અમદાવાદ મ્યુનિસિપલ કોર્પોરેશન (AMC) દ્વારા આર્થિક રીતે નબળા વર્ગ (EWS) અને લો ઇન્કમ ગ્રુપ (LIG) માટે બનાવાયેલા આવાસો અંગે એક અત્યંત કડક અને મહત્વપૂર્ણ નિર્ણય લેવામાં આવ્યો છે. આ યોજના હેઠળ ફાળવવામાં આવેલા મકાનોનો મૂળ હેતુ જળવાઈ રહે અને વાસ્તવિક લાભાર્થીઓને જ એનો લાભ મળે તે માટે હાઉસિંગ કમિટીએ કડક નીતિ અમલમાં મૂકી છે.
સર્વે દરમિયાન અસંખ્ય મકાનમાલિકો મકાન ભાડે આપી દેતા હોવાનું સામે આવતાં હવે સીલિંગ અને ભારે દંડ સહિતની કાનૂની કાર્યવાહી કરવાની સ્પષ્ટ ચેતવણી આપવામાં આવી છે.
તાજેતરમાં જ અમદાવાદ મ્યુનિસિપલ કોર્પોરેશનની ‘હાઉસિંગ ઇમ્પ્રુવમેન્ટ અને EWS આવાસ યોજના સમિતિ’ દ્વારા હાથ ધરાયેલા એક સર્વેમાં ચોંકાવનારી હકીકત સામે આવી હતી. યોજના હેઠળ ઓછી આવક ધરાવતા પરિવારોને આપવામાં આવેલા અનેક EWS અને LIG આવાસોમાં મૂળ માલિકો રહેવાને બદલે મકાનો અન્ય લોકોને ભાડે આપી દેવામાં આવ્યા હતા. આવાસ યોજનાના નિયમોના આ સ્પષ્ટ ભંગને ગંભીરતાથી લઈને સમિતિના ચેરમેન દર્શન શાહે નિયમોને વધુ કડક બનાવવાની જાહેરાત કરી છે.
નવા નિયમો મુજબ કરાનારી કડક કાર્યવાહી:
મકાન સીલ અને 90 દિવસનો સમયગાળો: જો કોઈ EWS કે LIG આવાસ ભાડે આપેલું જણાશે, તો તે મકાન તુરંત જ સીલ કરી દેવામાં આવશે. નવી નીતિ મુજબ, દંડની રકમ ભરી દીધા પછી પણ સીલ કરાયેલું મકાન 90 દિવસ સુધી ખોલવામાં આવશે નહીં.
₹50,000 સુધીનો દંડ: સમિતિએ દંડની રકમમાં પણ ધરખમ વધારો કર્યો છે. કેસની ગંભીરતા અને નિયમોના ભંગના આધારે હવે ₹1,000થી લઈને મહત્તમ ₹50,000 સુધીનો દંડ ફટકારવામાં આવશે.
ત્રીજી વખત નિયમભંગ પર સિવિલ કોર્ટમાં દાવો: જો કોઈ મકાનમાલિક ત્રીજી વખત આવાસ ભાડે આપતા પકડાશે, તો AMC દ્વારા તેની સામે સીટી સિવિલ કોર્ટમાં દાવો દાખલ કરીને કાનૂની કાર્યવાહી કરવામાં આવશે.
કોર્પોરેશનના આ નિર્ણયથી ગેરકાયદેસર રીતે ભાડે આપવામાં આવેલા આવાસો પર અંકુશ આવશે અને સરકારની આ યોજનાનો સાચો લાભ માત્ર અને માત્ર જરૂરિયાતમંદ અને વાસ્તવિક લાભાર્થીઓ સુધી જ પહોંચશે.