રામોલ સીટીએમ એક્સ્પ્રેસ વે ટોલબૂથ નજીક વડોદરા તરફથી આવતી ખાનગી ટ્રાવેલ્સ બસમાંથી રૂ. 11.68 લાખના એમડી ડ્રગ અને હેરોઈનના કોમર્શિયલ જથ્થા સાથે જુબેર ઉફે છોટુ લાલા રંગરેજ (ઉ.41)ની બાતમીના આધારે રામોલ પોલીસે ધરપકડ કરી છે. તેની સાથેના સરફરાજ શેખ (રહે. દરિયાપુર) અને શીદીક શેખ (રહે.જુહાપુરા) વોન્ટેડ છે. આ ત્રણેય શખ્સો ભેગા મુંબઈ ગયા હતા અને મુંબઈના રઈસ ઉર્ફે હૈદર પાસેથી એમડી ડ્રગ અને બ્રાઉન હેરોઈનનો જથ્થો ખરીદ્યો હતો. એક્સ્પ્રેસ વે પર વડોદરાથી અમદાવાદ આવતી ખાનગી લક્ઝરી બસમાં એમડી ડ્રગ અને બ્રાઉન હેરોઈનનો કોમર્શીયલ જથ્થો લઈને શખ્સ આવી રહ્યો છે તે પ્રકારની બાતમી રામોલના ઇન્સ્પેક્ટર વી.ડી. મોરી અને સેકન્ડ ઇન્સ્પેક્ટર બી.પી સાવલિયાને મળી હતી. પીએસઆઈ આર.બી. રબારી અને સ્ટાફે તેના આધારે બસને રોકી તપાસ કરતા 42 વર્ષીય જુબેર ઉર્ફે છોટુની ધરપકડ કરી હતી. તેની પાસે રહેલી બેગમાંથી એમડી ડ્રગ અને બ્રાઉન હેરોઈન જથ્થો મળી આવ્યો હતો. અમદાવાદથી કાર લઈ તે અને બે સાગરીતો મુંબઈ ગયા હતા. ત્યાંથી રઈસ ઉર્ફે હૈદર પાસેથી કુલ 87 ગ્રામ 840 મીલીગ્રામ એમડી ડ્રગ અને 58 ગ્રામ 140 મીલીગ્રામ બ્રાઉન હેરોઈન ખરીદ્યું હતું. ત્યારબાદ બંને સાથીએ જુબેર ઉર્ફે છોટુને ડ્રગ સાથે મુંબઈથી અમદાવાદ આવતી ખાનગી બસમાં બેસાડી દીધો હતો. પ્રોહિબિશનના 6 ગુનામાં અગાઉ પકડાઈ ચૂકેલા જુબેર ઉર્ફે છોટુ લાલા રંગરેજની કુલ 11.75 લાખની મતા સાથે રામોલ પોલીસે ધરપકડ કરીને બાકીના બે સાગરીત સરફરાજ શેખ (રહે. દરિયાપુર), શીદીક શેખ (રહે. જુહાપુરા ફતેહવાડી) અને જથ્થો આપનાર મુંબઇના રઈસ ઉર્ફે હૈદરની શોધખોળ હાથ ધરી છે.