તર્કહીન જીએસટીની સીધી અસર દેશના અર્થ વ્યવસ્થા પર, જીડીપી દર ૫ આંકના તળિયે પહોચ્યો : એઆઈસીસી પ્રવક્તા મોહન કુમારમંગલમ્

કોર્પોરેટ ટેક્સના પ્રત્યેક રૂ. ૫ માટે, સરકારે એક્સાઇઝ ટેક્સના રૂ. ૪ વસૂલ્યા,૨૦૨૩-૨૪માં કોર્પોરેશન ટેક્સના GST વધીને ૧૩૭% થયો. કોર્પોરેશન ટેક્સના પ્રત્યેક રૂ. ૫ માટે, મોદી સરકાર હવે જીએસટીના રૂ. ૭ વસૂલે છે: આગામી કેન્દ્રીય બજેટમાં GST 2.0 લાવે

અમદાવાદ

કેન્દ્રની ભાજપા સરકારની આર્થિક નીતિઓ ખાસ કરીને જી.એસ.ટી.ના અમલીકરણમાં અનેક વિસંગતતાઓ, ગેરરીતિઓને લીધે ઉભી થયેલી વિકટ આર્થિક પરિસ્થિતિ સાથે સતત આર્થિક વિકાસ વૃધ્ધિદરમાં પીછેહઠ, રૂપિયાનું અવમુલ્યન સહિત આર્થિક મોરચે સદંતર નિષ્ફળતા પર આજરોજ રાજીવ ગાંધી ભવન ખાતે પત્રકાર પરિષદને સંબોધન કરતા અખિલ ભારતીય કોંગ્રેસ સમિતિના પ્રવક્તા મોહન કુમારમંગલમ્ એ જણાવ્યું હતું કે, તર્કહીન જીએસટીની સીધી અસર દેશના અર્થ વ્યવસ્થા પર પડી છે. જીડીપી દર ૫ આંકના તળિયે પહોચ્યો છે. ઐતિહાસિક રીતે પહેલી વાર કોર્પોરેટ ટેક્ષ ઘટયો જ્યારે વ્યક્તિગત ટેક્ષ વધી ગયો છે. સામાન્ય મધ્યમ વર્ગ હવે પર્સનલ લોન લેવા મજબૂર બન્યો છે. કેન્દ્ર સરકાર ધનવાનોની, ધનિકો દ્વારા, ધનવાનો માટેની સરકાર છે. આ એક એવી સરકાર છે જે ગરીબ, સામાન્ય અને મધ્યમવર્ગ વિરોધી છે. ડૉ.મનમોહનસિંહનાં વિત્તમંત્રીના કાર્યકાળ દરમિયાન દેશમાં લાગુ કરવામાં આવેલ આર્થિક ઉદારીકરણની નીતિનો લાભ તમામ ભારતીય લોકોને, વ્યાપારીઓની, ઉદ્યોગ સાહસિકોને મળ્યો હતો પરંતુ છેલ્લા દસ વર્ષમાં દેશમાં અણઘડ જીએસટીનાં અમલીકરણને કારણે નાના વ્યાપારીઓ, સામાન્ય મધ્યમ વર્ગ અસહ્ય મુશ્કેલીનો સામનો કરી રહ્યો છે જ્યારે અમુક માનીતા કોર્પોરેટ ગૃહને લાભ મળી રહ્યો છે. GST એ વપરાશ પરનો કર છે. ગરીબો તેમની મોટાભાગની આવકનો ઉપયોગ કરે છે, જ્યારે અમીરો તેમની આવકનો મોટો હિસ્સો બચાવે છે. પરિણામે GST ગરીબોને વધુ અસર કરે છે. ૨૦૨૧-૨૨માં કુલ GSTનો લગભગ બે તૃતીયાંશ અથવા ૬૪% વસ્તી નીચેની ૫૦% વસ્તીમાંથી આવ્યો હતો. ટોચના ૧૦%માંથી માત્ર ૩% GST આવે છે. તે ગરીબો પરનો ટેક્સ છે જે સતત વધી રહ્યો છે. જીવન અને આરોગ્ય વીમો જેવી આવશ્યક સેવાઓ પર GST દર – બાળકો અને વરિષ્ઠ નાગરિકો માટે મહત્વપૂર્ણ – ૧૮% છે. મોદી સરકાર દર વર્ષે રેકોર્ડ બ્રેક કલેક્શનનો દાવો કરીને લોકો પાસેથી કેટલી રકમ લીધી તેની ઉજવણી કરે છે. પરંતુ જ્યારે શ્રીમંતોની વાત આવે છે, ત્યારે તેણે ૨૦૧૯માં રૂ. ૨ લાખ કરોડના કોર્પોરેટ ટેક્સમાં ઘટાડો કર્યો હતો. ૨૦૧૩-૪માં કોર્પોરેટ ટેક્સની આવકના ૮૨% એક્સાઇઝ અને સર્વિસ ટેક્સ કલેક્શન હતું. કોર્પોરેટ ટેક્સના પ્રત્યેક રૂ. ૫ માટે, સરકારે એક્સાઇઝ ટેક્સના રૂ. ૪ વસૂલ્યા હતા. ૨૦૨૩-૨૪માં કોર્પોરેશન ટેક્સના GST વધીને ૧૩૭% થયો. કોર્પોરેશન ટેક્સના પ્રત્યેક રૂ. ૫ માટે, મોદી સરકાર હવે જીએસટીના રૂ. ૭ વસૂલે છે.

