અમેરિકી રાજકારણ અને મીડિયા જગતમાં એક મોટા વિકાસક્રમમાં, ડિસ્ટ્રિક્ટ જજ ટીમ કેલીએ રાષ્ટ્રપતિ ડોનાલ્ડ ટ્રમ્પને મોટો આંચકો આપતા CNN, MSNBC અને Politico પર લગાવેલો પ્રતિબંધ રદ્દ કર્યો છે. અદાલતે વ્હાઈટ હાઉસમાં (CNN White House ban)આ મીડિયા સંસ્થાઓનો પ્રવેશ પુનઃસ્થાપિત કરવાનો આદેશ આપ્યો છે.સાથે જ, ટ્રમ્પ પ્રશાસનને આ મીડિયા આઉટલેટ્સના પ્રેસ પાસ તાત્કાલિક પરત કરવા અને આગામી 14 દિવસ સુધી કોઈપણ પ્રકારનો નવો પ્રતિબંધ લાગુ કરવાથી રોકવામાં આવ્યા છે.
અદાલતમાં સુનાવણી દરમિયાન જજ કેલીએ સરકારના તે દાવાને સદંતર ફગાવી દીધો હતો કે રાષ્ટ્રીય સુરક્ષાની ચિંતાઓને કારણે આ પ્રતિબંધ લગાવવામાં આવ્યો હતો. જજે સ્પષ્ટ કર્યું કે રેકોર્ડ પર એવો કોઈ તથ્યાત્મક આધાર નથી જે દર્શાવે કે વાદીઓના હાર્ડ પાસ રદ કરવાથી રાષ્ટ્રીય સુરક્ષાનું રક્ષણ થશે અથવા પાસ પુનઃસ્થાપિત કરવાથી કોઈ ખતરો ઊભો થશે. ઉલટાનું, ખુદ રાષ્ટ્રપતિ ટ્રમ્પે સ્વીકાર્યું હતું કે આ આઉટલેટ્સ દ્વારા રિપોર્ટિંગમાં કથિત સત્યતાની કમી અને નકારાત્મકતાના કારણે આ પ્રતિબંધ મૂકવામાં આવ્યો હતો.
મીડિયા આઉટલેટ્સના વકીલોએ અદાલતમાં દલીલ કરી હતી કે કોઈ પણ કાનૂની પૂર્વ સૂચના (નોટિસ) આપ્યા વિના કે નિર્ણયને પડકારવાની તક આપ્યા વિના જ અચાનક પ્રતિબંધ મૂકી દેવામાં આવ્યો હતો, જે અમેરિકી બંધારણના પ્રથમ સુધારા (First Amendment) હેઠળ મળેલા અભિવ્યક્તિની સ્વતંત્રતા, પ્રેસની સ્વતંત્રતા અને યોગ્ય પ્રક્રિયાના અધિકારોનું સીધું ઉલ્લંઘન છે. આ સંદર્ભમાં ન્યૂઝ સંગઠનોએ વોશિંગ્ટનની ફેડરલ કોર્ટમાં કેસ દાખલ કર્યો હતો.
બીજી તરફ, ડોનાલ્ડ ટ્રમ્પે સોશિયલ મીડિયા પર પ્રતિક્રિયા આપતા દાવો કર્યો હતો કે આ આઉટલેટ્સે સતત મનઘડંત વાતો અને અસત્ય ફેલાવવાનું બંધ કરવું જોઈએ. નોંધનીય છે કે આ હાઈ-પ્રોફાઈલ કાનૂની લડાઈ એવા સમયે સામે આવી છે જ્યારે આગામી 3 નવેમ્બરે યુએસ મધ્યસત્ર ચૂંટણી યોજાવાની છે, જેમાં ટ્રમ્પની રિપબ્લિકન પાર્ટી યુએસ કોંગ્રેસ પર પોતાનું નિયંત્રણ જાળવી રાખવા માટે સંઘર્ષ કરી રહી છે.