ઉત્તરપ્રદેશમાં એક ચોંકાવનારો કિસ્સો બન્યો છે, જ્યાં સ્થાનિક રહેવાસીઓએ પીએમ આવાસ યોજનાનો હપ્તો ખાતામાં જમા ન કરવા અપીલ કરી રહ્યા છે. જેની પાછળનું કારણ આશ્ચર્યજનક છે. એક બાજુ પીએમ આવાસ યોજનાની મદદથી લાખો કરોડો લોકોને પાક્કા ઘર મળ્યા છે. જ્યારે બીજી બાજુ ઉત્તપ્રદેશના મહારાજગંજ જિલ્લામાં આ યોજનાના વિપરિત પરિણામોના લીધે લોકો હાલ હપ્તો ખાતામાં જમા ન કરવા અપીલ કરી રહ્યા છે.
મહારાજગંજ જિલ્લામાં પીએમ આવાસ યોજનાનો હપ્તો મળતાં જ 11 પત્નિઓ પોતાના પતિને છોડી પ્રેમી સાથે ભાગી ગઈ છે. પીડિત પતિ હવે સરકારી કચેરી જઈ હાલ પીએમ આવાસ યોજનાનો આગામી હપ્તો ખાતામાં જમા ન કરવા અપીલ કરી રહ્યા છે. અધિકારી પણ તે અંગે તૈયારી કરી રહ્યા છે.
મીડિયા સુત્રો અનુસાર, નાણાકીય વર્ષ 2023-24માં ઉત્તર પ્રદેશના મહારાજગંજ જિલ્લાના નિચલૌલ બ્લોકના 108 ગામોમાં 2350 લાભાર્થીઓની પસંદગી કરવામાં આવી હતી. તેમાંથી 90 ટકાથી વધુ લાભાર્થીઓના મકાનો બની ગયા છે. આ લાભાર્થીમાં મહિલાઓ પણ સામેલ છે. આ અંતર્ગત બ્લોક વિસ્તારના થુથીબારી, શિતલાપુર, ચટિયા, રામનગર, બકુલડીહા, ખેશારા, કિશુનપુર અને મેધૌલી ગામના લોકોએ પણ લાભ લીધો હતો. આ ગામોની 11 લાભાર્થી મહિલાઓ દેશભરમાં ચર્ચાનો વિષય બની છે. પીએમ આવાસ યોજનાના પ્રથમ હપ્તા પેટે 11 મહિલાઓના ખાતામાં રૂ. 40,000 આવતાની સાથે જ તેઓ તેમના પતિને છોડી રૂ. 40,000 લઈ પ્રેમીઓ સાથે ભાગી ગઈ છે.
યોજનાના નિયમો અનુસાર, જો કોઈ લાભાર્થી પીએમ આવાસ યોજના હેઠળ મળેલી રકમનો ઉપયોગ અન્ય જગ્યાએ કરે છે. આવી સ્થિતિમાં સરકાર પાસે પૈસા વસૂલવાનો અધિકાર છે. આથી પૈસા લઈને પત્નીઓ પ્રેમી સાથે ભાગી ગઈ હતી. પ્રશાસને હવે તેમની પાસેથી પૈસા વસૂલવાની પ્રક્રિયા શરૂ કરી છે.
આ કોઈ નવી વાત નથી. આ પહેલા પણ પીએમ આવાસનો પ્રથમ હપ્તો લઈ બારાબંકી જિલ્લાની નગર પંચાયત બેલહારા, બાંકી, ઝૈદપુર અને સિદ્ધૌરની ચાર મહિલા લાભાર્થીઓ ફરાર થઈ હતી. પીએમ હાઉસિંગ માટે રૂ. 50,000નો પ્રથમ હપ્તો મળતાં જ તે તેના પ્રેમીઓ સાથે ભાગી ગઈ હતી. નગર પંચાયત ફતેહપુરની બે મહિલાઓ પણ પીએમ આવાસ યોજનાના લાભાર્થી હતી. પહેલો હપ્તો મળતા જ આ બંને મહિલાઓ પોતાના પતિને છોડીને પ્રેમી સાથે ભાગી ગઈ હતી.