કેન્દ્રીય શ્રમ અને રોજગાર મંત્રાલય હેઠળના લેબર બ્યુરો દ્વારા જૂન 2026 સુધીના ઓલ ઈન્ડિયા કન્ઝ્યુમર પ્રાઇસ ઇન્ડેક્સ (AICPI-IW) ના સત્તાવાર આંકડા જાહેર કરી દેવામાં આવ્યા છે. આ આંકડાઓના આધારે ગણતરી કરતા 1 જુલાઈ, 2026 થી મોંઘવારી ભથ્થા (DA) અને મોંઘવારી રાહત (DR) માં 3% નો સીધો વધારો થવાની સંપૂર્ણ સંભાવના છે. આ વધારા સાથે કેન્દ્રીય કર્મચારીઓનું વર્તમાન DA 60% થી વધીને સીધું 63% થઈ જશે.કેન્દ્ર સરકાર દ્વારા વર્ષમાં બે વખત-જાન્યુઆરી અને જુલાઈમાં-ઔદ્યોગિક કામદારો માટેના રિટેલ ભાવ સૂચકાંક (CPI-IW) ના આધારે મોંઘવારી ભથ્થામાં સુધારો કરવામાં આવે છે. જુલાઈ 2026 ના DA સુધારણા માટે પાછલા 12 મહિના એટલે કે જુલાઈ 2025 થી જૂન 2026 સુધીના CPI-IW ડેટાની ગણતરી પૂરી થઈ ગઈ છે. આ સમગ્ર ચક્ર દરમિયાન 12 મહિનાનો સરેરાશ ઈન્ડેક્સ 148.65 નોંધાયો છે.ઉલ્લેખનીય છે કે કેન્દ્ર સરકારે એપ્રિલ 2026 માં મળેલી કેબિનેટ બેઠકમાં 1 જાન્યુઆરી, 2026 થી લાગુ થનારા DA માં 2% નો વધારો મંજૂર કર્યો હતો. જેના પગલે ભથ્થું 58% થી વધીને 60% થયું હતું. હાલમાં દેશના તમામ કેન્દ્રીય કર્મચારીઓ અને પેન્શનરોને 60% ના દરે જ ભથ્થું ચૂકવવામાં આવી રહ્યું છે. હવે કોન્ફેડરેશન ઓફ સેન્ટ્રલ ગવર્નમેન્ટ એમ્પ્લોઈઝ એન્ડ વર્કર્સ (CCGEW) સહિતના વિવિધ કર્મચારી સંગઠનો આગામી સુધારાની સત્તાવાર જાહેરાતની આતુરતાપૂર્વક પ્રતીક્ષા કરી રહ્યા છે.કેન્દ્ર સરકારની પરંપરા રહી છે કે નવરાત્રિ, દુર્ગા પૂજા, દશેરા કે દિવાળી જેવા મોટા તહેવારો પૂર્વે જ કર્મચારીઓ માટે ખુશખબર જાહેર કરવામાં આવે છે. તે મુજબ, વડાપ્રધાનના વડપણ હેઠળ મળનારી કેન્દ્રીય કેબિનેટની બેઠકમાં ઓક્ટોબર 2026 ના પ્રથમ કે બીજા અઠવાડિયામાં આ 3% વધારા પર આખરી મહોર મારવામાં આવે તેવી પૂરી શક્યતા છે.કેબિનેટ મંજૂરી મળતાં જ નાણા મંત્રાલયનું ખર્ચ વિભાગ આ અંગેનું વિધિવત જાહેરનામું બહાર પાડશે. આ સુધારો 1 જુલાઈ, 2026 થી પશ્ચાતવર્તી અસરથી લાગુ થશે. તેથી કર્મચારીઓને ઓક્ટોબર મહિનાના પગાર સાથે જુલાઈ, ઓગસ્ટ અને સપ્ટેમ્બર એમ 3 મહિનાનું બાકી રહેલું એરિયર્સ પણ એકસાથે રોકડમાં જમા મળશે. તહેવારોના ટાણે પગાર અને પેન્શનમાં થનારો આ નાણાકીય વધારો કર્મચારીઓના ઘરબજેટને મોટી રાહત આપશે.