પીએમ મોદી અબજોપતિ/અરબપતિઓ માટે કરવેરા કાપ આપે છે, અને ગરીબ અને મધ્યમ વર્ગ માટે કરમાં વધારો કરવાનું સુનિશ્ચિત કરે છે. GSTને સમજવું અશક્ય બન્યું છે. ૨૧ ડિસેમ્બરે વિત મંત્રીએ વિવિધ પ્રકારના પોપકોર્ન પર ત્રણ જુદા જુદા દર – 5%, 12% અને 18% – લાદવાના અતાર્કિક નિર્ણય કર્યો. ભૂતપૂર્વ મુખ્ય આર્થિક સલાહકાર અરવિંદ સુબ્રમણ્યમ, GSTના આર્કિટેક્ટ્સમાંના એક, આને “રાષ્ટ્રીય દુર્ઘટના ગણાવી છે, GST જે ગુડ એન્ડ સિમ્પલ ટેક્સ બનવાનો હતો તેની ભાવનાનું ઉલ્લંઘન કરે છે”. વિવિધ ઉત્પાદનો માટે 0%, 0.25%, 1.5%, 3%, 7.5% અને 28%નો સમાવેશ કરીએ તો હાલમાં કુલ નવ GST દરો છે. જો આપણે વાહનો, લક્ઝરી ચીજવસ્તુઓ, તમાકુ વગેરે પર સેસ રેટ ઉમેરીએ, તો સુબ્રમણ્યમે પોતે કહ્યું છે: “ત્યાં ૫૦ (અલગ અલગ) સેસ દરો છે”. આ એક પ્રકારની મૂંઝવણ ઊભી કરે છે. જેણે ગ્રાહકોને ભ્રમિત કરે છે અને નાના ઉદ્યોગો માટે વેપાર કરવું મુશ્કેલ બનાવે છે. પરંતુ આ મૂંઝવણનો ફાયદો કોઈને થઈ રહ્યો છે. ડિરેક્ટોરેટ જનરલ ઑફ GST ઇન્ટેલિજન્સ (DGGI) દ્વારા કરવેરા છેતરપિંડી અંગેનો તાજેતરનો ડેટા અક્ષમતાનું પ્રમાણ અને તિજોરીને થયેલ નાણાકીય નુકશાન દર્શાવે છે.

કોંગ્રેસ પક્ષના રાષ્ટ્રીય પ્રવક્તાશ્રી મોહન કુમારમંગલમ્ એ જણાવ્યું હતું કે, ૨૦૨૩-૨૪માં ૨લાખ કરોડ રૂપિયાની GST ચોરી થઈ જે ચિંતાજનક બાબત છે, જે ૨૦૨૩-૨૪માં ૧ લાખ કરોડ રૂપિયાની ચોરી કરતાં બમણી હતી ઇનપુટ ટેક્સ ક્રેડિટ છેતરપિંડી સામાન્ય છે, અને રૂ. ૩૫,૧૩૨ કરોડની છેતરપિંડી ઓળખવામાં આવી હતી, જેની વસૂલાત દર માત્ર ૧૨% થયો. ૧૮૦૦૦ છેતરપિંડી કરનાર એકમોનો પર્દાફાશ કરવામાં આવ્યો હતો, જેમને કરચોરીમાં રૂ. ૨૫૦૦૦ કરોડની ચોરી કરી હતી. આવી હજારો વધુ કંપનીઓ સંભવતઃ શોધાયેલ નથી. પૂર્વ PM ડૉ. મનમોહન સિંહે 2017માં કહ્યું હતું કે કૉંગ્રેસ પાર્ટીએ GSTને સમર્થન આપ્યું હતું, પરંતુ “યોગ્ય કાળજી અને પૂરતી તૈયારી કર્યા પછી તેનો અમલ કર્યો હોત. 2024ની લોકસભા ચૂંટણી માટેના તેના ન્યાય પત્રમાં, કોંગ્રેસ પાર્ટીએ રિફ્રેશ અને સરળ GST 2.0 માટે હાકલ કરી હતી. તાજેતરના મહિનાઓમાં, મોદી સરકારે કોંગ્રેસના મેનિફેસ્ટોની ઘણી દરખાસ્તોની નકલ કરી છે અને કંપનીઓ માટે રોજગાર-સંબંધિત પ્રોત્સાહનો અને બેરોજગાર યુવાનો માટે એપ્રેન્ટિસશિપ પ્રોગ્રામ લાવ્યા છે. હવે સમય આવી ગયો છે કે કેન્દ્ર સરકાર અમારા મેનિફેસ્ટોમાંથી બીજો વિચાર ચોરીને આગામી કેન્દ્રીય બજેટમાં GST 2.0 લાવે.

રાજીવ ગાંધી ભવન ખાતે આયોજિત વિશેષ પત્રકાર પરિષદમાં ગુજરાત પ્રદેશ કોંગ્રેસ સમિતિના ઉપપ્રમુખશ્રી બિમલ શાહ, મીડીયા કન્વીનર અને પ્રવક્તા ડૉ. મનિષ દોશી, પ્રવક્તાશ્રી હિરેન બેન્કર, મહામંત્રીશ્રી નઈમ મીરઝા, સીએ મેહુલ પટેલ, હિમાંશુ પટેલ ઉપસ્થિત રહ્યા હતા.