બેંકિંગ ડેટા અને એરપોર્ટ સેવાઓ સુરક્ષિત: વાઇ-ફાઇ અને પાર્કિંગ યુઝર્સના ફોન-ઇમેઇલ લીક થતાં ચેતવણી
યુનાઇટેડ કિંગડમના સૌથી મોટા એરપોર્ટ ઓપરેટર માન્ચેસ્ટર એરપોર્ટ્સ ગ્રુપ પર એક મોટો સાયબર હુમલો થયો છે, જેમાં આશરે 87 લાખ મુસાફરોની સંવેદનશીલ અંગત માહિતી જાહેર થઈ ગઈ છે. આ ગ્રુપ યુકેના ત્રણ મુખ્ય હવાઈ મથકો-માન્ચેસ્ટર, લંડન સ્ટેનસ્ટેડ અને ઈસ્ટ મિડલેન્ડ્સ એરપોર્ટનું સંચાલન કરે છે.
આ ત્રણેય એરપોર્ટ પરથી વિતેલા એક વર્ષમાં 5.4 કરોડથી વધુ મુસાફરોએ પ્રવાસ કર્યો હતો.
‘ધ ગાર્ડિયન’ના અહેવાલ અનુસાર, આ હેકિંગ હુમલામાં એરપોર્ટની વિવિધ સેવાઓ જેવી કે કાર પાર્કિંગ બુકિંગ, પ્રીમિયમ લાઉન્જ એક્સેસ, ફાસ્ટ-ટ્રેક સિક્યુરિટી પાસ અને ટર્મિનલ વાઇ-ફાઇ રજિસ્ટ્રેશનનો ઉપયોગ કરનારા ગ્રાહકોના રેકોર્ડ પ્રભાવિત થયા છે. હેકરોએ ગ્રાહકોના ઇમેઇલ આઇડી, ટેલિફોન નંબર, સરનામાના પિન કોડ અને વાહનોના રજિસ્ટ્રેશન નંબર જેવા અંગત ઓળખકર્તાઓ મેળવી લીધા છે. જોકે, માન્ચેસ્ટર એરપોર્ટ્સ ગ્રુપે સત્તાવાર સ્પષ્ટતા આપતાં જણાવ્યું છે કે જે ડેટાબેઝ પર હુમલો થયો હતો તેમાં ગ્રાહકોના નાણાકીય રેકોર્ડ કે બેંકિંગ વિગતો સંગ્રહિત કરવામાં આવતી ન હતી, તેથી નાણાકીય સુરક્ષા જોખમાઈ નથી. આ ઉપરાંત, ગ્રુપે ભારપૂર્વક જણાવ્યું છે કે એરપોર્ટની ભૌતિક સુરક્ષા, વિમાની સેવાની સુરક્ષા કે રોજિંદા કામકાજ પર આ ઘટનાની કોઈ અસર પડી નથી અને ફ્લાઇટ શિડ્યુલ સામાન્ય રીતે કાર્યરત છે.
આ ઘટના બાદ એરપોર્ટ તંત્રે અસરગ્રસ્ત મુસાફરો માટે એક માર્ગદર્શિકા જાહેર કરીને સાવચેત રહેવા વિનંતી કરી છે. કંપનીના નામે આવતા શંકાસ્પદ ઇમેઇલ, ફોન કોલ કે મેસેજથી દૂર રહેવા જણાવાયું છે. કંપનીએ સ્પષ્ટ કર્યું છે કે તેઓ ક્યારેય પણ અનઅપેક્ષિત રીતે ગ્રાહકો પાસે નાણાકીય વિગતો માંગતા નથી.
ઘટનાની જાણ થતાં જ ગ્રુપની ટેકનિકલ ટીમે સ્વતંત્ર સાયબર સુરક્ષા નિષ્ણાતો સાથે મળીને સિસ્ટમની ખામીને તાત્કાલિક અલગ કરી દીધી હતી. આ સમગ્ર મામલે સંબંધિત સરકારી સત્તામંડળોને રિપોર્ટ કરવામાં આવ્યો છે અને ગ્રાહકોના ડેટાની સુરક્ષા માટે યોગ્ય પગલાં લેવામાં આવી રહ્યા છે. નોંધનીય છે કે, આ સાયબર હુમલો એવા સમયે થયો છે જ્યારે થોડા દિવસો પહેલા જ ઈરાન સાથે જોડાયેલા હેકરોએ યુકેના પાવર ગ્રિડ સેન્ટરને લક્ષ્ય બનાવ્યું હતું.