- હોન્ડા સિટી કારમાં ભત્રીજી સાથે નીકળ્યા બાદ બંને ગુમ થઈ જતાં પરિવાર ચિંતાતુર અને મામલો ટોક ઓફ ધ ટાઉન બન્યો’તો
- છ વર્ષની બાળકી સાથે ફઈ ગુમ થઈ જતાં દોડતી થયેલી શહેર આખાની પોલીસને હાશકારો
અપહરણ, પારિવારિક ડખ્ખો કે મિલ્કત વિવાદ? પૂછપરછ બાદ અનેક ઘટસ્ફોટ થવાના એંધાણ: ક્રાઇમ બ્રાન્ચની ટીમ બંનેને લઇ રાજકોટ આવવા રવાના
શહેરમાં છેલ્લા અઠવાડિયાથી ટોક ઓફ ધ ટાઉન બનેલ બનાવમાં ખોજા વેપારીની પુત્રી 6 વર્ષની ભત્રીજીને લઈ ભેદી રીતે લાપતા થઈ જતાં શહેર ભરની પોલીસ ઊંધા માથે થઈ હતી અને શહેરની બાહોશ પોલીસે ફઈ-ભત્રીજીને મધ્યપ્રદેશના ઇન્દોરમાંથી હેમખેમ શોધી કાઢી ત્યાંથી રાજકોટ લાવવા રવાના થઈ હતી.
રાજકોટથી નીકળ્યા બાદ મોરબી સુધી હોન્ડા સીટી કાર દેખાઈ હતી. જે બાદ તેની સાથે રહેલ શખ્સ તેમને ઇન્દોર સુધી લઈ ગયાનું પ્રાથમિક સામે આવી રહ્યું છે. હવે સાથે રહેલો શખ્સ કોણ ? પરિવારને પ્રેશર આપવા તરકટ રચ્યું કે કેમ? તે અંગે પોલીસ રાજકોટ તેઓને લઈ આવ્યાં બાદ વધું વિગતો સામે આવશે.
પ્રાપ્ત વિગત મુજબ, રૈયા રોડ પર આવેલ અલ્કાપુરી મેઈન રોડ પર રહેતાં ખોજા વેપારીની 44 વર્ષીય પુત્રી રિમાબેન માખણી ગઈ તા.24 ના સાંજના સમયે પોતાના ઘરેથી તેમની છ વર્ષની ભત્રીજી અનાયા માખણીને લઈ ઘર બહાર પાર્ક કરેલ હોન્ડા સીટી કાર લઈ ત્યાંથી નીકળી ગયાં હતાં. જે બાદ મોડી રાત સુધી તેઓ પરત ન આવતાં પરિવારે તેમની શોધખોળ આદરી હતી. પરંતુ તેમના કોઈ સગળ મળ્યાં ન હતાં. જેથી પરિવાર ગાંધીગ્રામ પોલીસ મથકે પહોંચ્યો હતો અને બનાવની જાણ કરી હતી.
પોલીસે પણ બનાવની ગંભીરતા પારખી તુરંત તપાસ આદરી હતી. ત્યારે બીજી તરફ પોલીસ કમિશ્નર બ્રજેશકુમાર ઝા અને એડી. સીપી મહેન્દ્ર બગરિયાએ પણ તપાસના આદેશ આપતાં ડિસીપી ક્રાઈમ ડો. પાર્થરાજસિંહ ગોહિલ અને ડીસીપી જગદીશ બાંગરવાના માર્ગદર્શન હેઠળ ક્રાઈમ બ્રાન્ચ, પેરોલ ફર્લો સ્કોડ, એએચટીયું અને ગાંધીગ્રામ પોલીસની અલગ અલગ ટીમોએ અલગ અલગ દિશામાં તપાસ આદરી હતી.
ત્યારે ક્રાઈમ બ્રાંચની ટીમને ટેકનીકલ સોર્સથી ઈન્દોરનું પગેરુ મળતાં એક ટીમ ઈન્દોર પહોચી ગઈ હતી અને ટીમ ફઈ-ભત્રીજીની નજીક હોવાની વાત તેમની સાથે રહેલ શખ્સને હ્યુમન સોર્સથી મળી ગઈ હતી. જેથી તે ફઈ-ભત્રીજીને ઇન્દોર નજીકના વિસ્તારમાં મૂકી કાર લઈ નાસી છૂટ્યો હતો.
