અમદાવાદ શહેરમાં દરરોજ અકસ્માતની ઘટના બનતી રહે છે. જેને પરિણામે નિર્દોષ લોકોને જીવ ગુમાવવાનો વારો આવે છે. ગુજરાતમાં દારૂબંધી હોવા છતાં છાશવારે દારૂ પકડાવાની ઘટના બનતી રહે છે. ગઇકાલે પણ બોપલ ખાતે આવેલા વકીલ સાહેબ બ્રિજ ખાતે ત્રિપલ અકસ્માત થયો હતો. આઇસર, થાર અને ફોર્ચ્યુનર કાર વચ્ચે થયેલા અકસ્માતમાં 3 લોકોના ઘટનાસ્થળે જ મોત નીપજ્યા.જ્યારે 6 લોકો ઘાયલ થયા છે. અકસ્માત એટલો ગંભીર હતો કે, બંને કારનો કચ્ચરઘાણ વળી ગયો હતો.
અકસ્માત થતાં જ રસ્તા પર દારૂનો ઢગલો થઇ ગયો હતો. રોડ પર જ દારૂની રેલમછેલ થઇ ગઇ હતી. રસ્તા પર દારૂની નદી વહેતી હોય તેવું દ્રશ્ય સર્જાયું હતું. ગાંધીનગર તરફથી આવી રહેલી ફોર્ચ્યુનર કાર અને થાર વચ્ચે થયેલા આ અકસ્માતમાં બંને વાહનો સંપૂર્ણપણે નષ્ટ થયા છે. આ ઘટનામાં કુલ ત્રણ લોકોના મોત થયા છે. અકસ્માતમાં ફોર્ચ્યુનરમાં સવાર બે વ્યક્તિઓ પૈકી એક કારચાલકનું મોત નીપજ્યું છે, જ્યારે અન્ય વ્યક્તિ ગંભીર રીતે ઘાયલ થયો છે. ઘાયલ વ્યક્તિને માથાના ભાગે ગંભીર ઇજા થતાં તાત્કાલિક હોસ્પિટલમાં ખસેડવામાં આવ્યો છે. થાર ચાલક સંજય કાઠીનું પણ મોત થયું છે.