મોંઘવારીના મારથી પરેશાન સામાન્ય જનતાને અમૂલ દ્વારા વધુ એક ઝટકો આપવામાં આવ્યો છે. દૂધ, ઘી અને દહીં સહિતની ડેરી પ્રોડક્ટ્સના ભાવમાં વધારો કર્યા બાદ હવે છાશના પેકેટમાં પણ આડકતરી રીતે ભાવવધારો કરવામાં આવ્યો છે. અમૂલે છાશના પેકેટની કિંમત યથાવત રાખીને તેની અંદર આવતી માત્રામાં ઘટાડો કર્યો છે. એટલે કે ગ્રાહક અગાઉ જેટલા જ રૂપિયા ચૂકવશે, પરંતુ હવે તેને ઓછી છાશ મળશે.બીજી તરફ મસ્તી દહીં અને રોઝ લસ્સીના ભાવમાં પણ વધારો થતાં ગૃહિણીઓ અને મધ્યમવર્ગીય પરિવારોના બજેટ પર વધુ બોજ પડ્યો છે.
ભાવ વધાર્યા વગર છાશની માત્રામાં ઘટાડો
સામાન્ય રીતે કોઈ વસ્તુ મોંઘી થાય ત્યારે તેના ભાવમાં સીધો વધારો કરવામાં આવે છે. જોકે, અમૂલ દ્વારા છાશના પેકેટની કિંમતમાં ફેરફાર કર્યા વગર પેકિંગની માત્રા ઘટાડવામાં આવી છે. આ પ્રકારની ભાવવધારાની પદ્ધતિને ‘શ્રિંકફ્લેશન’ તરીકે ઓળખવામાં આવે છે.
ગ્રાહકોને પેકેટ પર અગાઉની જેમ જ કિંમત ચૂકવવી પડે છે, પરંતુ તેની સામે મળતી છાશનું પ્રમાણ ઓછું થઈ ગયું છે. ખાસ કરીને રોજિંદા વપરાશમાં છાશ ખરીદતા પરિવારો માટે આ ફેરફારની સીધી અસર જોવા મળશે.
અમૂલની કઈ છાશમાં કેટલો ઘટાડો થયો?
અમૂલનાં અલગ-અલગ પેકિંગમાં છાશની માત્રા ઘટાડવામાં આવી હોવાના અહેવાલો સામે આવ્યા છે.
રૂ. 20નું છાશનું પાઉચ: અગાઉ 650 ML મળતી છાશ હવે 620 ML મળશે. એટલે કે 30 MLનો ઘટાડો.
રૂ. 5ની જીરા છાશ: અગાઉ 150 ML મળતી હતી, જે હવે ઘટીને 140 ML થઈ છે. એટલે કે 10 MLનો ઘટાડો.
રૂ. 10નું છાશનું પેકેટ: અગાઉ 300 ML મળતી છાશ હવે 280 ML મળશે. એટલે કે 20 MLનો ઘટાડો.
આ ફેરફારને કારણે ગ્રાહકોને સમાન કિંમત ચૂકવીને ઓછું ઉત્પાદન મળી રહ્યું છે.
દહીંના ભાવમાં પણ વધારો, રૂ. 80માંથી રૂ. 85 થયા
છાશ ઉપરાંત અમૂલની દહીંની પ્રોડક્ટ્સના ભાવમાં પણ વધારો નોંધાયો છે. અમૂલ મસ્તી દહીંના 1 કિલોના પેકિંગનો ભાવ રૂ. 80થી વધારીને રૂ. 85 કરવામાં આવ્યો છે.
એ જ રીતે 380 ગ્રામના મસ્તી દહીંના પેકેટનો ભાવ રૂ. 35થી વધારીને રૂ. 37 કરવામાં આવ્યો છે. દહીં જેવી રોજિંદા વપરાશની વસ્તુ મોંઘી થતાં પરિવારોના માસિક કરિયાણાના ખર્ચમાં પણ વધારો થવાની શક્યતા છે.
રોઝ લસ્સી પણ મોંઘી, રૂ. 15ના બદલે હવે રૂ. 17
અમૂલની લોકપ્રિય રોઝ લસ્સીના ભાવમાં પણ વધારો કરવામાં આવ્યો છે. અગાઉ રૂ. 15માં મળતી રોઝ લસ્સી હવે રૂ. 17માં મળશે. આમ, દહીંની સાથે લસ્સી ખરીદતા ગ્રાહકોને પણ હવે વધુ રૂપિયા ખર્ચવા પડશે.
દૂધ, ઘી અને અન્ય ડેરી પ્રોડક્ટ્સના ભાવવધારાથી બજેટ ખોરવાયું
અમૂલની વિવિધ ડેરી પ્રોડક્ટ્સના ભાવમાં થયેલા ફેરફારથી ગૃહિણીઓની ચિંતા વધી છે. દૂધ, દહીં, ઘી, છાશ અને લસ્સી જેવી વસ્તુઓ ભારતીય પરિવારોના રોજિંદા આહારનો મહત્વનો ભાગ છે. આવી સ્થિતિમાં એક પછી એક પ્રોડક્ટ મોંઘી થવાથી ઘરખર્ચનું ગણિત બગડી રહ્યું છે.
ખાસ કરીને ગરીબ અને મધ્યમવર્ગીય પરિવારો માટે છાશ અને દહીં માત્ર સ્વાદની નહીં, પરંતુ રોજિંદા ભોજનની જરૂરી વસ્તુઓ છે. હવે ભાવ યથાવત રાખીને માત્રા ઘટાડવામાં આવતાં ગ્રાહકોમાં નારાજગી જોવા મળી રહી છે.
ગ્રાહકોનો સવાલ : કિંમત સરખી તો માત્રા કેમ ઘટી?
અમૂલના આ નિર્ણય બાદ ગ્રાહકોમાં એક સવાલ ચર્ચાઈ રહ્યો છે કે જો પેકેટની કિંમત યથાવત રાખવામાં આવી છે તો તેની માત્રામાં ઘટાડો શા માટે કરવામાં આવ્યો? ગ્રાહકોની એવી અપેક્ષા છે કે કંપનીએ પેકિંગમાં થતા ફેરફાર અંગે સ્પષ્ટ માહિતી આપવી જોઈએ, જેથી ખરીદી કરતી વખતે તેમને યોગ્ય જાણકારી મળી રહે.
એકંદરે, દૂધ અને દહીંના ભાવવધારા બાદ છાશની માત્રામાં ઘટાડો અને લસ્સીના વધેલા ભાવે સામાન્ય પરિવારો પર મોંઘવારીનો વધુ એક બોજ નાખ્યો છે. હવે અમૂલની આ નીતિ સામે ગ્રાહકોની પ્રતિક્રિયા કેવી રહે છે તે જોવું રહ્યું.
