યુલિયા સ્વિરિડેન્કો યુક્રેનના વડાપ્રધાન બન્યા

યુલિયા સ્વિરિડેન્કો હવે યુક્રેનના નવા વડાપ્રધાન બન્યા છે. રાષ્ટ્રપતિ વોલોદિમીર ઝેલેન્સકીએ તેમના નામની ભલામણ કરી હતી. આ પછી, યુક્રેનિયન સંસદે તેમને વડાપ્રધાન તરીકે ચૂંટ્યા. યુલિયા અગાઉ નાયબ વડાપ્રધાન અને અર્થતંત્ર પ્રધાન હતા. તેઓ 39 વર્ષના છે અને વ્યવસાયે અર્થશાસ્ત્રી છે. તેમણે ડેનિસ શ્મિહાલનું સ્થાન લીધું છે, જેઓ 2020થી વડાપ્રધાન પદ સંભાળી રહ્યા છે. ડેપ્યુટી પીએમ તરીકે, સ્વિરિડેન્કોએ આ વર્ષે યુએસ રાષ્ટ્રપતિ ટ્રમ્પ સાથે ખનિજ સોદામાં મહત્વપૂર્ણ ભૂમિકા ભજવી હતી, જેના પછી તેમની ખૂબ પ્રશંસા થઈ હતી. નવા મંત્રીમંડળમાં અન્ય કેટલાક ફેરફારો કરવામાં આવ્યા છે. શમિહાલ હજુ પણ મંત્રીમંડળમાં રહેશે, પરંતુ સંરક્ષણ પ્રધાન રહેશે નહીં. તેમના સ્થાને રૂસ્તમ ઉમારોવ પહેલાની જેમ સંરક્ષણ પ્રધાન રહેશે. અગાઉ ઝેલેન્સકીએ શમિહાલને સંરક્ષણ પ્રધાન બનાવવાની વાત કરી હતી.
રાષ્ટ્રપતિ ઝેલેન્સકીએ એક દિવસ પહેલા એટલે કે 16 જુલાઈના રોજ જૂના મંત્રીમંડળનું વિસર્જન કરી દીધું હતું. આ પછી, તેમણે નવી સરકાર માટે તેમના પસંદ કરેલા લોકોની યાદી સંસદને આપી. ઝેલેન્સકીની પાર્ટી ‘સર્વન્ટ ઓફ ધ પીપલ’ 2019થી 254 બેઠકો સાથે સંપૂર્ણ બહુમતી ધરાવે છે. યુલિયાને 262 સાંસદોનું સમર્થન મળ્યું જ્યારે 22એ તેમની વિરુદ્ધ મતદાન કર્યું. તે જ સમયે, 26 સાંસદોએ મતદાન કર્યું ન હતું. સંસદમાં બોલતા, ઝેલેન્સકીએ ભૂતપૂર્વ વડાપ્રધાન શ્મિહાલનો આભાર માન્યો અને કહ્યું કે હવે અમેરિકા જેવા દેશો સાથે નવા કરાર કરવા માટે નવી વ્યૂહરચના જરૂરી છે. તેમણે કહ્યું કે સરકારે તમામ જૂના સંરક્ષણ કરારોની સમીક્ષા કરવી જોઈએ અને નવા સંરક્ષણ સહયોગ તૈયાર કરવા જોઈએ.
યુક્રેનની શાસન પ્રણાલી અનુસાર, રાષ્ટ્રપતિ વડાપ્રધાનનું નામ નક્કી કરે છે, પરંતુ સંસદની મંજૂરી જરૂરી છે. ત્યારબાદ વડાપ્રધાન પોતાના મંત્રીઓના નામ પ્રસ્તાવિત કરે છે, જેને સંસદ દ્વારા પણ મંજૂરી આપવી પડે છે. હાલમાં, ઝેલેન્સકીની પાર્ટી પાસે યુક્રેનિયન સંસદમાં બહુમતી છે, તેથી આ પ્રક્રિયા સરળતાથી પૂર્ણ થઈ રહી છે.

મંત્રીમંડળમાં ફેરફાર:
ડિજિટલ ટ્રાન્સફોર્મેશન મંત્રી મિખાઇલો ફેડોરોવ નવી સરકારમાં પ્રથમ નાયબ વડાપ્રધાનનું પદ સંભાળશે.
અર્થતંત્ર, કૃષિ અને પર્યાવરણ મંત્રાલયોને એક જ મંત્રાલયમાં મર્જ કરવામાં આવશે. તેની જવાબદારી ઓલેકસી સોબોલેવને સોંપવામાં આવી છે.
યુરોપ અને નાટો જેવા સંગઠનો સાથેના સંબંધો માટે નવા નાયબ વડાપ્રધાન તારાસ કાચકા હશે, જે અગાઉ સ્વિરિડેન્કોના નાયબ હતા.
ઓલ્હા સ્ટેફનિશિના જેઓ અગાઉ આ પદ સંભાળી રહ્યા હતા, હવે કેબિનેટમાં રહેશે નહીં.
એવું કહેવામાં આવી રહ્યું છે કે સ્ટેફનિશિનાને અમેરિકામાં યુક્રેનના રાજદૂત બનાવવામાં આવી શકે છે.