દુનિયાની કોઇપણ મેચ પર ઓનલાઇન સટ્ટો રમાડતા બૂકીઓને ઝડપી લેવા માટે કવાયત ચાલી રહી છે ત્યારે મહાદેવ ક્રિકેટ બેટિંગ સટ્ટાની એપ પર રમાડવામાં આવેલા કરોડોના સટ્ટા અને તેના હવાલા કેસની તપાસ ચાલી રહી છે.
આ તપાસમાં ઇડીની ટીમે અમદાવાદ, મુંબઇ, જયપુર, ઇન્દોર સહિત ઘણી જગ્યાએ દરોડા પાડયા છે. જેમાં ઘણી વિગતો ખૂલી રહી છે. મહાદેવ એપના કૌભાંડની તપાસમાં અમદાવાદના અને ગુજરાતના ઘણા બૂકીઓની વિગતો અધિકારીઓને મળી હોવાનું જાણવા મળ્યું છે. તેમણે જે હવાલા પાડ્યા હતા તેની પણ તપાસ ચાલી રહી છે.
સૌરભ ચંદ્રા અને રવિ ઉપ્પલ મહાદેવ એપના પ્રમોટર છે. તેમની મહાદેવ એપ પર દેશ અને દુનિયાભરના બૂકીઓ સટ્ટો રમાડી રહ્યા છે. તેમના વિરુદ્ધમાં ફરિયાદો થતાં તેઓ દુબઇ સેટલ થઇ ગયા હોવાનું ચર્ચાઈ રહ્યું છે. તેમના માણસો સટ્ટો રમાડી રહ્યા છે.
ઇડીએ અગાઉ દરોડા પાડીને તપાસ કરી ત્યારે છત્તીસગઢના રાજકીય અગ્રણી અને ઉચ્ચ સરકારી અધિકારીની પણ મહાદેવ એપના કાંડમાં સંડોવણી ખૂલી હોવાનું સૂત્રોએ જણાવ્યું છે. હવે ઇઝ માય ટ્રીપના નિશાંત પિટ્ટીની હવાલાકાંડમાં સંડોવણી હોવાથી તેની ઓફિસ અને ઘર પર દરોડા પાડવા ઉપરાંત દેશભરના બૂકીઓ અને મહાદેવ એપ સાથે સંકળાયેલા તત્ત્વોને ત્યાં તપાસ કરવામાં આવી રફી છે.
ઇડીની ટીમને દરોડા દરમિયાન ઘણી ચોકાવનારી વિગતો મળી છે. ગુજરાત અને અમદાવાદના બુકીઓની વિગતો અને તેમણે પાડેલા હવાલાની વિગતો પણ મળી છે. ઇડીના દરોડા પડતાં જ અમદાવાદના બૂકીઓ અમદાવાદ છોડીને આજુબાજુના શહેરમાં પહોંચી ગયા છે. સટ્ટાકાંડના કેસમાં જ ઇડીએ અમદાવાદમાં દરોડા પડ્યા હોવાની વિગતો મળ્યા બાદ પણ કેટલાક બૂકીઓ બિંધાસ્ત ઓનલાઇન સટ્ટો રમાડતા હતા જે પૈકીના બે વસ્તાત્રાપુરમાં પીસીબીના હાથે ઝડપાઇ ગયા છે.
અમદાવાદ ક્રાઇમ બ્રાંચના તત્કાલીન ડીસીપી ચૈતન્ય માંડલિકની ટીમે પાનના ગલ્લા આગળ બેસી મોબાઇલ પર સટ્ટો રમાડતા એક બૂકીની ધરપકડ કરી હતો. તેના ફોનમાંથી મળેલા બૂકીઓ અને સટોડિયાની વિગતોને આધારે પોલીસે તપાસ કરી તો દુબઇના બૂકીઓ માટ કામ કરતા અમદાવાદના બૂકીઓએ ૯ મહિનામાં જ સટ્ટાના ૧૪૦૦ કરોડના હવાલા પાડયા હતા. આ તપાસના છેડા છેક દુબઇ સુધી પહોંચ્યા હતા. ઉલ્લેખનીય છે કે માધુપુરા પોલીસ અને પીસીબીની ટીમે બે વર્ષ પહેલાં માધુપુરામાં એક ઓફિસમાં દરોડા પાડીને તપાસ શરૂ કરી તે તપાસમાં બે હજાર કરોડના સટ્ટા બેટિંગની વિગતો મળી હતી.
બૂકીઓએ સટ્ટાના હવાલા પાડવા માટે ચોક્ક્સ આંગડિયા પેઢીઓનો ઉપયોગ થતો હોવાનું જાણવા મળ્યું છે. સટ્ટાના હારજીતના રૂપિયા રોજ સવારે હવાલા દ્વારા બૂકીઓના માણસો પાસે પહોંચાડી દેવામાં આવતા હતા. આવા આંગડિયાની વિગતો પણ ડિપાર્ટમેન્ટ દ્વારા એકત્રિત કરીને તેના પર વોચ રાખવામાં આવી રહી છે.