ઓડિશાના ભુવનેશ્વરમાં સોમવારે, જાહેર સુનાવણી દરમિયાન કેટલાક લોકોએ ભુવનેશ્વર મ્યુનિસિપલ કોર્પોરેશન (BMC)ના એડિશનલ કમિશનર રત્નાકર સાહુને માર માર્યો હતો. આ હુમલાનો વીડિયો સોશિયલ મીડિયા પર વાયરલ થઈ રહ્યો છે વીડિયોમાં, 6-8 લોકો સાહુને તેની ઓફિસમાંથી ખેંચીને બહાર કાઢતા દેખાય છે. તેઓ અપશબ્દો પણ સંભળાવી રહ્યા છે અને સતત મુક્કા મારી રહ્યા છે. આ દરમિયાન, એક વ્યક્તિ અધિકારીના ચહેરા પર લાત મારે છે. તેઓ શર્ટનો કોલર પકડીને સાહુને ખેંચીને બહાર કાઢી રહ્યા છે અને તે જમીન પર પડી જાય છે. આ કેસમાં અત્યાર સુધીમાં ત્રણ લોકોની ધરપકડ કરવામાં આવી છે. હુમલાના વિરોધમાં, ઓડિશા વહીવટી સેવા (OAS) ના અધિકારીઓ 1 જુલાઈથી સામૂહિક રજા પર રહેશે. OAS એસોસિએશનની બેઠકમાં આ નિર્ણય લેવામાં આવ્યો હતો. આ અંગેની માહિતી તમામ જિલ્લા એકમોને પત્ર લખીને આપવામાં આવી છે. ઘટના બાદ મીડિયા સાથે વાત કરતા સાહુએ કહ્યું, “હું હુમલાખોરોને ઓળખતો નથી. તેઓએ મારી સાથે મારપીટ કરી અને મને કારમાં લઈ જવાનો પ્રયાસ કરી રહ્યા હતા. હું આ અંગે ઉચ્ચ અધિકારીઓને જાણ કરીશ અને ટૂંક સમયમાં FIR નોંધાવવામાં આવશે.” આ દરમિયાન, BMC અધિકારીઓએ ઓફિસ પરિસરમાં ધરણા પર વિરોધ પ્રદર્શન કર્યું. આખો દિવસ કામ થયું ન હતું. કર્મચારીઓની માંગ છે કે ગુનેગારોની વહેલી તકે ધરપકડ કરવામાં આવે. શરૂઆતના અહેવાલો અનુસાર, 6 લોકો સાહુના ચેમ્બરમાં ઘૂસી ગયા અને તેમના પર હુમલો કર્યો હતો. લોકોએ અધિકારી પર હુમલો કેમ કર્યો તે અંગે હજુ સુધી કોઈ સ્પષ્ટ માહિતી નથી. કેટલાક હુમલાખોરોની ઓળખ પણ થઈ નથી.