વલાદમાં ગરનાળાનું સમારકામ એક માસથી બંધ: ગામનો RCC રોડ પણ અટકી ગયોવલાદ ગામે સિંચાઈ વિભાગ દ્વારા હાથ ધરવામાં આવેલા ગરનાળાના સમારકામની કામગીરી છેલ્લા એક મહિનાથી બંધ છે. કામગીરી અધૂરી હોવા છતાં હજુ સુધી ફરી શરૂ કરવામાં આવી નથી.
બીજી તરફ, કોન્ટ્રાક્ટર પોતાનાં સાધનો લઈને સ્થળ પરથી રવાના થઈ ગયો હોવાની માહિતી સામે આવી છે.
કોન્ટ્રાક્ટરનું બિલ પાસ ન થતાં મજૂરો કામ છોડીને જતા રહ્યા હોવાની ચર્ચા વચ્ચે હવે સમારકામ ક્યારે પૂર્ણ થશેતેવા સવાલો ઊભા થયા છે. ગરનાળાનું કામ અટકી પડતાં ગ્રામ પંચાયત દ્વારા હાથ ધરવામાં આવેલા RCC રોડનું કામ પણ અધવચ્ચે અટકી ગયું છે.
વલાદ ગામે સિંચાઈ વિભાગ દ્વારા ગરનાળાના સમારકામની કામગીરી શરૂ કરવામાં આવી હતી, પરંતુ કામ પૂર્ણ થાય તે પહેલાં જ કામગીરી બંધ થઈ જતાં સ્થળ પર ખોદકામ, માટી અને કાટમાળના ઢગલા સાથે અધૂરા બાંધકામની સ્થિતિ જોવા મળી રહી છે.
એક મહિનાનો સમય વીતી ગયો હોવા છતાં કામ ફરી શરૂ ન થતાં કામગીરીની સમયમર્યાદા અને જવાબદારી અંગે સવાલો ઊઠી રહ્યા છે.
આ અંગે વલાદ ગ્રામ પંચાયતના સરપંચ હોથાજી કાળાજી ઠાકોરે ટેલિફોનિક વાતચીતમાં જણાવ્યું હતું કે, છેલ્લા એક મહિનાથી સિંચાઈ વિભાગના ગરનાળાના સમારકામનું કામ બંધ છે. તેના કારણે ગામના RCC રોડનું કામ પણ અટકી ગયું છે.
રોડનું કામ ગરનાળા પાસે આવીને અટકી ગયું હોવાથી સિંચાઈ વિભાગ દ્વારા સમારકામ પૂર્ણ કરવામાં આવે ત્યાર બાદ જ આગળની કામગીરી થઈ શકે તેમ છે. આમ, સિંચાઈ વિભાગની કામગીરી અધૂરી રહેતાં ગ્રામ પંચાયતના રોડના કામ પર પણ અસર પડી રહી છે.ગરનાળાનું સમારકામ પૂર્ણ ન થાય ત્યાં સુધી રોડનું બાકીનું કામ આગળ વધારવામાં મુશ્કેલી ઊભી થઈ છે. પરિણામે, ગામના રસ્તાની કામગીરી ક્યારે પૂર્ણ થશે તે અંગે પણ અનિશ્ચિતતા ઊભી થઈ છે.
કોન્ટ્રાક્ટરના માણસો દ્વારા બિલ પાસ ન થતાં મજૂરો કામ છોડીને જતા રહ્યા હોવાની વાત કરવામાં આવી રહી છે. જોકે, બિલ ખરેખર બાકી છે કે નહીં અને કામગીરી બંધ થવા પાછળનું ચોક્કસ કારણ શું છે તે અંગે સિંચાઈ વિભાગ તરફથી સત્તાવાર સ્પષ્ટતા સામે આવી નથી.
કોન્ટ્રાક્ટર સાધનો લઈને સ્થળ પરથી રવાના થઈ ગયો હોવાની માહિતી વચ્ચે કામગીરી ફરી ક્યારે શરૂ થશે તે પણ સ્પષ્ટ નથી.