ગાંધીનગરનાં સર્કલ નજીક ગઈકાલે રાતના બાઈક સ્લીપ ખાઈ જવાથી બીએસએફ હેડ ક્વાર્ટરનાં જવાનનું ગંભીર ઈજાઓ થવાથી ગાંધીનગર સિવિલ હોસ્પિટલમાં ટૂંકી સારવાર દરમ્યાન મોત નિપજતા ચીલોડા પોલીસે ગુનો નોંધી કાનૂની કાર્યવાહી હાથ ધરી છે.
ગાંધીનગર બીએસએફ હેડ કવાર્ટરનાં હેડ કોન્સ્ટેબલનું નાની વયે માર્ગ અકસ્માતમાં અકાળે મોત નીપજ્યું છે. ગાંધીનગરના લેકાવાડા બીએસએફ કેમ્પની પાછળ ક્રિશ્ના કોલોનીમાં રહેતા મૂળ રાજસ્થાનના સુનિલકુમાર વર્મા ચીલોડા બીએસએફ હેડ કવાર્ટર ખાતે હેડ કોન્સ્ટેબલ તરીકે ફરજ બજાવતા હતા. ગઈકાલે રાતના સુનીલકુમાર ઘરેથી બાઈક લઈને ગાંધીનગર ખરીદી કરવા માટે નિકળ્યા હતા. અને તેમની પત્ની પ્રીતિબેન ઘરે હાજર હતા.
આ દરમ્યાન સાબરમતી બ્રિજથી સેકટર – 30 સર્કલ તરફ જતાં રોડ ઉપર સુનીલકુમારે પોતાનું બાઇક પૂરપાટ ઝડપે હંકારતા બાઈક સ્લીપ ખાઈ ગયું હતું. અકસ્માત સર્જાતા સુનીલકુમારને શરીરે ગંભીર ઈજાઓ થઈ હતી. જ્યારે અકસ્માત સ્થળે મોટી સંખ્યામાં આસપાસના લોકો એકઠા થઈ ગયા હતા. બનાવની જાણ થતાં ચીલોડા પોલીસ સ્થળ પર પહોંચી ગઈ હતી.
બાદમાં તેમને 108 એમ્બ્યુલન્સ મારફતે ગાંધીનગર સિવિલ હોસ્પિટલ ખસેડવામાં આવ્યા હતા. આથી સુનીલકુમારની સાથે નોકરી કરતાં હરેન્દ્ર યાદવે ફોન કરીને જાણ કરતાં પ્રીતિબેન સિવિલ હોસ્પિટલ દોડી ગયા હતા. જ્યાં ટૂંકી સારવાર દરમ્યાન પતિનું મોત થયાનું જાણીને પ્રીતિબેન શોકમાં ગરકાવ થઈ ગયા હતા. આ અંગે ચીલોડા પોલીસે ગુનો નોંધી કાનૂની કાર્યવાહી હાથ ધરી છે.