પાલિતાણા તાલુકાના રાજસ્થળી ગામની રાજસ્થળી વીડીમાં થયેલા ગેરકાયદે વૃક્ષ કાપવાના ચકચારી કેસમાં બે ફોરેસ્ટ ગાર્ડને ગુજરાત હાઈકોર્ટમાંથી જામીન મંજૂર કરવામાં આવ્યા છે. જોકે, હાઈકોર્ટે બંનેને અનોખી શરત સાથે જામીન આપ્યા છે. બંને ફોરેસ્ટ ગાર્ડે પોતાના ખર્ચે કુલ 1,700 વૃક્ષો વાવવાના રહેશે.
કેસમાં આરોપી ફોરેસ્ટર કરશન ગોહિલ અને બીટ ગાર્ડ કલ્પેશ ડાભીએ 850-850 વૃક્ષો વાવવાના રહેશે.
હાઈકોર્ટની શરત મુજબ બંનેએ રાજસ્થળી બીટના જંગલ વિસ્તારમાં આગામી 15 દિવસમાં આ વૃક્ષારોપણ પૂર્ણ કરવાનું રહેશે. એટલું જ નહીં, વાવેલા વૃક્ષોની ત્રણ વર્ષ સુધી પોતાના ખર્ચે જાળવણી પણ કરવાની રહેશે.
1,690થી વધુ વૃક્ષો કાપવાનો આરોપ
સમગ્ર મામલો રાજસ્થળી વીડીના જંગલ વિસ્તારમાંથી મોટા પ્રમાણમાં વૃક્ષો કાપવામાં આવ્યા હોવાના આક્ષેપ બાદ સામે આવ્યો હતો. પાલિતાણા ફોરેસ્ટ રેન્જ હેઠળ આવતી રાજસ્થળી વીડી આશરે 563 હેક્ટરમાં ફેલાયેલી છે અને આ વિસ્તાર સિંહો સહિત અનેક વન્યજીવો માટે મહત્વપૂર્ણ રહેઠાણ અને કોરિડોર તરીકે ઓળખાય છે.
પ્રાથમિક તપાસમાં અંદાજે 1,690 જેટલા વૃક્ષો ગેરકાયદે રીતે કાપવામાં આવ્યા હોવાનો મામલો સામે આવ્યો હતો. આ વૃક્ષોમાંથી મેળવાયેલું લાકડું વેચીને લાખો રૂપિયાનો ગેરકાયદે વ્યવહાર કરવામાં આવ્યો હોવાના આક્ષેપો પણ થયા હતા.
ટ્રક ઝડપાતા સમગ્ર મામલો બહાર આવ્યો
ગત 9 મે, 2026ના રોજ ગેરકાયદે રીતે કાપવામાં આવેલા લાકડાથી ભરેલી એક ટ્રક ઝડપાતા સમગ્ર મામલો પ્રકાશમાં આવ્યો હતો. શરૂઆતમાં આને એક અલગ ઘટના માનવામાં આવી હતી, પરંતુ તપાસ આગળ વધતાં રાજસ્થળી વીડીના અનામત વિસ્તારમાંથી મોટા પાયે વૃક્ષો કાપવામાં આવ્યા હોવાની વિગતો બહાર આવી હતી.
આ મામલે વન વિભાગે ફોરેસ્ટર, બીટ ગાર્ડ, ટ્રક માલિક તેમજ વૃક્ષ કાપવામાં સંકળાયેલા મજૂરો સામે કાર્યવાહી કરી હતી. કરશન ગોહિલ અને કલ્પેશ ડાભીને સસ્પેન્ડ પણ કરવામાં આવ્યા હતા અને બંનેની ધરપકડ કરવામાં આવી હતી.
હવે હાઈકોર્ટે બંને ફોરેસ્ટ ગાર્ડને જામીન આપતા તેમની સામે 1,700 વૃક્ષોના વાવેતર અને ત્રણ વર્ષ સુધી તેની જાળવણીની શરત મૂકી છે. આ કેસમાં ગેરકાયદે વૃક્ષ કાપણી પાછળ અન્ય કોઈની સંડોવણી હતી કે નહીં અને કાપવામાં આવેલું લાકડું ક્યાં પહોંચાડવામાં આવ્યું હતું તે અંગેની તપાસ આગામી સમયમાં વધુ મહત્વપૂર્ણ બની શકે છે.