જે બાદ એકલી પડી ગયેલા યુવતીએ એક ટેક્સી ચાલકને મોબાઈલમાંથી તેના ભાઈને કોલ કર્યો હતો અને પોતે ઇન્દોર હોવાની અને ભત્રીજી સાથે સહી સલામત હોવાની વાત કરી હતી. જેથી બનાવની જાણ થતાં યુવતીના ભાઈએ તુરંત જ ગાંધીગ્રામ પોલીસ મથકના પીઆઈ એસ.આર. મેઘાણીને કરી હતી અને તે ગંભીરતાને ધ્યાને લઇ પીઆઇએ તુરંત જ તે ટેક્સીવાળા મારફતે યુવતી સાથે વાત કરી હતી. જે બાદ તે બાબતે ઉચ્ચ અધિકારીઓને વાફેક કરવામાં આવ્યાં હતાં.
દરમિયાન ક્રાઈમ બ્રાન્ચની એક ટીમ ગુમશુદા ફઈ-ભત્રીજીને શોધી કાઢવા એમપી ખાતે જ હોય તેમને જાણ કરાતાં તેઓ પણ બેટમાં પોલીસ મથક વિસ્તારમાં પહોંચી ફઈ-ભત્રીજી સુધી પહોંચી જઈ બંનેને લઈ ટીમ રાજકોટ રવાના થઈ હતી.
એક તરફ ગાંધીગ્રામ, એલસીબી અને ક્રાઈમ બ્રાન્ચની ટીમને તપાસ દરમિયાન યુવતી જે કાર લઈ નીકળી તે મોરબી સુધી જોવા મળી હોવાનું પ્રાથમિક સામે આવ્યું હતું. હવે યુવતી રાજકોટ પહોંચે તે બાદ જ અતિ ચર્ચાસ્પદ બનાવની વિગતો સામે આવી શકે છે. પ્રાથમિક પરિવારીક કે મિલકત વિવાદ હોવાની સંભાવના સેવાઈ રહી છે.
ગાંધીગ્રામ, ક્રાઇમ બ્રાન્ચ, એલસીબી, પેરોલ ફર્લો, એએચટીયુ શાખાની પોલીસે તપાસમાં ઝુકાવ્યું’તું
- પોલીસ કમિશનર, ડીસીપી સહિતના ઉચ્ચ અધિકારીઓ સતત મોનીટરીંગ કરી રહ્યા’તા
ખોજા પરીવારની 44 વર્ષીય ફઈ અને છ વર્ષીય ભત્રીજીને સાથે લઈ ગુમ થઈ જતાં ચકચાર મચી ગઈ હતી અને પરિવાર સાથે શહેરભરમાં ચિંતા પ્રસરી હતી. ત્યારે શહેર પોલીસ કમિશ્નર બ્રજેશકુમાર ઝા, એડી. સીપી મહેન્દ્ર બગરીયા, ડીસીપી ક્રાઈમ ડો. પાર્થરાજસિંહ ગોહિલ, ડીસીપી જગદીશ બાંગરવા અને એસીપી ક્રાઈમ ભરત બસીયાના માર્ગદર્શન હેઠળ ક્રાઈમ બ્રાન્ચ પીઆઇ એમ.આર.ગોંડલીયા, એમ.એલ.ડામોર, સી એચ જાદવ અને ગાંધીગ્રામ પીઆઇ એસ.આર.મેઘાણી તેમજ પેરોલ ફર્લોની અલગ અલગ ટીમો બનાવી છેલ્લા સાત દિવસથી રાત-દિવસ મહેનત કરી બનાવનો ભેદ ઉકેલવામાં સફળતા મળી હતી.
પખવાડિયાથી ચાલતા પારિવારિક ડખ્ખામાં અજાણ્યા શખ્સની એન્ટ્રી: પ્રિ પ્લાનિંગ સાથે આખેઆખો ઘટનાક્રમ સર્જાયો?
પોલીસ સુત્રોમાંથી જાણવા મળતી વિગત મુજબ 44 વર્ષીય રીમાને છેલ્લા પખવાડિયાથી પારિવારીક માથાકૂટ ચાલતી હતી. જેમાં મિલકત અથવા રૂપિયા મેળવવા માટે માથાકૂટ થયા બાદ યુવતીએ કોઈ અજાણ્યા શખ્સની મદદ લીધી હતી અને પ્રી પ્લાનિંગથી પરિવારને પ્રેસર આપવા માટે કાવતરું ઘડ્યાની પ્રાથમિક આશંકા સેવાઈ રહી છે પણ હવે રીમા માખણીની પૂછપરછ બાદ જ દૂધનું દૂધ અને પાણીનું પાણી થશે.