પીએમ નરેન્દ્ર મોદીએ આજે G20 ડિજિટલ અર્થતંત્ર મંત્રીઓની બેઠકને વર્ચ્યુઅલ રીતે સંબોધિત કરી હતી. તેમના સંબોધનમાં પીએમ મોદીએ ભારતના ઝડપી ડિજિટાઇઝેશન વિશે વાત કરી. તેમણે કહ્યું કે, ભારતમાં 85 કરોડથી વધુ ઇન્ટરનેટ યુઝર્સ છે, જેઓ વિશ્વમાં સૌથી સસ્તા ડેટાનો લાભ ઉઠાવી રહ્યા છે. પીએમ મોદીએ કહ્યું કે અમે શાસનને વધુ કાર્યક્ષમ, સમાવેશી, ઝડપી અને પારદર્શક બનાવવા માટે ટેક્નોલોજીનો ઉપયોગ કર્યો છે.
બેઠકમાં એક મોટી જાહેરાત કરતા PM એ કહ્યું, અમે AI સંચાલિત ભાષા અનુવાદ પ્લેટફોર્મ ‘ભાષિણી’ બનાવી રહ્યા છીએ. તે ભારતની તમામ વિવિધ ભાષાઓમાં ડિજિટલ સમાવેશને સમર્થન આપશે. ભારતનું ડિજિટલ પબ્લિક ઈન્ફ્રાસ્ટ્રક્ચર વૈશ્વિક પડકારોનો સ્કેલેબલ, સુરક્ષિત અને સમાવિષ્ટ ઉકેલ પૂરો પાડે છે.
પીએમ મોદીએ કહ્યું કે, ભારત ડિજિટલ પેમેન્ટમાં સૌથી આગળ છે. તેમણે કહ્યું કે, વૈશ્વિક રિયલ ટાઈમ ડિજિટલ પેમેન્ટમાંથી 45 ટકા ભારતમાં થાય છે. વડાપ્રધાને વધુમાં જણાવ્યું હતું કે, હવે દેશમાં સરકારી સહાયના લાભો સીધા બેંક ખાતામાં ટ્રાન્સફર કરીને ભ્રષ્ટાચારને કાબૂમાં લેવામાં આવ્યો છે અને 33 બિલિયન ડોલરથી વધુની બચત થઈ છે.