હાલના ડિજિટલ યુગમાં સાયબર ફ્રોડના કિસ્સાઓ સતત વધી રહ્યા છે, ત્યારે અમરેલી સાયબર પોલીસે એક મોટા આંતરરાજ્ય કૌભાંડનો પર્દાફાશ કર્યો છે. SD pay અને APNA pay નામની એપ્લિકેશન મારફતે ઊંચા વળતરની લાલચ આપીને લાખો લોકો સાથે છેતરપિંડી આચરવાના ષડયંત્રમાં અમરેલી પોલીસે અત્યાર સુધીમાં 9 આરોપીઓની ધરપકડ કરી છે. અમરેલીના ડીવાયએસપી (DySP) જયવીર ગઢવીએ મીડિયાને માહિતી આપતા જણાવ્યું હતું કે, આ એપના યુઝર્સ મારફતે અંદાજે 1211 કરોડ રૂપિયાનું બેલેન્સ જમા થયું હતું, જેને હાલ પોલીસ દ્વારા ફ્રીઝ કરી દેવામાં આવ્યું છે.આ કરોડો રૂપિયાના ષડયંત્રના મુખ્ય સૂત્રધાર અને એપના માલિક ધવલ પટેલ (રહે. મહેસાણા) અને હિરેન શાહને ઓડિશાના સંભલપુરમાંથી ઝડપી પાડવામાં આવ્યા છે. આ બંને માસ્ટરમાઈન્ડને ઓડિશાથી ફ્લાઇટ મારફતે અમરેલી લાવવામાં આવ્યા હતા. આરોપી ધવલ પટેલને નામદાર કોર્ટ સમક્ષ રજૂ કરતા કોર્ટે 21 તારીખ સુધીના પોલીસ રિમાન્ડ મંજૂર કર્યા છે. સમગ્ર મામલાની ઊંડાણપૂર્વક અને ઝડપી તપાસ કરવા માટે અમરેલી જિલ્લા પોલીસ વડા સંજય ખરાત દ્વારા એક ખાસ ‘SIT’ (સ્પેશિયલ ઇન્વેસ્ટિગેશન ટીમ) ની રચના કરવામાં આવી છે. આ ઉપરાંત અન્ય રાજ્યોમાં તપાસ માટે અલગ અલગ ટીમો પણ બનાવવામાં આવી છે. આ કેસમાં નરેન્દ્ર સોલંકી નામનો અન્ય એક આરોપી હાલ ફરાર છે, જેની સઘન શોધખોળ ચાલુ છે.
15 લાખ યુઝર્સ અને વ્યાપક નેટવર્ક
અમરેલી પોલીસે આ ફ્રોડ એપ્લિકેશનના લગભગ 15 લાખ યુઝર્સના ડેટાનું બારીકાઈથી એનાલિસિસ કર્યું છે. સાયબર પોલીસે અત્યાર સુધીમાં 6 લાખ 53 હજાર યુઝર્સનો ડેટા મેળવી લીધો છે અને અન્ય યુઝર્સની માહિતી મેળવવાની પ્રક્રિયા હજુ પણ ચાલુ છે. ચોંકાવનારી બાબત એ છે કે આ એપના સૌથી વધુ 1 લાખ 52 હજાર યુઝર્સ માત્ર ગુજરાતમાં જ છે. આ ઉપરાંત રાજસ્થાન, મહારાષ્ટ્ર, ઉત્તરપ્રદેશ, બિહાર, કર્ણાટક અને હરિયાણા સહિતના અનેક રાજ્યોમાં પણ આ છેતરપિંડીનો ભોગ બનેલા યુઝર્સ મળી આવ્યા છે. આ એપ સાથે કુલ 12 લાખ લોકોને જોડવાની યોજના હોવાનો ખુલાસો પણ તપાસમાં થયો છે.
મોડસ ઓપરેન્ડી: લોકોને કેવી રીતે ફસાવ્યા?
પોલીસની તપાસમાં ખૂલ્યું છે કે આરોપીઓ શરૂઆતમાં લોકોને ઊંચા વળતરની લાલચ આપીને રોકાણ કરાવવા માટે વિવિધ સ્થળોએ મોટા સેમિનાર યોજતા હતા. લોકોને ફસાવવા માટે એજન્ટોને ખાસ ટ્રેનિંગ પણ આપવામાં આવતી હતી. ત્યારબાદ સેમિનાર બંધ કરીને ઝૂમ (Zoom) મીટિંગ દ્વારા લોકોને આ નેટવર્કમાં જોડવાનું શરૂ કરવામાં આવ્યું હતું. આ ઝૂમ મીટિંગનું સંચાલન કરનાર ભાવેશ ધનેશા નામના શખ્સની પણ અમરેલી પોલીસે ધરપકડ કરી લીધી છે.
સંપત્તિની તપાસ અને પીડિતો માટે અપીલ
અમરેલી પોલીસ દ્વારા આ કૌભાંડમાં સંકળાયેલા આરોપીઓની મિલકતો જેવી કે ગોલ્ડ, વાહનો, બેન્ક લોકર, ફ્લેટ, જમીન અને બેન્ક એકાઉન્ટના નાણાકીય વ્યવહારોની સઘન તપાસ હાથ ધરવામાં આવી છે. હાલના પ્રાથમિક તબક્કે જ 634 કરોડ રૂપિયાથી વધુના નાણાકીય વ્યવહારો સામે આવ્યા છે. રિમાન્ડ દરમિયાન હજુ પણ મોટા આર્થિક ખુલાસા થવાની પૂરેપૂરી શક્યતા છે.
પોલીસે અત્યાર સુધીમાં ગુજરાત અને અન્ય રાજ્યોના 240 થી વધુ લોકોના નિવેદનો નોંધ્યા છે. જે ભોગ બનનાર પીડિતો અમરેલી સુધી રૂબરૂ આવી શકતા નથી, તેમની સુવિધા માટે અમરેલી જિલ્લા પોલીસના સત્તાવાર પેજ પર ત્રણ ભાષામાં એક ગૂગલ ફોર્મ (Google Form) ઉપલબ્ધ કરાવવામાં આવ્યું છે, જેથી તેઓ પોતાની વિગતો સરળતાથી નોંધાવી શકે. અમરેલી પોલીસે લોકોને ખાસ અપીલ કરી છે કે સોશિયલ મીડિયામાં ફરતી કોઈપણ ઓડિયો ક્લિપ, અફવા કે ગેરમાર્ગે દોરતી માહિતી પર વિશ્વાસ ન કરવો અને કોઈ પણ શંકાસ્પદ બાબત જણાય તો સીધો પોલીસનો સંપર્ક કરવો.