સોશિયલ મીડિયા પર અત્યારે મધ્ય પ્રદેશના 20 વર્ષના એક છોકરાની ખૂબ ચર્ચા છે. તેનું નામ આમ તો સુરેન્દ્ર સિંહ ચૌધરી છે, પણ સોશિયલ મીડિયા પર તે બિટ્ટુ તબાહીના નામે ઓળખાય છે. અત્યારે તે તબાહી માટે નહીં પણ સ્વચ્છતાની ઝુંબેશને લીધે જાણીતો થયો છે. રાજગઢ વ્યાવરાની અજનાર નદીને સાફ કરવા માટે આ છોકરાએ એકલા જ હાથે મોટું અભિયાન શરૂ કર્યું.નદીની પહેલાંની અને અત્યારની હાલત જોઈને બધા લોકો ચોંકી ગયા છે.
આ કોઈ સામાન્ય કામ નહોતું. આ વર્ષે 26મી જાન્યુઆરીથી તેણે આ ઝુંબેશની શરૂઆત કરી હતી. નદીની હાલત એટલી ખરાબ હતી કે ચારેય તરફ જાડી લીલ જામી ગઈ હતી અને પ્લાસ્ટિકની બોટલોનો તો પૂરો ખડકલો થઈ ગયો હતો. સૌથી મોટો ડર તો એ હતો કે આ ગંદકીમાં ઝેરી સાપ નીકળવાનો પણ મોટો ખતરો હતો. અને અસલી રોમાંચક વાત તો એ છે કે આ બિટ્ટુ તબાહીને તો તરતા પણ નથી આવડતું. છતાં તેણે પોતાના જીવની પરવા કર્યા વગર આ કામ ચાલુ રાખ્યું.
આટલી ગંદકીમાં કામ કરવાના કારણે તેના હાથ અને પગમાં ગંભીર ઇન્ફેક્શન પણ થઈ ગયું હતું. પગમાં ખંજવાળ અને મોટી મોટી ફોલ્લીઓ થઈ ગઈ હતી, છતાં આ બહાદુર છોકરાએ એક પણ સેકન્ડ માટે હાર ન માની. પીડા સહન કરીને પણ તે નદીને ચોખ્ખી કરતો રહ્યો. તેણે એના માટે સાધનો ખરીદવા પોતાના 30 હજાર રૂપિયા પણ ખર્ચ્યા હતા. તેની આ ઝુંબેશ જોઈને આખો દેશ તેની પ્રશંસા કરી રહ્યો છે. મધ્ય પ્રદેશના મુખ્યમંત્રી ડૉ. મોહન યાદવે પણ ખાસ તેને ભોપાલ બોલાવીને તેની પીઠ થાબડી છે. ક્યારેય કોઈ મદદ વગર એક સામાન્ય છોકરો પણ ધારે તો આખી નદીનું નસીબ બદલી શકે છે, તે બિટ્ટુએ સાબિત કરી બતાવ્યું છે.
સોશિયલ મીડિયા પર આવા વીડિયો જોઈને માત્ર લાઈક કરીને અટકી જવાનું નથી. બિટ્ટુ તબાહી જેવા લોકો પાસેથી પ્રેરણા લઈને આપણે પણ આપણા શહેર, આપણી ગલીઓ અને આપણી નદીઓને સાફ રાખવા માટે આગળ આવવું જોઈએ. ચાલો, આજે જ નક્કી કરીએ કે આપણે પણ આપણા વિસ્તારમાં સફાઈની આવી જ કોઈ પહેલ શરૂ કરીશું.