સરકારી એજન્સી FCI ઓપન માર્કેટ સેલ સ્કીમ હેઠળ 12 ટકા નીચા ભાવે ઘઉંનું વેચાણ કરશે જેથી ભાવને નિયંત્રિત કરી શકાય.
ઘઉંના ભાવમાં વધારો થયા પછી, સરકાર ગ્રાહકોને સસ્તા ભાવે લોટ અને બિસ્કિટ પ્રદાન કરવા માટે લોટ મિલો અને બિસ્કિટ ઉત્પાદક કંપનીઓ જેવા જથ્થાબંધ ગ્રાહકોને તેના અનામતમાંથી ઘઉં વેચવાની તૈયારી કરી રહી છે.
કિંમતો પર અંકુશ રાખવા માટે, કેન્દ્ર સરકારે FCI (ફૂડ કોર્પોરેશન ઓફ ઈન્ડિયા)ને તેની ઈન્વેન્ટરીમાંથી ઘઉં વેચવાની પરવાનગી આપી છે જેથી કરીને બજારમાં ઘઉંનો પુરવઠો વધારી શકાય.
ભારતીય ખાદ્ય નિગમ OMSS હેઠળ ઘઉંનું વેચાણ કરશે. આવતા મહિનાથી, FCI ઘઉંનું વેચાણ રૂ. 23,250 પ્રતિ ટનના ભાવે કરશે, જે બજારમાં વર્તમાન ભાવ કરતાં 12 ટકા સસ્તું છે. જોકે, ઓપન માર્કેટ સેલ સ્કીમ હેઠળ કેટલા ઘઉંનું વેચાણ કરવામાં આવશે તે અત્યારે નક્કી કરવામાં આવ્યું નથી.
ગયા વર્ષે પણ ઘઉંના ભાવમાં વધારો થયા બાદ એફસીઆઈએ બલ્ક ગ્રાહકો અને ખાનગી કંપનીઓને ઘઉંનું વેચાણ કર્યું હતું. નાણાકીય વર્ષ 2023-24 દરમિયાન, FCI એ ખુલ્લા બજારમાં 10 મિલિયન મેટ્રિક ટન ઘઉંનું વેચાણ કર્યું હતું, જે એક રેકોર્ડ છે.
એક અહેવાલ મુજબ, મુંબઈ સ્થિત ગ્લોબલ ટ્રેડિંગ હાઉસ સાથે સંકળાયેલા એક ડીલરે જણાવ્યું હતું કે સસ્તા ભાવે ઘઉં ઓફર કરતી FSIને કારણે ઘણા ખાનગી ખેલાડીઓ મોટી માત્રામાં ઘઉં ખરીદવામાં રસ દાખવી શકે છે. ભારતમાં છેલ્લા એક વર્ષમાં ઘઉંના ભાવમાં 6 ટકાનો વધારો થયો છે. 2022 અને 2023માં વધતા તાપમાનને કારણે ઘઉંના પાકને નુકસાન થયું હતું, ત્યારબાદ મે 2022માં ભારત સરકારે ઘઉંની નિકાસ પર પ્રતિબંધ મૂકવાનો નિર્ણય લીધો હતો, જે હજુ પણ અમલમાં છે.
ચાલુ વર્ષે પણ ઘઉંનું ઉત્પાદન સરકારના 112 મિલિયન મેટ્રિક ટનના અંદાજ કરતાં 6.24 ટકા ઓછું રહ્યું છે. રાજ્યોના વેરહાઉસમાં ઘઉંનો સ્ટોક ઘટીને 29.9 મેટ્રિક ટન થઈ ગયો છે જે ગયા વર્ષે 31.5 મેટ્રિક ટન હતો. જૂન મહિનામાં સરકારે વેપારીઓ માટે ઘઉંના સ્ટોકની મર્યાદા નક્કી કરી હતી. અહેવાલ મુજબ, ઘઉંના સ્ટોકમાં અછત અને કિંમતોને નિયંત્રિત કરવા માટે ભારત છ વર્ષના પ્રતિબંધ પછી ફરીથી ઘઉંની આયાત કરી શકે છે. સરકારે ઘઉંની આયાત પર 40 ટકા ટેક્સ લાદ્યો છે. ટેક્સ હટાવવાથી ખાનગી વેપારીઓ અને ફ્લોર મિલોને રશિયા અને ઓસ્ટ્રેલિયાથી ઘઉંની આયાત કરવાનો માર્ગ ખુલશે.