હરિયાણાના ગોહાનાથી હત્યાનો એક સનસનાટીભર્યો કિસ્સો સામે આવ્યો છે, જ્યાં 23 વર્ષીય નર્સિંગની વિદ્યાર્થિનીની તેના જ પરિવારે નિર્મમતાથી હત્યા કરી દીધી. આ ઘટનાએ સમગ્ર વિસ્તારને હચમચાવી દીધો છે. મૃતકની ઓળખ ચીનુ તરીકે થઈ છે, જે નર્સિંગનો અભ્યાસ કરતી હતી. જણાવવામાં આવી રહ્યું છે કે, તે બીજી જ્ઞાતિના છોકરાને પ્રેમ કરતી હતી અને તેની સાથે લગ્ન કરવા માગતી હતી, જ્યારે પરિવારજનો તેના લગ્ન પોતાની જ જ્ઞાતિમાં કરવા માગતા હતા.
આ બાબતને લઈને પરિવારમાં વિવાદ ચાલી રહ્યો હતો.
ઘટના દરમિયાન ચીનુએ ખતરો પારખીને પોલીસ ડાયલ 112 પર કોલ કરીને મદદ માગી હતી. માહિતી મળતા જ મહિલા પોલીસકર્મીઓ ઘટનાસ્થળે પહોંચ્યા હતા, પરંતુ આ દરમિયાન આરોપી પિતાએ પોલીસની સામે જ દીકરી પર હુમલો કરી દીધો હતો. એવું કહેવામાં આવી રહ્યું છે કે, વારદાત દરમિયાન ભાઈએ પગ પકડ્યા હતા અને પિતાએ ચાકુથી દીકરીનું ગળું રહેંસી નાખ્યું હતું.
પિતા અને ભાઈએ મળીને કરી દીકરીની હત્યા
માહિતી મુજબ, પિતાએ ધારદાર હથિયારથી પોતાની જ દીકરીનું ગળું કાપી નાખ્યું. ઘરની અંદર થયેલી આ ઘટનાથી આખો વિસ્તાર સ્તબ્ધ થઈ ગયો હતો. લોહીલુહાણ હાલતમાં યુવતીને બચાવવાનો પ્રયાસ કરવામાં આવ્યો હતો, પરંતુ ત્યાં સુધીમાં તેનું મોત થઈ ચૂક્યું હતું. પોલીસ તપાસમાં સામે આવ્યું કે, આ હત્યામાં પિતાની સાથે માતા અને ભાઈની ભૂમિકા પણ શંકાસ્પદ છે, જેના આધારે પોલીસે ત્રણેયની ધરપકડ કરી લીધી છે. આરોપીઓની ઓળખ અનિલ, ગીતા અને રાહુલ તરીકે થઈ છે.
આજે પોલીસે મૃતકનું પોસ્ટમોર્ટમ કરાવીને મૃતદેહ સ્વજનોને સોંપ્યો હતો. ધરપકડ કરાયેલા ત્રણેય આરોપીઓને કોર્ટમાં રજૂ કરવામાં આવ્યા હતા, જ્યાંથી તેમને એક દિવસના પોલીસ રિમાન્ડ પર મોકલી દેવામાં આવ્યા છે. જીતેન્દ્ર ગહલાવતે જણાવ્યું કે, હત્યાનો ગુનો નોંધી લેવામાં આવ્યો છે.
પોલીસે ત્રણ આરોપીઓની કરી ધરપકડ
પોલીસ હવે રિમાન્ડ દરમિયાન સમગ્ર ઘટનાક્રમ અને હત્યા પાછળના કારણોની ઊંડાણપૂર્વક તપાસ કરી રહી છે. આ ઘટના બાદ દેવીનગર વિસ્તારમાં ભય અને રોષનો માહોલ છે. લોકો એ સમજી નથી શકતા કે કઈ પરિસ્થિતિમાં એક પિતા પોતાની જ દીકરીનો જીવ લેવા પર ઉતરી આવ્યો. હાલમાં પોલીસ દરેક પાસાથી તપાસમાં લાગેલી છે, જેથી આ મામલાનું સત્ય સામે આવી શકે.