ગુજરાતના મુખ્યમંત્રી ભૂપેન્દ્ર પટેલ હંમેશાં પોતાના સરળ અને લોકભોગ્ય સ્વભાવ માટે જાણીતા છે. રાજ્યના વિકાસ કાર્યો અને વ્યસ્ત રાજકીય શિડ્યુલ વચ્ચે પણ તેઓ પોતાના પરિવાર માટે સમય કાઢવામાં ક્યારેય પાછળ રહેતા નથી. તાજેતરમાં, દિવાળીના પવિત્ર તહેવારની પૂર્વસંધ્યાએ મુખ્યમંત્રી ભૂપેન્દ્ર પટેલ એકદમ સામાન્ય નાગરિકની જેમ પોતાના પરિવારજનો અને બાળકો સાથે અમદાવાદની સડકો પર જોવા મળ્યા હતા, જેણે સૌનું ધ્યાન ખેંચ્યું હતું.મળતી માહિતી અનુસાર, મુખ્યમંત્રી ભૂપેન્દ્ર પટેલ પોતાના પરિવાર સાથે અમદાવાદના જાણીતા બોડકદેવ વિસ્તારમાં આવેલા એક લોકપ્રિય આઈસક્રીમ પાર્લર પર પહોંચ્યા હતા. દિવાળીના તહેવારની ખુશીઓ વચ્ચે પરિવાર સાથે સમય વિતાવવા માટે તેમણે આ ખાસ પળ પસંદ કરી હતી. કોઈ પણ પ્રકારના મોટા રાજકીય કાફલા કે પ્રોટોકોલ વગર, એક સામાન્ય પરિવારની જેમ તેઓ આઈસક્રીમની દુકાને પહોંચ્યા અને પોતાના પરિવાર સાથે આઈસક્રીમની મજા માણી હતી. એટલું જ નહિ મુખ્યમંત્રીને પોતાની વચ્ચે અચાનક આ રીતે સામાન્ય અંદાજમાં જોઈને આસપાસના નાગરિકો અને ગ્રાહકો પણ ચોંકી ગયા હતા અને ખુશ થઈ ગયા હતા.
સામાન્ય રીતે મોટા નેતાઓને સુરક્ષાના કડક ઘેરામાં જોવાની ટેવ ધરાવતા લોકો માટે મુખ્યમંત્રીનું આ સાદું સ્વરૂપ એક મોટું આશ્ચર્ય હતું. આ દરમિયાન આઈસક્રીમ પાર્લર પર ઉપસ્થિત યુવાનો, બાળકો અને સ્થાનિક નાગરિકોએ મુખ્યમંત્રી ભુપેન્દ્ર પટેલ સાથે વાતચીત કરી હતી અને તેમની સાથે સેલ્ફી પણ પડાવી હતી. મુખ્યમંત્રીએ પણ ખૂબ જ હસમુખા સ્વભાવે સૌની સાથે સેલ્ફી પડાવી અને નાગરિકોના અભિવાદનનો સ્વીકાર કર્યો હતો. મુખ્યમંત્રી ભૂપેન્દ્ર પટેલની આ સાદગી અને લોકભોગ્ય શૈલી જોઈને ત્યાં ઉપસ્થિત લોકોમાં ભારે ઉત્સાહ અને ખુશી જોવા મળી હતી.
સોશિયલ મીડિયા પર પણ આ ઘટનાની તસવીરો અને વીડિયો ખૂબ જ વાયરલ થઈ રહ્યા છે, જ્યાં લોકો મુખ્યમંત્રીના આ સાદગીભર્યા વ્યવહારની મુક્તકંઠે પ્રશંસા કરી રહ્યા છે. વ્યસ્તતા વચ્ચે પણ પરિવારને સમય આપવો અને સામાન્ય નાગરિકોની વચ્ચે હળવાશની પળો વિતાવવી એ ભૂપેન્દ્ર પટેલના લોકપ્રિય નેતૃત્વની આગવી ઓળખ બની ગઈ છે. આ ઘટના ફરી એકવાર સાબિત કરે છે કે સત્તાના સર્વોચ્ચ સ્થાને હોવા છતાં જમીન સાથે જોડાયેલા રહેવું અને પોતાના પરિવાર તેમજ જનતા સાથે હૃદયથી જોડાયેલા રહેવું એ જ સાચા નેતૃત્વની લાક્ષણિકતા છે