રાન્સફર કરવા માટે ભાડાના બેંક એકાઉન્ટ્સ અને બનાવટી કંપનીઓનો ઉપયોગ કરતી હતી. હોંગકોંગમાં નોંધાયેલા કોઇ એક કેસની આ સૌથી મોટી રકમ છે. આ સિન્ડિકેટ ભારતમાં મોબાઇલ એપ કૌભાંડ અને બે જ્વેલરી કંપનીઓ સાથે જોડાયેલી છે.
એક એકાઉન્ટમાં એક જ દિવસમાં 10 કરોડ હોંગકોંગ ડોલર (1.28 કરોડ ડોલર) જમા થયાં હતાં અને દૈનિક 50 ટ્રાન્ઝેક્શન થતાં હતાં. ધરપકડ કરાયેલા લોકો કોણ છે તેની વધુ વિગત આપ્યા વગર અધિકારીએ જણાવ્યું હતું કે આમાંથી કેટલાક બિન ચીન હોંગકોંગ નિવાસી છે. હોંગકોંગ, ભારત અને કેટલાંક દેશોએ ઓપરેશન હાથ ધરવા માટે સહકાર આપ્યો હતો.
શકમંદો હીરા અને ઇલેક્ટ્રોનિક્સ સંબંધિત ટ્રાન્ઝેક્શન મારફત મની લોન્ડરિંગ કરતાં હતા. આ સિન્ડિકેટનો માસ્ટરમાઇન્ડ 34 વર્ષીય વ્યક્તિ હોવાનું માનવામાં આવે છે. તેની પત્ની, ભાઈ અને પિતાની તેમજ હોંગકોંગના અન્ય ત્રણ રહેવાસીઓની પણ ધરપકડ કરાઈ હતી. આરોપીઓ ઇલેક્ટ્રોનિક્સ, હીરો અને જ્વેલરીનો વેપાર કરવા માટે મોટી સંખ્યામાં બનાવટી કંપનીઓ અને ભાડાના બેન્ક એકાઉન્ટ ખોલાવ્યા હતા.