રાજકોટમાં બાંગ્લાદેશી અને પાકિસ્તાની ઘૂસણખોરો સામે પોલીસની કાર્યવાહી બાદ હવે બાળકોની તસ્કરીનું એક મોટું રેકેટ સામે આવ્યું છે. રાજકોટના મોરબી રોડ નજીક આવેલી ગોપાલ રેસિડેન્સીમાં એક મકાનમાં નાના બાળકોને ગોંધી રાખી તેમની પાસે મજૂરી કરાવવામાં આવતી હોવાની ચોક્કસ બાતમીના આધારે ક્રાઈમ બ્રાંચ અને એસઓજીની ટીમે દરોડો પાડ્યો હતો. આ દરોડામાં 20 જેટલા બાળકોને મુક્ત કરાવી એક બંગાળી શખ્સની ધરપકડ કરવામાં આવી હતી.
પોલીસ તપાસમાં સામે આવ્યું કે 12 થી 18 વર્ષની ઉંમરના આ બાળકો પાસે ઇમિટેશનનું કામ કરાવવામાં આવતું હતું.પકડાયેલા આરોપી અજીત ઉલ્લાએ બાબુભાઈ ગોપાલભાઈ બાળાનું મકાન ભાડે રાખી બાળકો પાસે ઇમિટેશનની મજૂરી કરાવતો હતો. તમામ બાળકોને મેડિકલ તપાસ માટે હોસ્પિટલ ખસેડવામાં આવ્યા છે અને આરોપી અજીત ઉલ્લા સામે બાળ અને કિશોર મજૂરી પ્રતિબંધ અને નિયમન અધિનિયમ 1968 હેઠળ ગુનો નોંધી કાર્યવાહી કરાઇ છે. પોલીસે બાળકોના પરિવારજનોને જાણ કરી તેમને સોંપવાની કાર્યવાહી પણ શરૂ કરી છે.પ્રાથમિક તપાસમાં આ રેકેટ આંતરરાજ્ય હોવાનું મનાઈ રહ્યું છે. બંગાળથી બાળકોને ગુજરાત લાવી તેમની પાસે મજૂરી કરાવવા ઉપરાંત ભીખ મંગાવવામાં આવતી હોવાની પણ શંકા વ્યક્ત કરવામાં આવી રહી છે. રાજકોટ ઉપરાંત આ ગેંગ અન્ય કયા રાજ્યોમાં સક્રિય છે અને પકડાયેલ બંગાળી શખ્સ સાથે અન્ય કોણ કોણ સંડોવાયેલું છે તે દિશામાં પણ તપાસ ચાલી રહી છે.
આ મામલે રાજકોટ પોલીસે બંગાળ પોલીસને જાણ કરી છે. પશ્ચિમ બંગાળના વર્ધમાન જિલ્લામાં પણ અજીત ઉલ્લાહ વિરુદ્ધ બાળકો પાસે મજૂરી કરાવવા બાબતે ગુનો નોંધાયેલો હોવાનું અને તે ફરાર હોવાનું સામે આવ્યું છે. બંગાળ પોલીસે આપેલી ચોક્કસ માહિતીના આધારે રાજકોટ ક્રાઈમ બ્રાન્ચ, એસઓજી અને એન્ટી હ્યુમન ટ્રાફિક યુનિટ દ્વારા આ ઓપરેશન પાર પાડવામાં આવ્યું હતું. બંગાળ પોલીસની એક ટીમ રાજકોટ આવી છે અને અજીત ઉલ્લાહનો કબજો મેળવી આ પ્રકરણની ઊંડાણપૂર્વક તપાસ શરૂ કરશે.