ભુજના આઈકોનિક બસ પોર્ટમાં એસટી બસના ડ્રાઈવરના જાહેરમાં ચેનચાળા કરતા હોવાનો વીડિયો વાઈરલ થતા હડકંપ મચી ગયો છે. જેના બાદ બસના ડ્રાઈવરને સસ્પેન્ડ કરાયો છે. સાથે જ કચ્છ એસટી વિભાગે ખાતાકીય તપાસના આદેશ કર્યા છે. અને એપ્રેન્ટીસ યુવતીને છુટા કરવાનો આદેશ અપાયો છે.
પ્રાપ્ત માહિતી અનુસાર, કચ્છના ભુજમાં એસ.ટી. વિભાગમાં બસ ડ્રાઇવર તરીકે કાર્યરત બી.એન.જાડેજાનો શરમજનક વીડિયો સામે આવ્યો છે. ડ્રાઈવર બી.એમ.જાડેજા વિભાગમાં કામ માટે આવતી એપ્રેન્ટીસ યુવતી સાથે અશ્લીલ ચેનચાળા કરતો ઝડપાયો હતો. આ વીડિયો એસટી કેમ્પસનો જ હતો, જેમાં એસટી ડ્રાઈવર દીકરીની ઉંમરની યુવતી સાથે જાહેરમાં અશ્લીલ હરકતો કરતો જોવા મળ્યો હતો.
સોશિયલ મીડિયામાં આ વીડિયો વાયરલ થયો હતો. જેના બાદ કચ્છ એસટી વિભાગીય નિયામક વાયકે પટેલે ખાતાકીય પગલા લેવાનો આદેશ કર્યો છે. સાથે જ દીકરીની ઉંમરની યુવતી સાથે પ્રેમલીલા કરતા ડ્રાઈવરને સસ્પેન્ડ કરી દેવાયો છે. તો યુવતીને છુટા કરવાનો આદેશ અપાયો છે.
આમ, ગુજરાત એસટીમાં ફરજ બજાવતા ડ્રાઈવરને એસટી બસપોર્ટની અંદર જ જાહેરમાં એક યુવતી સાથે ચેનચાળા કરવા ભારે પડી ગયા છે. આ વીડિયો કોઈ પ્રવાસીએ બનાવીને સોશિયલ મીડિયામાં વાઈરલ કરતા મામલો ઉચ્ચ અધિકારીઓ સુધી પહોંચ્યો છે.