રાજસ્થાનમાં ટ્રેનમાં મુસાફરોનો સામાન- સોનાના દોરા તોડી દસથી વધુ ચોરીના ગુના આચરી છેલ્લા બારેક વર્ષથી રાજસ્થાન પોલીસને હાથતાળી આપી નાસતા ફરતા તસ્કરને સેકટર – 21 પોલીસે પૂર્વ બાતમીના આધારે ઘ – 5 પાસેના ઓપન એર થિયેટર નજીકથી ઝડપી પાડ્યો છે. રાજસ્થાન કોર્ટના વોરંટમાં ચોરનો જુવાનીનો ફોટો હતો. જેનાં પરથી પણ સેકટર – 21 પોલીસે અઠંગ ચોરનો ચહેરો વૃદ્ધાવસ્થાનાં કારણે બદલાઈ ગયો છતાં તેની ઓળખ પ્રસ્થાપિત કરી સરાહનીય કામગીરી કરવામાં આવી છે.
ગાંધીનગર રેન્જ આઈજી અને જિલ્લા પોલીસ વડાએ જિલ્લા ઉપરાંત આંતર રાજ્યોમાં ગુના આચરી નાસતા ફરતા આરોપીને ઝડપી પાડવા તાબાનાં અધિકારીઓને ખાસ સૂચનાઓ આપવામાં આવેલી છે. જે અન્વયે રાજસ્થાન કોર્ટ તરફથી જીઆરપી પોલીસ સ્ટેશન આબુ રોડ તેમજ જોધપુર પોલીસ સ્ટેશનમાં નોંધાયેલા દસથી વધુ ચોરીના ગુનામાં મંગલ ઉર્ફે કિરણ રામરતન બાવરીનાં (મૂળ રહે. રાજસ્થાન) ફોટા સાથે સીઆરપીસી – 70 મુજબનું વોરંટ ગાંધીનગર પોલીસને મોકલી આપવામાં આવ્યું હતું.
આ વોરંટના આધારે સેકટર – 21 પોલીસ મથકના પીઆઈ રાકેશ ડામોરની આગેવાનીમાં સર્વેલન્સની ટીમ પોલીસ મથકની હદ વિસ્તારમાં અઠંગ ચોર મંગલ બાવરીનું પગેરૂ શોધવા કામે લાગી હતી. આ દરમ્યાન હેડ કોન્સ્ટેબલ મહાવીરસિંહ કુબેરસિંહ – રતનસિંહ ચતુરસિંહ દ્વારા બાતમીદારોને સક્રિય કરવામાં આવ્યા હતા. જો કે વોરંટમાં મોકલી આપવામાં આવેલા આરોપીના જુવાનીના ફોટો આધારે ઓળખ કરવી આસાન ન હતી. એવામાં બંને કોન્સ્ટેબલને બાતમી મળેલ કે, ફોટામાં દેખાતા આરોપી જેવો એક ઈસમ છેલ્લા દસેક દિવસથી સેકટર – 16 ઘ – 5 પાસેના ઓપન એર થિયેટર નજીકનાં ઝુંપડામાં આવીને રહી રહ્યો છે.
જેનાં આધારે પોલીસે અત્રેના વિસ્તારમાં વોચ ગોઠવીને શંકાસ્પદ જણાઈ આવતાં ઈસમની ઓળખ પ્રસ્થાપિત કરવા કવાયત શરૂ કરી દીધી હતી. આખરે બાતમીદાર તરફથી લીલી ઝંડી મળતા જ ઇલમને ઉઠાવી લઈ ઘનિષ્ઠ પુછતાછ શરૂ કરી હતી. જેણે પોતાનું નામ મંગલ ઉર્ફે કિરણ બાવરી જણાવી ટ્રેનમાં મુસાફરોનો સામાન – દોરા તોડવાના દસથી વધુ ગુનામાં રાજસ્થાન પોલીસને હાથતાળી આપીને નાસતો ફરતો હોવાની વધુમાં કબૂલાત કરી હતી. જે અન્વયે રાજસ્થાન પોલીસ તાબડતોબ ગાંધીનગર આવી ગઈ હતી. અને બારેક વર્ષથી હંફાવનાર મંગલને રાજસ્થાન લઈ જવા રવાના થઈ ગઈ છે.